Read Angguruk Yali AMSAL 8 Bible Online

AMSAL 8 - Angguruk Yali bible

AMSAL 8

¹Ap inindi anggar atuk ane inowen aben uruk hag toho ele hi roho urukon holeg lamek!

²Kalem ilan fil punu hu reg ambeg men ke handuhal turuk ambeg men at ino unduhuk.

³O pumbukmu kurukon sok iraham in arik lalug ele ine roho urukon tu,

⁴”Hit ap kinangmon hunubam uruk lahi. Kinang atogman atogma welahebon obog tohowen an nele holeg lamek!

⁵Hit malik toronen wenggeltuk ane peruk lahebonen hinindi anggat toho wenggel haruk lamuhup. Hit hinindi nonghong uruk lahebonen fuki roho milal taruk lamuhup.

⁶Alem mondabi palimu rehon fahet nele tem toho hiyag hisaminen fano roho holtuk latlihip!

⁷Enele si ane urukon fahet[1] nirim peruk lit we tem ane uruk lahi.

⁸Nele indit toho uruk lit un ane hiyag hisa fug angge we pikit toho hiyag hisaruk lahi.

⁹Ap inindi anggat tehonen an nele uruk lahiyon fahet tem toho peruk lamuhup. Inindi hebeloho wenggeltukonen aren pikir ane uruk ulug wenggel haruk lamuhup.

¹⁰Ili ruruk angge perak fahet wenggel ha fug angge we anden komo heneptuk lahiyon fahet wenggel haruk lamuhup. Umbagpag turuk angge emas ino apma regma alem obog toho onoluk atuk ane palimu reg peruk lamuhup.

¹¹Ap inindi anggar atuk ane mondabi palimu werehen ilembani fanowon men aben nininggikmu welalep perukon men wirim teg eleg.

¹²Ap inindi anggar atuk ane ino an tu welahi. Mun ane man ane alem obog toho fahet an noluk teg lit fuki roho wenggeltuk ane an nubam eneg wereg.

¹³Ap sa NINIKNI Allah fahet akol toho werehon inowen siyag ane fahet nirim peruk lamag. Aben hemet toho turukon fahet anden nirim peruk lit onolok ane turukon men enele si ane urukon men nelmahip peruk lahi.

¹⁴Anden ap unubam nungge-nungge tilihip ulug milal eneptuk lit let eneptuk lahi. Alem obog toho hebeloho kim haruk lit nine roho turuk lahi.

¹⁵An famen eneg ap suwonen unumalikisi fet enesug lit alem unubam werehon haloho emberuk.

¹⁶Ap onowesi wal taneg werehon anden let eneptuk lahimu onotsi let eneptuk lit unggum unubam werehon fano roho kong turuk.

¹⁷An fahet inindi nasuhon arimano anden oho nindi enesug lahi. An yami naptukon arimanowen hiyag naptuk lamuhup.

¹⁸An famen aben mun ane man ane turukon fano atuk. Ap enenggengge anggolo atuk ane men ap ununuk palimu atuk ane men an famen eneg teko laruk.

¹⁹An fam werehon og hisihi hawon mondabi fano rehen umbagpag turuk angge emas men perak men ambi reg eleg.

²⁰Anden kalem pikiron eneg laruk lit Allahn peruk ane hikit toho eneg turuk lahi.

²¹Ap an inindi nasuhon anden enenggengge anggolowap turuk lahimu inibam keleg atuk.

²²Amukasi NINIKNI Allahn wal napfag. Mun angge man angge wal tibahon arimano sehelimu tamon an welahi.

²³Kinang uwan wal tuk fug lit an tam werehap napfag.

²⁴Ik suwon yenggelehon men ik eleruk wiliptukon men elegma an tam indag atik iyag.

²⁵Tom suwon men punu toron men uwan in am fugmu an tam indag napfag.

²⁶NINIKNI Allahn kinang aben yabuk wituk lamuhup ambeg ulug uwan wal tuk fugmu an tam welatik iyag.

²⁷An weregma Allahn ik suwon yenggelehon pali fil pohol walinggoho wirim haruk lit hili waroho imbibag.

²⁸An weregma Allahn pohol fil hina emberuk lit ik suwon yenggel amag ulug eleruk wili fibareg

²⁹ik inowen hili pisan toho laruk laruhu fug ulug imbibag. Kinang ahongge yaho ferukmu

³⁰an aben umalik indi anggen tohon hag toho At iraham welatik iyag.[2] An likiya hupmu At olohotman nahiyeg ane turuk lit At indi ahiyehap turuk latik iyag.

³¹An kinangma ap sehelimu wereg lit it unubahet nahiyeg toho welatik iyag.

³²Numalikisi, ari fahet anden komo haptuk lahiyon holtuk lit henehiyeg toho welamuhup.

³³Hinindi anggar aruhu ulug aben milal heneptuk ane apmayap tuk fug angge iren komo heneptuk ane hikit toho turuk lamuhup.

³⁴Aren ele hiyag nisamisi ulug likiya hupmu an nibam sokolma yet nasuhon arimano enehiyeg toho welamuhup.

³⁵Ap an hiyag naptuk lamuhubon arimano fano onoluk welamuhup. NINIKNI Allahn it indi enesug laruhu.

³⁶An yami nabuhup fuhon arimano ininggarehen siyahap taruk lamuhup. Ap an fahet ninirim perukon arimano war atuk ane fahet inindi reg lit wereg,” uruk.