Read Angguruk Yali YESAYA 1 Bible Online

YESAYA 1 - Angguruk Yali bible

YESAYA 1

¹Ap suwon Uzia, Yotam, Ahas, Hizkia men wal tanehen Yehuda inap fet enesug latfag li Allahn Yehuda inap men Yerusalem inap men unubam teko lahu ane fahet hun Amos amloho Yesaya fulu roho hiyag utuk latfag ane suwesingga aru fam haharoho imbibag.

²Pohol men kinang menen holeg lamek! NINIKNI Allahn ele urukon tu, ”An numalikisi fano su amag ulug fet enesug latikik angge famen it arimanowen An enembol yig nutuk latusa.

³Wam sapiyen nikni tu ulug indi anggat tegma wam keledai inowen oho ikniyen suburu og utuk ambeg oluk teg angge famen numalikisi Israel inap inindi sohu roho wereg lit An Inikni fahet enepeleg toho wereg.

⁴Hit Israel hinaben siyag ane eneg turuk lahebon ariyen alem anggolo hunubam weregma siyag amuhup! Indamen tulug ketiya oho honolok ane eneg turuk lit hunubabut siyag toho welahep. An HINIKNI Allah henembol yig nutuk lit Israel hinap Hinikni suwon umbagpag turuk lahiyon numbahalug apmayap naptuk latikip.

⁵Nungge fahet hiren An nele ying naptukmen eneg welahep? Hit hununggulmu yowilangge anggolo weregma hinindi obog toho ouk turuk angge famen hit hinindimuwen alem angginon nin eke nunubam emberuk lit nunuselep peruk lahep?

⁶Hununggulmuwen hunuyug anggulmu ouk eleg ambeg wereg eleg. Hit henebene yowil ket hunusuruk ambeg men pot men salukangge men anggolo regma ap misihen puhun tuk fug angge, tag angge ruk fug angge ahaluwe fanowon yowil fam emberuk eleg.

⁷O pumbuk Yehuda kinang fam werehon arimano harep pisako olunap teberusa. Hit honolohotman ap o winamonen hit henengginang famen wilip atuk angge naruk. Indam o Sodom siyahap tiyagma olun atfag hag toho[1] hit henengginang Yehuda ino oho mondabi siyag atisi.

⁸O Yerusalem amu eneg uwan siyahap tuk fugmu ap seliyonen walinggoho kilap enesugmen Yerusalem inap inine eleg atisimu o pumbuk aru o sabo yabukmu siyag toho wirihon men, wiramna kilaptuk lit nohoruk ambeg men hag toho wereg.

⁹NINIKNI Allah pohol ha kinang ha senehon inowen ap we tor angge welaheyon itano nunumbahalep fugmu o Sodom inap, Gomora inap men siyag atfag hag toho nir oho siyag ala.

¹⁰O Yerusalem hinap honowesi men Sodom Gomora inap hag toho welahebon, NINIKNI Allahn ele urukon holeg lit At inowen komo neneptuk ane wenggel haruk lamek!

¹¹NINIKNI Allahn ele urukon tu, ”Nungge fahet An nolohotma wam anggolo waroho yaltuk lahep? Wam domba men wam sapi umalik sei men An fahet yaltuk lahepma nirim peruk lahi. Wam domba men kambing men wam sapi ap angge enemep An fahet emberuk lahebon ari Anden siyag peruk lahi.

¹²Hiren Allah fam sembahyang ul ulug waharuk lit mun angge man angge Allah fahet emberukon hininggikmu seneko walug waharuk lamuhup ulug ap san hiyag hisarisi? Ap san hiyag hisarukmu An nibam iraham ke hunuyuhen sobik waharuk lahep?

¹³Hiren Allah fahet umbul ulug walug waharuk lahebon arimano saplangge imbik waharuk lahepma walug waharuk lamuhup fug! Hiren amben fano angge peruk lit yaltuk lahebon arimano amben siyahen me nape naptuk. Pikalem keron inam atukmu sembahyang uruk lahep ane men, o Sabat wene ul ulug kel taruk sambil turuk lahep ane men, mo ilig am wirig am turukmu henehiyeg toho palu ruruk lit An nolohotma yunggultuk lahebon men, Anden yet hisaruk lit nirim haruk lahi. Ari roho turuk lit siyag ane til-wil laruk lahebon ariyen alem angginon An nubamap naptuk lahepma Anden sat haruk lit ha ruhuk fug peruk lahi.

