Read Angguruk Yali KIDUNG AGUNG 1 Bible Online

KIDUNG AGUNG 1 - Angguruk Yali bible

KIDUNG AGUNG 1

¹Hun Salomoen sini mondabi fanowon milalfag ane suwesingga tu fam hahareg lit wereg.

²Nimiyon, an nolohotma top toho hi nabik ma! Haren hindi nasug lahen ane men hele anggur ahaluwe men wirim teg eleg.

³Amben fano angge hebene are regma hat hunuk oho kim-kim amben hag toho werehen hiyap tuhumon obog tohowen hat fahet inindi naruk.

⁴Hat an nowe welahenon, haren an hondog naplug nunuyug ilaluwe roho lulteg hibam kul. Hibam wereg lit nit hat fahet nenehiyehen yunggultuk lamul. Hindi nasug lahen ane palimu regma anggur ahaluwe apma reg ulug wel haptuk lamul. We tem toho hiyap obog tohowen hat fahet inindimuwen naruk.

⁵Hilani umalik o Yerusalem welahebon, an nahap sum singon Kedar inaben o sabo wituk asum hag teg angge famen an norohole sum fanowon hun Salomo ibam werehon hag toho welahi.

⁶Mo olokonen yet niyarukmen eneg an nahap sing atisi angge re an kim niya fug. An noriyen an fahet onolok haruk lit nit niniyabuk hele anggur yaho ambeg arimano foroho laruhun ulug hiyag nutusa. Hiyag nutusa ane roho it iniyabuk foroho latikik ane ariyen an ninggareg niyabuk embeserikik.

⁷Hat anden nindi hasug lahiyonen hambohom kema og eneplug laruk lahen? O unukoho it kel tawag ulug o kema laruk lahen, hiyag nimin! Nungge fahet anden hat yami hapmin ulug hat hori enembohom seheli ke la wam turuk latmin?

⁸Hiyap tuhumon sehelimu hat eneg horohole fanowon welahen. An lahi ambeg hapeleg toho welahen halug hat hambohom og eneplug laruk lit an nambohom unuyug pal enebil lamihinteg an notsiyen nambohom foroho lit o sabo wiroho weregma hambohom men welatihip.

⁹Nehe nindiyon, wam kuda heyon Mesir inap onowe suwonen tohon men wirim haptuk lahi.

¹⁰Horoholeanggen fuma-fuma haliliyangge lahabe felug hanggolopma ile wirili wan teg lit fano anggolo welahen.

¹¹Umbagpag turuk angge emas fam hisanggomangge wiri felug perak ili rurukon fam ilembani hahon wiroho po rubul.

¹²An nowe ibalma yinggigmu ahaluwe an nebene are rehonen amben fano turuk.

¹³Nindiyon ino namigmu yinggig lit pingga amben fanowon hag toho turuk.

¹⁴E owil hele anggur yatuk ambeg o En-Gedi werehonen amben fano turuk hag toho an nindiyonen oho turuk.

¹⁵Nehe nindiyon, hat horohole fano welahen. Hilanggen suwe yalma hag teg lahen.

¹⁶Nindiyon, hat hahap fano anggolo reg lahen. Sipsibi sukuwon fam ambiyeg yinggig lamul.

¹⁷E sahi aruma nit ninibam uwag weregma e mur inggik ariya ungga wereg.