Read Angguruk Yali PENGKHOTBAH 2 Bible Online

PENGKHOTBAH 2 - Angguruk Yali bible

PENGKHOTBAH 2

¹An nindimuwen wenggel haruk lit, ”Enehiyeg haruk inap arimano ke roho wereg ulug noluk atmisiyen an oho it hag toho welaruhuk,” perikiteg wal harukmen ap enehiyeg toho wereg ane ari oho we saplangge wereg ulug noluk atisi.

²Anden ap inda yatukon fahet wenggel haruk lit inindi sohu rehen inda yatuk, enehiyeg haruk ane ariyen nungge-nungge ininggikmu atuk eleg perikik.

³Ari perikikteg anden mun ane man ane alem obog toho fahet fuki roho wenggel haruk lit inindi sohu atuk ane faher oho noluk atmisi perikik. Peruk lit hele anggur ahaluwe ap enebe inahanap eneptuk ahik naruk ane wal hamin perikik. Ik ino naminteg nit ap folo-folo war atuk laheyon fahet fanowon te ke, siyahon te ke ulug noluk atmisi perikikteg narikik.

⁴Welatikikteg alem suwon eke tuhuk ulug o men hele anggur yabuk men wit taruk latikik.

⁵Yabukmu arimano e anggen eke hag eke hag urukon yatikik.

⁶E yatikikon ahaluweyap turukon fahet ik yenggel amag ulug kinang habultikik.

⁷Anden ayeg waroho ap hiyap namingminganggeyap eneptikikmu it unumalikisi oho namingmingangge atusa. Wam sapi kambing domba anggolo foroho latikik hag toho indamen tulug ketiya oho o Yerusalem inap misihen oho foroho latisi fug.

⁸Anden ili ruruk angge perak men emas men fano-fano angge o pumbuk winamon anden seneg latikikon onowesiyen hundig-hundig walug waharuk latuson arimano andog toho foroho latikik. Foroho lit ap hiyap sini yunggultukon niraham welamuhup ulug wol eneptikikteg hiyap ap inindi enehiyehap eneptukon anggolo anden og enesug latikik.

⁹Ari roho turuk lit an tung nahun atikikteg nine roho welatikik hag toho ap tam o Yerusalem welatfahon misig oho welatfag fug. Tung toho welatikik li anden ap inindi anggat tehonen turuk ane hikit toho turuk lit

¹⁰an ale peruk latikikon obog toho ninggikmu atukmu nindi nahiyehap naptukon oho hilaruk latikik. Ari roho mun ane man ane wal haruk lit sat toho turuk latikikon ambiyangma nahiyeg toho welatikik.

¹¹Nahiyeg toho welatikik angge famen ninggik fam turuk latikikonet yabuk sat toho wituk latikikonet fuki roho kim harikikteg wenggel harukmen mun ane man ane kinangman turukon alem elehen homhomo senetmin ulug muko larukon men wirim teg perikik. We tem nit kinangma wereg lit mun ane man ane turuk lahe angge famen nungge-nungge mondabi welaruhuwon nininggikmu atuk eleg ulug noluk atisi.

¹²Ari hag toho fobik an nubalma ap suwon in aruhu ahun inowen oho aben indamen tulug ketiya turuk ane hikit toho turuk laruhu. Ari fahet anden hebeloho ap inindi anggar atukon men inindi sohu atukon men fahet fuki roho wenggel hamin perikik.

¹³Wenggel haruk lit hik men seleg men ambi reg eleg hag toho ap inindi anggar atuk ane fano, inindi sohu roho wereg ane siyag ulug noluk atisi.

¹⁴Ap inindi anggat tehon inil fano rehen lul peruk ke yet haruk, inindi sohu roho werehon arimano o hik tegma wereg lit fatil laruk angge famen it pirenet misigmu laruk ulug noluk atisi.

¹⁵Noluk atisimu an nindimuwen peruk lit, ”Alem inindi sohu roho wereg inap unubam atukon arimano ambi roho an nubam oho aruhu angge re nungge fahet nindi anggar amag?” perikik. ”We tem toho ap inindi saplangge anggar atuk,” ulug wenggel harikik.

¹⁶Ap indi sohuwon war atuk hag toho indi anggat tehon oho war atuk. War atuk halug fobik it piren unubahet wenggel isaruk lamuhup fug. Mun ane man ane ketiya teko larukon fahet ap fobik welamuhubonen enepeleg toho welamuhup.

¹⁷Nungge-nungge kinangman teko larukon ariyen an nindi anggin atisimu an noluk welahi ane fahet nirim peruk latikik. We tem mun ane man ane kinangman turukon alem elehen homhomo senebul ulug muko larukon men wirim teg.

¹⁸Anden yabuk witukmu anggen ninggikmu atukon arimano fobik an nubalma in aruhu ahun ngi aruhu perikikteg yabuk sat toho wituk latikik ane faher oho nirim peruk latikik.

¹⁹An nubalma in aruhu ahun ino indi anggat teg laruhu ano, indi sohu reg laruhu ano ulug ap san oluk am teg? An nindi anggat teg lahiyon noluk wereg li yabuk sat toho witukmu anggen ninggikmu atukon obog toho at ino ngi aruhu. Alem ari oho saplangge teko laruk.

²⁰Ari obog toho noluk atisimu anden yabuk saplangge witukmen eneg welatikik ulug nindi mondabi anggin atisi.

²¹Ap eke inggik fano reg lit, indi anggat teg lit, mun ane man ane fahet fuki roho wenggel haruk lit yabuk sat toho witukmen eneg anggen anggolo atuk. Ap ino war aruhumu aren angge obog toho inggik elehon ngi aruhu. Alem ari oho saplangge teko laruk.

²²Nungge fahet ap eke oluk wereg li yabuk lisag toho witukmen eneg welaruhu?

²³Likiya hupmu yabuk waruk ane ariyen indi ouk haruk lit asengseng toho wereg. Hubanggo oho indi anggin toho wenggeltukmen eneg nohoruk eleg. Turuk ane ari oho saplangge turuk.

²⁴Suburu men ik men naruk lit yabuk sat toho witukmu anggen fanowon ininggikmu atukon fahet enehiyeg harukon ari eneg fano perikik. Enehiyeg toho wereg ane ari Allahn og isaruk ulug noluk atisi.

²⁵Allahn og isaruk elegman ap sa suburu naruk lit ahiyeg toho welam teg?

²⁶Allahn unubabut fano peruk inap arimano Aren let eneptukmu inindi anggar atuk lit mun ane man ane alem obog toho onoluk atukmu enehiyeg toho welamuhup. Ap unubabut siyahon Allahn hiyag isaruk ane hikit toho yabuk witukmu anggen eke hag eke hag hilaruk lamuhubon arimano andog toho foroho lamuhup. Foroho lamuhup angge arimano fobik Allahn fano peruk inap og isahu. Alem ari oho saplangge werehen homhomo senebul ulug muko laruk ane men ambi reg ulug noluk atisi.