¹⁵Hiren An nubam sembahyang uruk lamuhup halug oho Anden hininggikmu mep anggolo werehen henele holtuk laruhuk fug.

¹⁶An nolohotman siyag ane turuk lahebon eleg amag ulug henebe puhun toho umag taruk lamuhup! Honolok ane turuk lahebon embeseruk lit

¹⁷fano ane milal taruk lamuhup! Alem weregma fano roho haltuk lit aben apmayap eneptuken inine eleg toho werehon arimano let eneptuk lamuhup! Malik suwarehon ili og eneptuk lit hiyap yuwohon unubam unggum weregma inibil atuk lamuhup!

¹⁸NINIKNI Allahn ele urukon tu, ”Alem hunubam werehon ino haltulen maniyek! Hiren siyag ane eneg turuk lahebon ariyen siyag angge hunubam tag tegma hiren Allahn puhunap neneptukmu hina yanggowon hag toho amuhuk peruk lahep?[2] Niren siyag ane anggolo roho turukmu Ninikniyen ambolma umbusuhu peruk lahep?

¹⁹Hiren An nele holtuk lamuhup halug henengginang famen wilip atuk angge arimano fano naruk lamuhup angge famen

²⁰hiren An nele sobir isaruk lit henembol yig nutuk lamuhup halug tog elman hunusuruk lamuhup. An HINIKNI Allahn we tik-tem toho nele aru hiyag hisaruk lahi.”

²¹O Yerusalem hinap atam hinindi wirik toho Allah fam wenggel haruk latikip angge famen ketiya hiyap yaying turukon hag toho welahep. Atam hit-hit let-ler atuk lit alem weregma fano roho haltuk latikip angge famen ketiya wat-war atuk lahep.

²²Hit atam ili ruruk angge perak fanowon hag toho welatikip angge famen ili ruruk eleg angge hag atikip. Hit atam ik anggur ahaluwe unduk fanowon hag toho welatikip angge famen ik il yuhunon hag atikip.

²³Hit honowesi fet henesuhon arimano yoholiyangge waruk inap men mangno atuk lit An nele ying naptuk. Ninibil amag ulug uang og isarukon fahet it obog toho arimano enehiyeg haruk lit onggo og nisawag ulug mug eneplug laruk. Iren malik suwarehon ili og enebuk fug angge hiyap yuwohon unubam unggum werehon fuki roho yet isaruk eleg.

²⁴Ari fahet NINIKNI Allah pohol ha kinang ha senehon Israel ninap ine roho fet nenesuhon inowen ele urukon tu, ”Hit An men seli roho welahebonen An nele ying naptuk ane fahet ayeg waroho hunusuhuk.

²⁵Hit hunubam alem werehon fahet Anden tuhuk ane tu: Siyag ane turuk lahebon ariyen sing angge hunubam tag tehon Anden puhun tebesuhuk.

²⁶Anden alem kong turuk inap men, ap komo eneptuk inap men, atam welatuson hag toho nin eke og hisahukmu o Yerusalem unuk salikap toho ’Ap inindi wirik toho Allah fam wenggel haruk lit let-ler atuk ambeg’ suwaluhup.”

²⁷Yerusalem inap Allah alukema hebeloho wamuhup halug alem unubam werehon NINIKNI Allah ap let eneptukon inowen haloho emberuk lit windat enebuhu angge famen

²⁸ap siyag ane eneg turuk lit NINIKNI Allah enembol yig utuk inap arimano enebe mangno roho siyag amuhup. NINIKNI Allah ele embeseruk inap mondabi eleg amuhup.

²⁹Usa ahen wel turuk lahebon men, yabuk usama ulug wituk lahebon men fahet we tik-tem toho hininggali hahup.

³⁰Hit e suwon famen inggila halo urukon hag toho welamuhup. Hit kinang ik ahaluwe eleg atuk ambeg hag toho welamuhup.

³¹Hoholangge lilohon fam indok antingtingnaha paloho lalug naruk hag toho ap inine roho werehon arimanowen siyag ane turukon ino famen ininggarehen ilimangge kilap talug siyahap tarukmu ap misihen oho windat enebuk fug teg lamuhup.