Read Angguruk Yali KIDUNG AGUNG 5 Bible Online

KIDUNG AGUNG 5 - Angguruk Yali bible

KIDUNG AGUNG 5

¹Nehe nindiyon anden og hapmin peruk lahiyon, yabuk aru an atmin ulug wahi. Wahireg e anggen amben fanowon eke hag eke hag werehon tahan tamin. Kin altap men ahik men hele anggur ahaluwe men ag owe men namin. Nori, hiren oho anggur ahaluwe narukmen eneg hinindimu naruk ane ariyen nenek turuk hag toho welatihip!

²An nohorikik angge famen nindimu wenggel-wenggel turukmen nindi anggen tehon inowen an nibam sok kik tirisi. Nehe nindi hasug lahiyon, hat suwe yalma welahenon, sok hut nabin! Hubanggo waharuk lit hibilil nunggulmu suknoho wahi irisi.

³An nasum nonggolihireg nungge fahet nin hebeloho wan timin? Nuyug ik umarihireg nungge fahet nin hebeloho ulmu sopmin? ulug hiyag itikik.

⁴Hiyag itikik angge famen nindi anggen tehon inowen ninggarehen sok husimin ulug inggik keyenteg ele keyen kilabe ferukmu yet harikikteg an nindi pong-pong angge ririsimu

⁵an in atikikteg nindi anggen tehon ino sok hut itmin ulug sok husuruk angge ino seneg lit kim harukmen an ninggik ahaluwe amben fanowonen keleg teg latisi.

⁶Sok ino husurikikteg yet harukmen nindi pulmuwon ino larisi. An numbahalug larisiyon fahet nindi eleg atisi. An wilip atikikteg yami ril larikik angge famen hiyaharikik fug. Anden wol turuk latikik angge famen hebeloho ele irisi fug.

⁷Ele irisi fugmu an larukmen ap o pumbuk ino foroho inap an men salkal urusareg an mep toho nuwatuk lit nasum selmon hog toho hilarusa.

⁸Hilani malik o Yerusalem welahebon, hiren an nindi pulmuwon ino hiyahakup halug hiren nungge ane at hiyag umuhup? He ino hat fahet indimu naruk ane ariyen ouk ubam atisi ulug at hiyag umuhuben tem toho heneyeg umen iyok!

⁹Hiyap tuhumon enesehelimu we hat eneg horohole fano reg lahenon, hat hindi pulmuwon ino ap winon hiyaben inindi enesuhon enemberimu werehen haren ari ulug hiyag nesehen ano? Nungge fahet hat hindi anggen tehon ino men ap winon men wirim teg eleg?

¹⁰An nindi anggen tehon ino ahap hulu reg lit ebe abirangge umbagpag turuk. Ap teng obog sehelet obog sehelimu at palimu wereg.

¹¹Orohole umbagpag turuk angge emas mondabi fanowon hag toho wereg. Oruk suwaleg lit suwe puwali oruk hag toho sing teg.

¹²Ilanggen suwe yalma ik ayegma hur atukon hag toho wereg. Ayeg ag owe hag toho yanggo reg lit ut toho weregma misig oho alindik teg eleg.

¹³Oroholeanggen amben fano angge yatuk ambeg hag toho weregma panisung wilibig lit kami amben hag turuk. Ambilik walahen owil hag tehon famen pingga ahaluwe fanowon wamburuk.

¹⁴Inggik ine reg lit emas umbagpag turukon hag toho weregma sohomangge helep ili faya rurukon topno rehon wan turuk. Ubahare ino wam gajah andimbuk helep piyanu paleg hahonen keleg tehon hag toho wereg.

¹⁵Uyug te uwag helep yanggowon ili rurukon umbagpag turuk angge emas fam hutuk teberukon hag toho wereg. At ebe abirangge e sahi tom Libanon fam werehon hag toho yat toho laharuk.

¹⁶Ambilikmu unduk fano angge forohoma mun angge man angge ebene werehonen an nindi nahiyehap naptuk. Hilani umalik o Yerusalem welahebon, ari hag toho an nindi anggen tehon ino wereg.