Read Angguruk Yali PENGKHOTBAH 3 Bible Online

PENGKHOTBAH 3 - Angguruk Yali bible

PENGKHOTBAH 3

¹Mun ane man ane kinangman turukon Allahn teko lawag peruk sambil eneg teko laruk.

²Malik indag atuk li, ap war atuk li, eiyangge yatuk li, henetuk li,

³ap unusuruk li, hihir eneptuk li, o halog turuk li, wituk li,

⁴uba yatuk li, inda yatuk li, fong watuk li, enehiyeg toho yunggultuk li,

⁵Helep hik turuk li, palu ruruk li, unuhesi men ambiyeg nohoruk li, nohuk fug angge wereg li,

⁶longgo uruk li, longgo urukon hiyaharuk li, foroho li, hik isaruk li,

⁷tararag turuk li, seleben turuk li, enele eleg angge wereg li, enele uruk li,

⁸inindi enesug li, inirim teg li, tog aptuk li, tog pilaptuk li, aru obog toho Allahn peruk ane hikit toho teko laruk.

⁹Nungge fahet yabuk sat toho wit taruk lahe?

¹⁰Allahn yabuk angginon nunubam emberukmu yet haruk latikik.

¹¹Mun ane man ane turukon Aren sali imbibag sambil eneg teko laruk. Fobik teko lahu ane an oho noluk teg lale perukon ino Allahn ap inindimu imbibag angge famen Aren atam tibahon famen tulug fotog-fotogma tuhuwon niren fuki roho wenggel ha fug teg lahe.

¹²Nit nonoluk wereg li nenehiyeg toho welamuhuk ane fahet eneg yami ruruk lamuhukon ari fano ulug noluk atisi.

¹³Allahn og nisaruk ane ariyen nit ap obog tohowen yabuk lisag toho wit talug suburu men ik men naruk lit nenehiyeg toho welamuhuk.

¹⁴Allahn turuk ane mondabi welaruhu ulug an noluk. Aren teko lawag perukon aben elehap tuk fug teg. Teko lahu fug perukon aben suwap tuk fug teg. Ap obog toho An nubahet enekol toho welamag ulug Allahn ari hag toho turuk.

¹⁵Ketiya teko larukon men fobik teko lahuwon men tam teko larisi ane hikit toho nikeyon eneg laruk. Atam teko libahon Allahn peruk ane hikit toho fobik oho inam aruhu.

¹⁶Kinangman teko larukmu yet haruk latikikon eke re tu: It-it let-ler atuk lam angge famen wat-war atuk. Unggum kong turuk ambehen oho alem fano roho haluk fug angge onolok ane eneg turuk.

¹⁷Ari yet haruk lit nindimuwen wenggel harikikon tu: Fano ane turuk inabet siyag ane turuk inabet alem unubam werehon arimano Allahn kong tuhu. Onolok ane turukon, fano ane turukon Allahn teko lawag peruk sambil eneg teko laruk.

¹⁸Nit welahe ane wam hag toho welahe ulug nonoluk aruhuwen Allahn wal nisaruk peruk lahi.

¹⁹Ap oho wam oho Allahn sat ambi roho og isarukmu abet wamet war atuk. Ap fam wereg ane palimu regma wam fam wereg ane apma reg eleg, we ambi roho saplangge onoluk wereg.

²⁰Abet wamet obog toho misigmu laruk. Pirenet kinang famen wereg atfag angge re nin hebeloho kinang amuhup.

²¹Ap enehime pali fil laharukmu wam enehime kinangma wamburuk ano, nit nenepeleg.

²²Ari fahet aben yabuk wit taruk lit enehiyeg toho welamuhup ane eneg yami rurukon ari fano ulug noluk atisi. Winon-winon niren tuhuk peruk ane teko la fug teg. War amuhukmu fobik teko lahu ane nenepelehen we ketiya welaheyon fahet eneg wenggel haruk lamul.