Read Angguruk Yali PENGKHOTBAH 10 Bible Online

PENGKHOTBAH 10 - Angguruk Yali bible

PENGKHOTBAH 10

¹Sobon eke e ahaluwe amben fanowon fam kulug war atukon amben siyag turuk. Tot sohu ane turuk ahunen ap inindi anggat tehon ununuk palimu werehon apmayap enebuk teg.

²Ap inindi anggat tehonen kalem pikiron lul peruk. Inindi sohu rehon kebunggalem hareyon laruk.

³O kema-kema laruk lit ket-ker ane eneg til laruken ap obog tohowen at fahet indi sohu ahun tu ulug onoluk atuk.

⁴Ap suwon eke undama ahe laharukmu hat fahet olok haruk halug hat hibalma embeselug la fug. Hindi imbik wambuhunmu indi oloken siyag ane hum toho turukon eleg aruhu.

⁵Alem siyahon eke kinang tu famen teko larukmu yet harikik. Ap suwonen fuki roho wenggel haruk elegma siyag ane teko larukon tu:

⁶Aren ap inindi sohuwon anggolo palimu lahap eneptuk lit tung toho wereg inap apmayap eneptuk.

⁷Ap enemingmingangge wam kuda fam lahalug heriyegma it suwon-suwon aben mingming eneptukon hag toho unuyug fam larukmu yet isarikik.

⁸Ap mako wambukag ulug kinang habuloho yebangge yep teberukon ino inggareg mako wamburuk lit luhur aruhu. Ap san elehet eke pisan toho kimin ulug halog turukmen pisanggowen fato ruhu.

⁹San helep fele rurukon ino heleben fele roho waruhu. San e kahaltukon ino inggarehen wat tahu.

¹⁰San yaha ayeg umatuk eleg halug olok elehen sat toho e wituk. Sa indi anggat teg lit yabuk eke wituk halug fano aruhu.

¹¹Pisanggo foroho ahunen il sahuhap tuk fugmen fato ruruk halug il wabuk fug teg.

¹²Ap inindi anggat tehonen enele uruk ane ariyen ap inindi og eneptuk. Inindi sohu rehon enembiliken ininggareg enebe pil isaruk.

¹³It inindi sohuwonen ak turuk lit enele ket-ker ane uruk. Enele obog toho uruk lit sohu-sohu ane mondabi siyahon eneg uruk.

¹⁴It inindi sohuwonen enele uruk waruk angge famen fobik teko lahu ane fahet nit nenepeleg, nit war amuhukmu mun ane man ane turuk laruhuwon fahet ap misihen oho hiyag nisa fug teg.

¹⁵Inindi sohu roho werehonen iniyabuk sat toho witukmen eneg inine eleg atukmu inibam larukon fahet inindi nong atuk.

¹⁶Kabini ahun apelehon eke ap suwon raja laharuk halug kinang siyag atuk. Onowesi roho werehonen likiyanet ak turuk lit yunggultukmen eneg wereg halug oho siyag.

¹⁷Ap alem haloho umbuk hahon eke ap suwon laharuk halug kinang fano aruhu. Onowesi roho werehon inindi wirik toho wereg lit ik olokon nalug nenek tuhuk tohon ulug yet tehon fano yunggultuk li eneg yunggultukon arimano fano.

¹⁸Ap asukun siyahon ibam ungga keyenteg fo reg keyen osit tep-tep wamburuk. Inggik lebe ruruk elehen ibam tukum tuhu.

¹⁹Nenehiyeg toho nul ulug aben wam esetuk. Inda yabul ulug ik olokon naruk. Uang eleg halug wamet ik olokonet ayeg waroho hila fug teg.

²⁰Ap suwon hindimuwen huluwap tuk fug! Tung ahun eke hat nohoruk lahen ambehen abug uk fug! Suwe pohol ke lam-lam larukonen hat hele urukmu hol hiyalug huruwe lahup tohon!