Read Angguruk Yali KIDUNG AGUNG 4 Bible Online

KIDUNG AGUNG 4 - Angguruk Yali bible

KIDUNG AGUNG 4

¹Nehe nindiyon, hat horohole fano anggolo welahen. Hilanggen sum fam salehon ariya suwe yalma il hag teg. Hat horuk wam kambing onoruk singon tom Gilead famen luhaloho wamburukon hag toho wereg.

²Hayeg ariya wam domba onoruk ket paloho ik umatuk ambehen king toho laharukon hag toho wereg. Wam piren unumalik hag toho ut toho wereg lit misig oho alindik teg eleg.

³Hambilik firi reg lit hekel suwaleg mut palehon hag teg. Horoholeanggen sum fam salehon ariya sabohi huluwon hag toho wereg.

⁴Hanggolobag o yaron hun Dauren witfahon hag toho lahabeg. O ino ubahat fene tog piyabangge teng-teng angge po reg hag toho hanggolopma ilembani ilang aho-aho angge wan teg lahen.

⁵Hag ariya mene umalik piren owil-owil angge sehelimu ying aptukon hag toho wereg.

⁶O uwan sakan tik oho lit hil yinggirukmu an hambeg watminteg punu amben fano turukon alma welatmin.

⁷Nindiyon, hat horohole fano anggolo weregma siyahon tor angge oho hebene wereg eleg.

⁸Nehe nindiyon anden og hapmin peruk lahiyon, an men welamulen tom atelman wambik ma! Tom Libanon famen ambiyeg wambul. Tom Amana men Senir men Hermon famen wambik watmihin. Olomeneyen ei wirig ambeg embeselug an niraham watmihin.

⁹Hili nehe anden og hapmin peruk lahiyon, hat hilen an kim niyaruk lahenon fahet an nindimu naruk. Ilembani hanggolopma wan teg lahenon yet haruk lit nindi pong-pong angge ruruk.

¹⁰Haren hindi nasug lahen ane ariyen an nindi nahiyehap naptuk. An mako pug toho sen nasug lahen ane ari men hele anggur ahaluwe men wirim teg eleg. Amben fano angge hebene are rehon ino amben obog toho winon emberimu wereg.

¹¹Nindiyon anden og hapmin peruk lahiyon, hambilikmuwen ag owe men kin ahaluwe men wamburuk. Hasum e sahi tom Libanon fam werehon amben fano ruruk hag toho ruruk.

¹²Nehe anden hilamin peruk lahiyon ari yabuk elehet walinggoho ohowon hag toho wereg. Ik eleruk abilit larehon hag teg.

¹³Yabuk ino fam sawe anggen unduk fanowon men yuwe men e ahaluwe amben fanowon men

¹⁴el men kami, pingga, kim-kim, soklum, kilibim amben mondabi fano angge eke hag eke hag wilip atuk.

¹⁵Ik eleruk tom Libanon famen ulung-ulung wambik waharuk lit yabuk ino ahaluweyap turuk.

¹⁶Homhomo ik eleruk filen wamag! Homhomo ik ambut filen oho watmisi. An niyabukmu fu ruruk lit amben fanowon o kema-kema walug lalusa. Nindi anggen tehon ino yabuk aren tohon aru fam wamag. Anggen unduk fanowon aruma na wamag.