Read Angguruk Yali KIDUNG AGUNG 6 Bible Online

KIDUNG AGUNG 6 - Angguruk Yali bible

KIDUNG AGUNG 6

¹Hiyap tuhumon enesehelimu hat eneg horohole fano reg lahenon, hat hindi anggen tehon kema fil laha? Nit men hat menen at yami rik lulen hiyag nisimin.

²Nindi pulmuwon ino at iyabukmu wahareg amben fano angge eke hag eke hag werehon somug haruk lit walahen owil tahanoho hilaruk.

³Nindi reg lahiyon ino anden ngi reg lahi, aren an ngi nasug. Aren eneg e walahen owil sehelimu ambohom hondog eneplug waharuk.

⁴Nehe nindiyon, hat horohole fanowon o pumbuk Tirza fano wereg hag toho welahen. Hat umbagpag turuk lahenon o Yerusalem umbagpag turuk hag toho welahen. Ap sehen senehon tog silimu mondoko waharukmu aben yet isaruk lit inindi pong-pong angge ruruk hag toho anden oho hat horohole fano reg lahenon yet hiyaruk lit nindi pong-pong angge ruruk lahi.

⁵An nindi yukap nabehen ha nowen hat hil fanowonen kim niya fug. Hat horuk wam kambing onoruk singon tom Gilead famen uluk toho wamburukon hag toho wereg.

⁶Hayeg ariya wam domba onoruk ket paloho ik umatuk ambehen king toho laharukon hag toho wereg.

⁷Horoholeanggen sum fam salehon ariya sabohi huluwon hag toho wereg.

⁸Ap suwon eke uhesi teng piren, hiyap fobik hilarukon teng hinahan weregma hilani malik enebe teng-teng angge aben winag isa fug toho at iraham wereg angge famen

⁹anden at misig eneg nindi reg lahi. At suwe yalma werehon ino isingan we misig eneg indag tarisireg indi rehon wereg. Ap suwon uhesi men hiyap fobik hilarukon men hilani malik at iraham werehon menen hiyap anden nindi reg lahiyon ino yet helepteg it obog tohowen at hi ruruk lit sini yunggultuk lalep.

¹⁰Mo ket lahik waharukmu ahilhil turuk hag toho turuk hiyap ino sa wereg? At orohole ino pikalem funumu hag toho wereg lit mo asinandi umbagpag turukon hag teg. Ap sehen senehon tog silimu mondoko waharukmu aben yet isaruk lit inindi pong-pong angge ruruk hag toho niren oho hat horohole fano reg lahenon yet hiyaruk lit ninindi pong-pong angge ruruk lahe.

¹¹An yabuk sak yatuk ambeg wambirikikteg e ik ayegma werehonen asimit sililim tirikim hele anggur arimano ininggik wilibigmu e anggen narukon owil turukmu yet ha larikik.

¹²Larikikteg an nindi inahan haruk lit weregman keman wahileg keman wahileg an lisoho og naptusareg wam kudan lisoho walug laruk angge emberimu numbaharusama an nindi pulmuwon ap suwon ino iraham heriyeg lit laruk latukuk.

¹³O Sulam hiyap welahenon, yunggulin, yunggulin! Niren hat yet huyulen telim tin, telim tin! Nungge fahet an ap iniline yunggultukmu yet nuyul peruk lahep? An yunggultuk latmin fug.