Read Angguruk Yali AMSAL 9 Bible Online

AMSAL 9 - Angguruk Yali bible

AMSAL 9

¹Aben o wituk hag toho ap inindi anggar atuk ane inowen e uwag sabiren hutuk tebelug ibam wit tarisi.

²Wit tarisireg wam waroho osoho felug ik anggur ahaluwe hinanggoho e tuwalehon emberimu embehek.

³Embehekteg amingmingangge hiyap angge mon enebehekma elehet o pumbuk walinggoho ohowon emberimu lahakesareg enele hi roho,

⁴”Hit sa-o sa-o hinindi sohu roho welahebon nit ninibam watihip,” ulug wol eneptuk. Wol eneptukmu inisingan ap inindi anggat teg elehon unubam ele uruk lit,

⁵”Suburu anden osoho fihiyon men ik hinanggoho imbihiyon men nalihiben maniyek!

⁶Hinindi sohu roho welahep ane umbusuhup halug honoluk welamuhup. Ap inindi anggat tehon laruk ke laruk lamuhup,” uruk.

⁷Ap ekeyen are ele winik-wonog toho urukon eke komo rurukmu at inowen hebeloho inda yaruhu. Ap ekeyen are olok ane turukon eke komo rurukmu at inowen hebeloho siyahap tuhu.

⁸Ap ele winik-wonog toho urukonen hat fahet nirim puhu rohon haren komo ruk fug. Ap indi anggat tehonen indi nasug laruhu ulug at eneg komo ruruk laruhun.

⁹At komo ruhun halug nin sebe roho indi anggar aruhu. Allah fahet akol toho werehon eke milaluhun halug mun ane man ane fahet oluk aruhu.

¹⁰ NINIKNI Allah fahet enekol toho wereg ane ariyen eneg ap inindi anggar am teg. At ebe usa fulu rehon fahet onoluk teg ane ariyen eneg aben fuki roho wenggel ha reg.

¹¹Ap inindi anggar atuk ane ariyen eneg hat hine atuk lit amusun toho welaruhun.

¹²Hindi anggar aruhu ane ariyen hat hinggareg fano welaruhun. Hindi hemet toho nindi anggar aruhu fug puhun halug hat hinggareg siyahap taruk laruhun.

¹³Hiyap indi anggat teg elehon misihen mun ane man ane fahet fuki roho wenggel ha fug anggeyen ele hemet toho uruk.

¹⁴O pumbukmu punu yaron palimu at ibam sok iraham hur atuk angge fam heriyeg lit

¹⁵at ibam pisan isalug pikit lul perukon arimano inindi og eneptuk lit,

¹⁶”Hit sa-sa henepeleg toho welahebon an nibam kik watihip,” ulug wol eneptuk lit ap inindi sohu rehon unubam,

¹⁷”Ik yoholiyangge hilarukon men suburu hirako narukon men unduk fano reg,” uruk angge famen

¹⁸at men ambi atukon arimano war atuk ane fahet enepelegman wol eneptuk. At ibam kurukon arimano war atuk ambeg laruk hag toho laruk.