Read Angguruk Yali KIDUNG AGUNG 8 Bible Online

KIDUNG AGUNG 8 - Angguruk Yali bible

KIDUNG AGUNG 8

¹Hat an nowe wereg lit an nisinga ag owe nelen halug fano! Ari halug an kalemma larukmen hat men salkal uruk lit anden hat ap iniline mako pug toho hi haplema aben pet naplep fug.

²Anden hat hondog haplug nisinga ibam lelema haren an milal naptukmu anden hele anggur ahaluwe men anggen anden tohon ahaluwe men hinang hetle.

³Hat hinggik hareyonen nunggul leko nohoruk lit hinggik pikironen mako pug nasug lalen.

⁴Hilani umalik o Yerusalem welahebon, an men nindi reg lahiyon men fano roho nohoruk lahereg elel nenebuk fug. Ninindi roho welahe ane uwanma nit horogma wam fug.

⁵Yet homok! Hiyap sa ap indi rehon ubam timi roho laruk lit lekman waharuk? E sawe alman hat hisinga ahummu atik inag. Hat e ino alman nohorukmu anden elel habihi.

⁶Enehangge hat hunuk haharehon ino hamigmu foroho lahen hag toho an oho hat hindimu fet nasug laruhun. Sohomangge hinggikmuwon hog toho umbusuk fug angge wan teg lahen hag toho an eneg hindi niyaruk laruhun. War atuk ane ino ine reg hag toho ap hiyap inindi enesug ane ari mondabi ine reg. War atuk ane ino ap misihen oho apmayap tuk fug teg hag toho nit-nit ninindi roho welaheyon eleg am fug angge indok ambulpul hag toho ulog turuk.[1]

⁷Ik anggolo hilil isarukmu oho it-it inindi roho wereg ane indok ambulpul turukon ari war atuk eleg. Ik fu waharuk lir oho walug la fug teg. Ap ekeyen mun angge man angge inggikmu werehon fam it-it inindi roho wereg ane ari ayeg waroho hilamin pelep halug aben at ino pet turuk lit inggaliyap telep.

⁸Nonot ebe tot teg lit ag uwan wilip am fugmu ap ekeyen hilahuk ulug elenggen kuhu sambil ino niren nangginoho foroho lamuhuk?

⁹Nonot ino o elehet walinggoho ohowon hag toho welaruhu halug niren elehet ino emberimu o yaron ili ruruk angge perak fam wiri fuhuk. At ino sok husihon hag toho welaruhu halug e sahi ahep fam lare fuhuk.

¹⁰An tem toho o elehet walinggoho ohowon men wirim teg lahimu nag o yaron piren hag toho wereg angge famen ketiya an nindi reg lahiyon elehet ino pisan toho kukag ulug hiyag utuk lahi.

¹¹Ap suwon Salomo ino o pumbuk Baal-Hamon horogma hele anggur yatuk ambeg ngi reg. Yabuk ari aben hilahup tohon fano foroho lamuhup ulug otsi hiyag isarisi. Forohowon fahet otsi wal taneg onggo uang inggila teng sabiren inikniyen og isarukmu anggur anggen anggolo tahan tarukon fahet uang inggila teng-teng angge inikni og utuk. Uang anggolo arimano hun Salomo otsi menen fano hilawag. An eneg niyabuk anggur yaho ambeg ino ninggarehen seneg lahi.

¹³Nehe nindiyon, hat yabukmu welahenon, an noriyen oho holegma haren hele hi roho uruk lit wol napmihin.

¹⁴Hat nindi anggen tehon mene kabiniyon hag toho laruk lit huyug ilaluwe roho punumu amben fano angge eke hag eke hag weregma lahik watmihin.