Read Angguruk Yali PENGKHOTBAH 1 Bible Online

PENGKHOTBAH 1 - Angguruk Yali bible

PENGKHOTBAH 1

¹Hun Daud amloho ap suwon o Yerusalem wereg lit amul eneptuk latfag ahunen ele uruk latfag ane suwesingga tu fam hahareg:

²Mun ane man ane kinangman turukon alem elehen we saplangge wereg ulug an amul eneptuk nahunen nele uruk lahi.

³Nungge fahet nit nonoluk wereg li yabuk sat toho wit tarukmen eneg welahe? Mondabi welaruhu angge nungge nininggikmu aruhu?

⁴Malik indag atukmu ap sabalon war atuk angge famen kinang ino nin am fug angge amusun toho welaruhu.

⁵O hubet mo lahik watug hupmu ubuk uruk. Ubuk ulug likiyamon nin hebeloho inam aruhuk ulug lahik waharuk ambeg folo-folo laruk.

⁶Homhomo ik ambut fil lalug nin hebeloho ik eleruk fil laruk. Hebeltil laruk lit tam wilip atuk ambehen nin suhuloho waharuk.

⁷Ik obog toho wirig atug ik suwon yenggelehon fam kilaptuk angge famen keleg atuk eleg. Ik yenggelehon ino famen tam wilip atuk ambeg suhuloho lalug nin hebeloho wirig atuk.

⁸Mun ane man ane kinangman teko larukon nin atukmen eneg wereg. Aben nele obog toho ihireg winon eke uk hahon wereg eleg uk fug teg. Ilen oho mun ane man ane obog toho hihi uk fug teg. Isanggowen oho obog toho holihi uk fug teg.

⁹Indam turuk latuson men fobik turuk lamuhubon men nike ane turukmen eneg wereg. Tam teko larisiyon men fobik teko lahuwon men misig ane eneg teko laruk, pohol apma alem keron inam atuk eleg.

¹⁰Ap ekeyen, ”Alem keron tu weregma yet himin!” uk teg ano? Alem keron wereg perukon ino indam nit indag am fugmu oho wereg latfag.

¹¹Nunumbasiyen turuk latfahon fahet nit nenepeleg toho welahe hag toho welamuhup li turuk lamuhup ane faher oho malik fobik indag amuhubonen wenggel haruk lamuhup fug.

¹²An amul eneptuk nahun nibam o Yerusalem wereg lit Israel inap onowe suwon welatikik.

¹³Wereg lit an nindimuwen tem toho wenggel haruk latikikon tu, ”Ap inindi anggat tehonen wenggel haruk ane hikit toho anden oho mun ane man ane aben kinang tu famen turukon alem fuki roho yami ruhuk,” perikik. Perikik ane ino hikit toho turuk lit yet harukmen alem arimano ap kinangmonen sat toho yami ruruk lamuhup ulug Allahn imbibahon ari we tem toho anggin teg perikik.

¹⁴Ap kinangmonen turukon obog toho yet harikikteg mun ane man ane kinangman turukon alem elehen homhomo senebul ulug muko larukon men wirim teg perikik.

¹⁵E konu rehon ap misihen oho pikirap tuk fug teg. Nungge-nungge elehon winahuk fug teg.

¹⁶An nindimuwen wenggel haruk lit, ”Nindi we tem toho anggar atisimu mun ane man ane alem obog toho noluk teg lahi ane men Yerusalem inap onowesi tam welatfahon obog toho onoluk teg latfag ane men ambi reg eleg,” perikik.

¹⁷Ari perikikteg ap inindi anggar atukon fano ano, inindi sohu atukon hayen ano ulug fuki roho wenggel harukmen homhomo senebul ulug muko laruk ane men ambi reg ulug noluk atisi.

¹⁸Ap sa indi anggar atuk halug indi anggin toho wenggel haruk laruhu. Alem anggolo fahet oluk teg ane ariyen indimu ouk haruk ane su atuk.