Read Angguruk Yali PENGKHOTBAH 4 Bible Online

PENGKHOTBAH 4 - Angguruk Yali bible

PENGKHOTBAH 4

¹Anden yet harukmen kinang atogman atogma aben onori siyahap eneptukmu inindi siyahen uba yatuk latusama ap inindi yuwahap eneptukon misig oho wereg latisi fug. It siyahap eneptukon arimanowen inine roho turuken ap misihen oho let enebuk fug teg.

²Ari fahet ap tam war atuk latuson arimano fano roho weregma onoluk werehon siyag toho wereg perikik.

³Perikik angge famen ap uwan indag am fug lit kinangman siyag ane turukon yet isaruk elehon arimano fanoma wereg ulug wel eneptuk latikik.

⁴Anden nin yet harukmen an nori enemberimu lahale ulug wenggel haruk ane ariyen ininggik fano reg lit iniyabuk lisag toho turuk. Alem ari oho saplangge werehen homhomo senebul ulug muko laruk ane men ambi reg.

⁵Aben enele uruk lit, ”Ap inindi sohu roho werehon arimano ininggik si roho heriyeg lit suburu oboken war amuhup,” uruk angge famen

⁶anden uruk lahiyon tu: Ap ekeyen anggengge tot werehon inggik misihen yinggiloho seneg lit indi yuwag toho werehon ari fano, inggik pirenen yabuk lisag toho waruk angge famen homhomo senetmin ulug muko larukon ari siyag.

⁷Kinangman saplangge turukon yet haruk latikikon eke tu:

⁸Ap misig ot owe men umalik men elegma amu eneg wereg lit kel ta fug angge yabuk witukmen eneg wereg. Wereg lit indimuwen an ale peruk ane umbusuk fug angge anggengge palu roho lahaptuk. Sa fahet ap inowen yabuk sat toho wituk? Ahiyeg toho welalep angge famen sa fahet lisag toho turuk? Alem elegman turukon ari oho mondabi siyag.

⁹Ap amu wereg halug siyag, are eke wereg halug fano. It pirenen yabuk ambiyeg turukmu onggo sebe roho og isaruk lamuhup.

¹⁰Misig ino fuk toho kinangma ying atuk halug areyen unduhuk fuk teg. Ap amu wereg lit kinangma ying atukmu are unduhuk ferukon eleg halug siyag.

¹¹Ap piren misigmu nohorukmu inahan turuk. Ap misig amu nohoruk halug nangginoho ebe inahan am teg?

¹²Ap amu weregma ware fesemin perukon ekeyen wabuk teg angge famen piren wereg halug unusuk fug teg. Kumbi wisig hinahan fam urukon folo-folo kong toho laruk eleg.

¹³Ap suwon eke wereg li ikni ilaheg toho werehon amloho eke ininggik hele waroho kilap eneptuk ambehen wilip aruhureg ebe kabinimu ap suwon in aruhu. At ino palimu regma ap suwon tam welaruhuwon ino sabal aruhureg indi sohu atuk lit aben komo rurukmu nirim peruk laruhuwon apma reg.

¹⁵Anden yet haruk latikikon tu: Ap kabiniyon eke tam ap suwon lahakuwon ubalma ap suwon in aruhu halug ap obog toho kinang atogman atogma werehon at ombolim laruk lamuhup.

¹⁶Ombolim laruk lamuhubon enebe anggolo welamuhup angge famen ap fobik welamuhubon arimanowen aren turuk latisiyon fahet ninirim peruk lamuhup. Ari roho turuk ane ino oho alem elehen homhomo senebul ulug muko laruk ane men ambi reg.

¹⁷Hat Allah ibam lamin peruk lahen halug hubam anggat toho welamin! Allah ele holmin ulug ambeg larukon palimu regma ap inindi sohuwonen Allah fahet wam emberukon ari apma reg. Iren fanowon tu, siyahon tu ulug haluk fug teg liren turuk.