Read Angguruk Yali KIDUNG AGUNG 2 Bible Online

KIDUNG AGUNG 2 - Angguruk Yali bible

KIDUNG AGUNG 2

¹Owil-owil angge o Saron tonggoma wilibihon sehelimuwon an misig eneg welahi. Walahen owil farema werehon hag toho welahi.

²Alog-alog angge sehelimu walahen owil wereg hag toho an nehe nindiyon hiyap winon sehelimu wereg.

³Sawe e faremon sehelimu wereg hag toho an nindiyon ino ap kabini winon sehelimu wereg. An nahiyehen e ino alman kel taruk lahi. Anggen unduk fanowen naruk lahi.

⁴Aren an hondog naplug ap enehiyeg toho yunggultuk ambeg lahareg anden nindi reg lahiyon tu ulug enehangge nubam embehek.

⁵At fahet nindi naruken ouk waruk lahireg hebeloho nine atminen kin ahaluwe men sawe anggen men og nirik watlihipmu namin.

⁶At inggik hareyonen nunggul leko nohoruk lit inggik pikironen mako pug nasug.

⁷Hilani umalik o Yerusalem welahebon, an men nindi reg lahiyon men fano roho nohoruk lahereg elel nenebuk fug. Ninindi roho welahe ane uwanma nit horogma wam fug. Ari fahet hiren mene faremon aben elel eneptuk elehon fam wenggel haruk lit henele tem toho ilihiben heng heneptuk lahi.

⁸Holeg lamek! Nindi anggen tehon ino waharuk. Punu ke hik tombo lahabil waharukmu yet homok!

⁹Mene kabiniyon uyug ilaluwe roho larukon hag toho nibam iraham wahareg selma unduhuk lit keyenteg ele keyen kilap niyalug

¹⁰an nubam ele uruk. Nehe, horohole fanowon, in atug an men ambiyeg lulen ma!

¹¹Osit naruk li obog atisimu

¹²farema owil-owil angge fanowon wilip atuk lit anggenman suwe enele lusing-lasang irikim ap enehiyehen sini yunggultuk li ak tehek.

¹³E ara anggen ahilhil turukmu hele anggur owil amben fano ruruk. Nehe, horohole fanowon, in atug an men ambiyeg lulen ma!

¹⁴Suwe yalma kiling elma hirag atukon hag toho welahen. Hat horohole fanowon yet hiyaminteg hele fano roho uruk lahenon hol haminen wilibig watmihin.

¹⁵An niyabukmu hele anggur arimano owil turukmu pak seheluhen siyahap tuhup tohon ulug sen enebiyok!

¹⁶Nindi reg lahiyon ino anden ngi reg lahi, aren an ngi nasug. Aren eneg e walahen owil sehelimu ambohom hondog eneplug waharuk.

¹⁷O uwan sakan tik oho lit hil yinggirukmu hat nindi hasug lahiyon mene kabiniyon punumu werehon hag toho laruk lit an niraham watmihin.