Read Angguruk Yali PENGKHOTBAH 7 Bible Online

PENGKHOTBAH 7 - Angguruk Yali bible

PENGKHOTBAH 7

¹Unuk aben wel turukon ari fano. Amben fano angge fahet fog turukon ari siyag. War atukon ari fano. Indag atukon ari siyag.

²Fong watuk inap inibam larukon ari fano. Seni esetuk ambeg larukon ari siyag. Ap obog toho war atukon fahet onoluk wereg li inindi anggar amag.

³Indi anggin toho wereg ane ari fano. Inda yatukon ari siyag. Alem angginonen orohole hikap turuk angge famen indi fanowap turuk.

⁴Ap inindi anggat tehon fong watuk inap inibam wereg lit enehiyeg haruk. Inindi anggat teg elehon ap inda yatuk ambeg wereg lit enehiyeg haruk.

⁵Ap inindi anggat tehonen komo yig utukmu holtukon ari fano. Inindi anggat tehonen sini yunggultukmu holtukon ari siyag.

⁶Inindi anggat tehonen inda yatuk ane ari alog-alog angge indoken narukmu aplohok turukon hag toho wereg. Alem ari oho saplangge wereg.

⁷Aben inindi anggat teg inap enele ying eneptuk halug inindi nin atuk lit ket-ker ane tuk teg. An nibil amag ulug uang og isarukmu senetuk ane ariyen inindi siyahap eneptuk.

⁸Nungge-nungge turuk lit obog teberukon ari fano. Nungge-nungge ket ak turukon ari siyag. Indi imbik wamburukon ari fano. Indimu winik-wonog toho turukon ari siyag.

⁹Folo-folo hindi holok hahun fug! Ap inindi anggat teg elehonen ninirim perukon inindimu amusun toho foroho lit wereg.

¹⁰Haren te nungge fahet indam eneg fano roho welatukuk uk fug! Ap inindi sohu roho werehonen eneg ari hag toho uruk.

¹¹Ap inindi anggar atukon men enenggengge ininggikmu werehon men wirim teg. Inindi anggat tehon arimano ininggikmu eleg angge welamuhup fug.

¹²Uang foroho ane ariyen ap inindi yuwag atuk hag toho ap inindi anggat tehon oho inindi yuwag toho wereg. We tem toho inindi anggar atuk lit mun ane man ane onoluk teg ane ariyen ap fano onoluk welamuhup.

¹³Allah inggik ineyonen turuk ane yet himin: Aren hayuhap turukon san pikirap tuk teg?

¹⁴Hat fano welaruhun sambil hahiyeg toho welaruhun! Siyag toho welaruhun sambil fano aneyet asengseng haruk aneyet Allah famen waharuk ulug wenggel haruk laruhun. Mun ane man ane Allah famen waharuk angge re sono teko lahuwon fahet haren wenggel ha fug teg lahen.

¹⁵An indag napfag sambilen tulug yi ane ti ane saplangge turuk lit yet harukmen ap fano ane turukon eke siyag atukmu siyag ane turukon eke amusun toho weregma yet isaruk latikik.

¹⁶Ari fahet an nubabut mondabi fano reg lit nindi anggat teg lahiyon palimu welahi ulug winik-wonog tuk fug! Nungge fahet ninggareg siyahap tarukon ari fano puhun?

¹⁷Siyag ane hum toho tuk fug! Sohu-sohu ane fahet eneg wenggel ha fug! Nungge fahet an nebe kabinimu war atukon fano peruk lahen?

¹⁸Nindi anggat toho welahi ulug palimuwap ta fug, ap sohuwon aruhuk ulug apmayap ta fug! Komo piren ariya hine roho seneg lamin! Ap san Allah fahet akol haruk halug fano roho haleg ke laruk laruhu.

¹⁹Inindi anggat teg inap inine anggolo regma ap suwon numen o pumbuk misig sen enesuhon arimano inine eleg.

²⁰Ap unubabut pikironen fano ane eneg turukon misig oho wereg eleg. Iren oho siyag ane turuk.

²¹Aben enele urukon obog toho anden hol esele ulug wenggel ha fug. Hat hamingminganggeyen habug urukon holuhun tohon.

²²Haren oho anggoloenam hori enebug uruk lahenon hat hindimu holuk teg.

²³An nindi anggar aruhu perikikteg mun ane man ane fahet fuki roho wenggel haruk latikik angge famen nindi anggar atisi fug.

²⁴Mun angge man angge kinangma werehon alem yatma hirako werehen ap san hiyahuk teg?

²⁵Anden hebeloho ti angge tu angge fuki roho kim haruk lit alem wal taneg fahet noluk aruhu ulug yami ruruk latikik. Inindi sohu roho wereg ane ariyen siyag ane inam atuk ano ulug wenggel haruk latikik. Inindi anggat teg elehen ket-ker ane turuk ano ulug noluk ale perikik.

²⁶Anden yet harukmen war atuk ane ari tot hayen, hiyaben ap indimu narukon fahet sapna kahaleg lit hele fam pug eneptuk hag toho ap inggiken mako pug toho senetukon ari anggin teg ulug noluk atisi. Allahn nirim peruk ane turukon arimano sapna ari elma luhur amuhup angge famen Allahn fano peruk ane turukon arimano kuhup fug.

²⁷Alem tu men ari men fahet fuki roho wenggel haruk lit yami rurukmen eneg hiyaharikik fureg nin hebeloho yami ruruk lit an ap amul eneptuk nahunen alem misig eneg hiyaharikik. Aben enele uruk lit, ”Ap teng obog sehelet obog enesehelimu ap indi fanowon we misig eneg weregma hiyaharikik, hiyap ari hahon misig oho hiyaharikik fug,” uruk.

²⁹Uruk ane ari hikit toho alem we misig hiyaharikik ane fahet iminon tu: Allahn ap inindi pikit toho welamuhup ulug wal enepfag angge famen iren mun ane man ane wal haruk lit inindi angginap taruk.