Read Angguruk Yali KIDUNG AGUNG 3 Bible Online

KIDUNG AGUNG 3 - Angguruk Yali bible

KIDUNG AGUNG 3

¹Hubanggo an nohoruk ambeg yinggig lit at anden nindi reg lahiyon ino yami ruruk latikik angge famen hiyaharikik fug.

²An in atminteg o pumbuk walinggoho laruk lit nindi reg lahiyon ino kebunggalem ke oho silimu oho yami ril lamin perikik angge famen hiyaharikik fug.

³Yet harikik fureg larukmen ap o pumbuk ino foroho inap men salkal urukukteg anden it unubam, ”Nindi reg lahi ahun ino hiren yet hehep ano?” ulug kapal isarikik.

⁴Kapal isarikikteg it embeselug il misig eneg larukmen at ino hiyaharikik. Hiyaharikikteg an numbahalug lahu rohon ulug ninggiken at seneko walug nibam larikikteg hili indag napfag ambeg kurukuk.

⁵Hilani umalik o Yerusalem welahebon, an men nindi reg lahiyon men fano roho nohoruk lahereg elel nenebuk fug. Ninindi roho welahe ane uwanma nit horogma wam fug. Ari fahet hiren mene faremon aben elel eneptuk elehon fam wenggel haruk lit henele tem toho ilihiben heng heneptuk lahi.

⁶Yet homok! Ap eke lekman waharuk lit kinang ahe hubu muhul hag toho lahabil waharuk. At waharukon walinggoho pingga men kami men e ahaluwe aben ayeg waroho hilarukon menen amben fano rurukmu waharuk.

⁷Hun Salomo paya roho walug waharukmu yet hemek! At men Israel inap sehen senehon en eneptuson enebe teng piren waharuk.

⁸It tog aptuk ane onolukon wal tanehen karog enelunggu ke pug teg lit ap seliyonen hubanggo unusul ulug waharuk halug oho hebeloho unusuk teg.

⁹Hur atuk angge paya roho walug larukon ino ap suwon Salomo inowen e sahi tom Libanon famen seng turuson fam wiri ferisi.

¹⁰Uwag walinggoho unduhukon arimano ili ruruk angge perak fam wirigmu ambol timi roho hur atuk ambeg umbagpag turuk angge emas fam wirihon wereg. Hur atuk ambeg ino hilani umalik o Yerusalem werehon arimano inindiyen mut paloho urusa asum fam hililip toho lombog teg.

¹¹Hilani o Yerusalem welahebon, hinibamen wilip atuk lit ap suwon Salomo ino yet halihiben maniyek! Indi ahiyeg toho hiyap hilaruk sambil isingan aliliyangge unggulmu lahabehekon wan teg lit waharukmu yet hemek!