Read Angguruk Yali PENGKHOTBAH 6 Bible Online

PENGKHOTBAH 6 - Angguruk Yali bible

PENGKHOTBAH 6

¹Alem angginon ap kinangmon unubam atuk lit mondabi hondo enesugmu yet harikikon tu:

²Allahn ap eke anggengge anggolo og utukmu mun angge man angge an ale perukon obog toho inggikmu weregma oriyen unuk palimuwap turuk angge famen Allahn peruk ane roho inggarehen naruk laruhu fug, ap winonen naruk lamuhup. Ari roho turuk angge famen alem elehen mondabi siyag.

³Ap eke amusun toho oluk wereg lit malik teng uhan indag talug mondabi sabal atuk. Ap inowen fano roho welahi ulug ahiyeg ha fug angge weregman eneg war atepma aben oho fano kinangma saltep fug halug malik isinga ahummuwen war atukon eke fano roho weregma at ino siyag toho welalep peruk lahi.

⁴Malik isinga ahummuwen war atukon ino saplangge ahummu atug unuk suwaleg elegman hik teg ambeg laruk.

⁵At inowen mo asinandi rurukon misihim oho yet ha fug angge ap onoluk wereg ane fahet apeleg toho wereg. Ari roho wereg lit mondabi kel taruk angge famen tung toho wereg ahun ino indi yuwag atuk eleg.

⁶Tung ahun ino oluk wereg li ahiyeg ha fug angge wereg. Weregman eneg indag atfag sambilen tulug mo ilig am wirig am turukmen teng obog sehelet obog 2.000 larukmu mondabi sabal atep halug oho ap winon obog toho laruk ane hikit toho ar oho ap warehon wereg ambeg lelep.

⁷Ap kinangmonen enehum fahet yabuk sat toho wituk angge famen enehum ouk toho naruk eleg.

⁸Alem ari fahet ap inindi anggat tehon arimano eneg fano roho wereg puk fug. Iret ap inindi sohu roho werehonet enehummu atuk eleg. Ap inine elehon oho mun ane man ane tuk tehon fahet onoluk teg ane ariyen fano atuk eleg.

⁹Nit nininggikmu wereg angge ninilen yet harukon ari fano. Tu helele ari helele ulug ninindimuwen wenggel harukon ari siyag. Alem ari oho saplangge werehen homhomo senebul ulug muko laruk ane men ambi reg ulug noluk atisi.

¹⁰Mun ane man ane kinangma teko larukon indam ari hag toho teko lahu ulug imbibag ane hikit toho teko laruk. Nit ap kinangmon ninine eleg ulug nonoluk teg lahereg ap mondabi ineyon fam suwahal uk fug teg lahe.

¹¹Aben enele anggolo uruk ane ariyen ket-ker ane anggolo inam atuk. Enele uruk ane ariyen nungge-nungge ininggikmu atuk ano?

¹²Nit ap enehuhe longgo uruk hag toho ilamna welaheyon san alem fanowap naptukon tu, siyahap naptukon ari ulug haluk teg? Nit war amuhukmu kinang tuman teko laruk laruhu ane fahet ap san hiyag nisa reg?