Read Angguruk Yali PENGKHOTBAH 8 Bible Online

PENGKHOTBAH 8 - Angguruk Yali bible

PENGKHOTBAH 8

¹Ap inindi anggat tehon arimano sa hahon wereg? Mun ane man ane alem onoluk tehon arimano unubabut ke roho wereg? Inindi anggat teg ane ariyen onorohole hik tehon selehap eneptuk.

²Allahn ap suwon raja ubam hat men welaruhuk ulug sali emberisi angge re[1] ap suwon inowen ele urukmu haren holtuk laruhunen komo haptuk lahi.

³Nirimen ap suwon ele holmin fug ulug hindimuwen folo-folo holok ha fug. Mun ane man ane ap suwon indimuwen tuhuk peruk ane tuk teg. Ari fahet aben at ubam nonolok ane tul ulug enele sahaltukmu holuhun fug.

⁴Ap suwonen ele ine roho urukmu ap san at ubam haren nanggintuk lahen ulug hiyag um teg?

⁵San tu men ari men turuk lamuhup ulug kong toho imbibahon seneg halug unggum angginon ubam aruhu fug. Tuk teg ane fahet ap inindi anggat tehonen onoluk teg lit fano teko laruk li eneg tuhuk ulug fuki roho wenggel haruk.

⁶Alem siyahon ekeyon-ekeyonen ap inindimu sarap eneptuk angge famen mun ane man ane kinangman turukon teko laruk li wereg, yi ane ti ane ap unubam atukon fano haluk teg.

⁷Aben fobik teko lahu ane fahet enepelehen ap misihen oho hiyag isaruk eleg.

⁸Homhomo ap inineyonen oho senebuk fug teg. Ininggareg war atuk sambil oho elehap tuk fug teg. Tog elman oho kel ta fug teg. Siyag ane turukon ariyen windat ta fug teg.

⁹Obog toho ari anden yet haruk latikikteg mun ane man ane pohol apma turukon fahet nindimuwen fuki roho wenggel haruk latikik. Wenggel harukmen ap ekeyen an eneg palimu welahi ulug ori winon apmayap eneptukmu asengseng haruk ulug noluk atisi.

¹⁰Anden nin yet haruk latikikon tu: Ap siyag ane turukon war atukmu aben piya sini uruk lit kinangma sal eneptuk angge famen fano ane turuk inap arimano onoluk weregma Allah wereg ambehen yanggal eneptuk lit fobik ununuk fahet wenggel isaruk eleg. Ari roho turuk angge famen alem elehen saplangge wereg.

¹¹Aben siyag ane turukon fahet folo-folo alem angginon unubam emberuk elehen nonolok ane tul perukon inowen inindimu keleg teg.

¹²Ap Allah fahet ninirim perukonen onolok ane ininggik winag harukmen teng uhanam turuk angge famen amusun toho weregma yet isarikik. Ari yet isarikik angge famen an noluk atisiyon tu: Allah olohotman enekol harukon arimano fano welamuhup.

¹³Siyag ane turuk inaben Allah olohotman enekol haruk elehen fano welamuhup fug. Ap enehuhe longgo uruk hag toho it folo-folo war atuk lamuhup.

¹⁴Alem kinang tu famen teko larukon alem elehen saplangge werehon eke misig tu: Ap ekeyen Allahn fano perukon turuk angge famen alem siyag ane turuk inap unubam alebon at ubam atuk. Ap ekeyen siyag ane turuk angge famen alem fano ane turuk inap unubam alebon at ubam atuk. Ari teko larukon oho alem elehen saplangge wereg uruk lahi.

¹⁵Ari fahet anden ap enehiyeg haruk ane wel turuk latikik. Nit Allahn peruk ane roho kinang tu fam wereg lit yabuk sat toho wituk laheyon suburu men ik men naruk lit nenehiyeg toho welamuhukon ari eneg fano perikik.

¹⁶Anden ap inindi anggar atuk ane fahet fuki roho wenggel hamin perikikteg ap kinang tu fam wereg li unukohowet hubanggowet nohuk fug angge turukon kim isaruk latikik.

¹⁷Kim isarukmen Allahn mun ane man ane kinang tu fam teberukon alem nungge fahet turuk ulug nit ap kinangmon nonoluk am fug teg lahe ulug noluk atisi. Aben alem arimano sat toho yami ruruk halug oho hiyaharuk eleg. Inindi anggat teg inaben alem arimano nit nonoluk teg lahe uruk angge famen enepeleg toho wereg.