Read Angguruk Yali PENGKHOTBAH 5 Bible Online

PENGKHOTBAH 5 - Angguruk Yali bible

PENGKHOTBAH 5

¹Allah ubam nele imin peruk lahen halug folo-folo hindimu foroho lahenon wilibuk fug angge fano roho wenggel halug eneg hele uruk laruhun. Allah poholma weregma hat kinangma welahen. Ari fahet Allah ubam hele we tor angge uruk laruhun.

²Ap ekeyen alem ekeyon-ekeyon fahet indi anggin toho wenggel haruk halug hubanggo nei siyahon wahu. Ari hag toho ap ekeyen ele anggolo uruk halug ket-ker ane uhu.

³Haren Allah ubam nungge-nungge og huruhuk ulug sali umbuhun halug musun toho welam fug angge sali ino hikirap tuhun. Ap inindi sohuwonen sali emberukon enepeleg atukmu Allahn nirim peruk angge re we tem toho sali umbuhunon hikit toho tuhun.

⁴Allah ubam sali emberuk laruhun fug halug fano, sali umbuhun angge famen hikirap tuhun fug halug ari siyag.

⁵Haren fuki roho wenggel ha fug anggeyen un ane uruk lit Allah ele ying tuk fug! Un ane uhunteg fobik Allah amingmingangge ubam, ”Anden imin puk fug anggeyen irikik,” ulug hiyag uruhun tohon! Nungge fahet haren un ane uruk lit Allah ele ying tuhunmu Aren olok haruk lit hinggiken turuk lahenon siyahap tuhu?

⁶Aben nei anggolo warukon saplangge waruk, enele urukon warukon oho saplangge uruk angge famen hat hindi anggat toho wereg lit Allah fahet hakol toho welaruhun.

⁷Ap suwon ekeyen umalikisi enenggengge elehon iren tohon og isa reg angge famen inirahamne eneptukmu yet haruk lahen halug hindi su am fug. Ap suwon ino oweyen ili warukmu it piren onowe suwon ili og eneptukon oho wereg.

⁸Ap suwon raja ekeyen numalikisiyen iniyabuk fano wit taruk lamuhup ulug ili og eneptuk halug ari fano.

⁹Ap san uang fahet inindi harukon arimano uang anggolo naruk lamuhup angge famen enehummu atuk laruhu fug. Ap san tung nahun welale perukon arimanowen enenggengge andog toho lahabil laharuk lamuhup angge famen tu men ari men an ale peruk ane umbusuhup fug. Ari roho turukon oho alem elegman saplangge turuk.

¹⁰Ap ekeyen anggengge anggolo foroho halug aren tohon naruk lit elehap turuk inap anggolo atuk angge famen nungge fahet mun angge man angge lahabil laharuk? Anggengge ilen eneg yet harukon fahet eneg andog toho emberuk?

¹¹Ap sa suburu anggolo ano tor angge ano naruk lit yabuk lisag toho witukon arimano hubanggo fano nohoruk angge famen ap enenggengge anggolo forohowon arimano enehum ouk toho nalug hubanggo inindi anggin toho wenggeltukmen eneg nohoruk eleg.

¹²Alem siyahon kinangman teko larukon yet harikikon eke tu: Tung ahun ekeyen nanggengge siyag am nowen ulug fano roho foroho latisi angge famen

¹³misihim alem siyahon eke ubam atisimu anggengge obog toho eleg atisi. Eleg atisimu ap ino fobik war atuk lit umalikisi fahet nungge-nungge lin isahu fug.

¹⁴At ebe eneg isinga ahummuwen indag atisi ahun ari oho ebe eneg war aruhu. War aruhu sambil yabuk lisag toho witukmu anggen inggikmu atisiyon tor angge oho walug lahu fug.

¹⁵Alem mondabi siyahon tu: Ap ebe eneg indag atuk hag toho ebe eneg war atuk angge re nungge fahet yabuk sat toho witukmen eneg wereg? Yabuk witukon men homhomo senebul ulug muko larukon men wirim teg.

¹⁶Ap onoluk wereg li o hik tegma fatil laruk lit ouk eneg unubam atukmu inindi anggin toho wenggel haruk lit onolok harukmen eneg wereg.

¹⁷Anden mun ane man ane alem obog toho fahet fuki roho wenggel haruk lit yet harikikon tu: Allahn pibag ane hikit toho ap kinangma amusun toho welam fug angge folo-folo war atuk. Ari fahet ik men suburu men naruk lit yabuk witukmu anggen ininggikmu atukon fahet enehiyeg toho welamuhubon ari fano perikik. Ap kinangmon ari hag toho welamuhup ulug Allahn imbibag.

¹⁸Ap eke Allahn anggengge anggolo og utuk lit yabuk hine roho witukmu anggen urukon hilalug hindi hahiyeg toho naruk laruhun ulug hiyag utuk halug we tem Allahn og nitisiyon naruk lahi pukag.

¹⁹Allahn pibag ane hikit toho an nahiyeg toho welahi peruk lit amusun toho welam fug angge war aruhukon horog toho welahi ulug indi anggin toho wenggeltuk laruhu fug.