Read Angguruk Yali PENGKHOTBAH 9 Bible Online

PENGKHOTBAH 9 - Angguruk Yali bible

PENGKHOTBAH 9

¹Fano ane turuk inap men inindi anggat teg inap men enebeyet ininggiken turukonet Allah inggik ineyonen sen enesug ane ari fahet fuki roho wenggel hamin perikik. Perikikteg Allahn indi nenesug ano, ambolmayap nenesug ano ulug enepeleg, ari obog toho fobik eneg teko lahuwen puk fug teg ulug noluk atisi.

²Ap obog toho misigmu laruk. Allahn fano peruk ane turukonet nirim peruk ane turukonet, unubabut fano reg lit puhun toho werehonet siyag angge unubam tag tehonet, Allah fahet hubu lahaptukonet lahaptuk elehonet arimano obog toho misigmu laruk. Inindi fanowon men amben siyahon turukon men misig ane eneg unubam atuk. Allah olohotman enele tem toho urukon men enekolen enele uruk elehon men hikit teg.

³Kinang tu fam alem eke hag eke hag teko laruk angge famen mun angge man angge obog toho misigmu larukon ari siyag. Ap onoluk wereg li nonolok ane tul perukon inindimu keleg teg lit ket-ker ane fahet eneg wenggel harukmen eneg war atuk.

⁴Ap sa oluk wereg lit folo-folo siyag aruhuk fug peruk. Mene oluk werehon palimu regma olomene warehon apma reg.

⁵Ap onoluk werehon fobik war amuhuk ulug onoluk teg. Ap warehon mun ane man ane fahet enepeleg toho wereg. Ap onoluk werehonen yabuk witukmu onggo og isaruk hag toho it warehon og isa fug angge ununuk oho wenggel isaruk eleg.

⁶Enebe war atuk lit onori inindi enesug aneyet inirim haruk aneyet unundama ahe laharukonet ambiyeg war atuk. Mun ane man ane kinangma teko larukon yet ha fug angge mondabi teng uhup.

⁷Nori, henehiyeg toho wereg lit suburu men ik anggur ahaluwe men naruk lamek! Allahn siyag puk fug angge ahiyeg hahu.

⁸Henehiyehen amben fano angge henebene lahaptuk lit sum fanowon wan toho welamuhup.

⁹Allahn sat ilamna og hisarukmu kinangma il horog toho honoluk welamuhup angge re likiya hupmu hunuhesi hinindi enesug lit henehiyeg toho welamuhup. Yabuk sat toho wituk lahebon onggo we ita.

¹⁰Yabuk hiren wituk lahebon obog toho hinine roho wituk lamuhup. Fobik ap warehon wereg ambeg kuhupteg yabuk wituk ane men, inindi anggat teg lit fuki roho wenggel haruk ane men, onoluk atuk ane oho eleg laruhu.

¹¹Kinangman teko larukmu yet haruk latikikon eke re tu: Ap pupu angge larukon eneg tam atuk eleg. Tog aptuk lit onolok toho turuk inap eneg palimu atuk eleg. Inindi anggat toho wereg inap eneg suburu anggolo naruk eleg. Fuki roho wenggel haruk inap eneg enenggengge anggolo wereg eleg. Alem obog toho onoluk inap eneg ununuk palimu wereg eleg. Alem siyahon inam atuk li ap obog toho unubam am teg.

¹²Nosambil inam aruhu ulug ap obog toho enepeleg. Ikan pikit laruk lahi perukmen sum fam yuhar atuk. Suwe kolo ke laruk lahi perukmen yebangge elma kuruk. Ari hag toho ap oho tu sambil siyahon nunubam aruhu ulug enepelegman alem eke hag eke hag unubam atuk.

¹³Anden ap kinangmonen turuk ane yet isarukmen ap indi anggat tehon eke weregma yet harikik. At inowen alem suwon tuk teg lalep perikikon tu:

¹⁴At ibam pumbuk tot tegma ap oho tor angge welatusa. Weregma ap suwon unuk palimuwon ekeyen o ino ilmig tahuk ulug waharisireg waling enesug lit kinang andog toho lahabil lahalug elehet pila ririsi.

¹⁵Pila ririsireg weregman ap ino anggengge elegman indi anggat teg lit o pumbuk ino windatep angge famen nenere anggengge elehon tuwen nit let nenebuk teg ulug ap misihen oho wenggel harisi fug.

¹⁶Wenggel harisi fugmu anden nele uruk lit, ”Ap inine roho wereg ane ari apma regma inindi anggat teg ane palimu reg,” irikik. Irikik angge famen ap indi anggat tehon ino anggengge elehen aben ninirim peruk lit ele holtuk latusa fug.

¹⁷Ap indi anggat tehonen ele apma roho urukmu holtukon ari fano. Ap ine roho werehon ekeyen ele ahako roho uruk lit umalikisi inindi sohu rehon enele abilir eneptukon ari siyag.

¹⁸Ap inindi anggar atuk ane palimu regma minggin tog apma reg angge famen siyag ane turuk ahun misihen eneg mun ane man ane fanowon siyahap tuk teg.