Read Angguruk Yali YESAYA 10 Bible Online

YESAYA 10 - Angguruk Yali bible

YESAYA 10

¹Fano ane turukon siyag amag ulug alem kong toho emberuk inap siyag amuhup! Alem kong toho emberuk ane hareyap turuk lit ap unubam un ane imbil laruk inap arimano eleg amuhup!

²Allah umalikisi sehelimuwon enenggengge elehon asengseng harukon unggum kong turuk ambehen miyal eneptuk lit hiyap yuwohon enenggengge yoholiyangge hilil malik suwarehonen tohon hirag til laruk.

³Mun ane man ane alem obog toho kong tuhu sambil ino hiren nangginuhup? Siyelu yatman hunubam waruhumu hiren henenggengge anggolo walug la fuhon ino kema embeselug laruk lit let nenebin ulug ap sa ambeg lahup?

⁴O kema-kema laruk lit wilip amuhup fug angge famen hit winon hininggik hele waroho hunumbahik laruk lit winon pinggi hunusuhup. Ari obog toho teko lahu angge famen numalikisi unusimin ulug Allahn inggik imbik wambuk fug angge lehoman eneg welaruhu.

⁵Allahn ele urukon tu, ”Aben sabiyap alem fam watuk hag toho Anden nirim peruk lahiyon unusukag ulug Asyur inap mingming eneptikik. Aben wanggun fam unusuruk hag toho An noloken ap huluwap eneptikikon arimano unusik wamag ulug wenggel harikik.

⁶Ap An numbahalug hare ane turukon siyahap enebukag, nolok ane unubam tuhuk peruk lahiyon enenggengge hilahupteg aben sabelep pisal-pasal isaruk hag toho unuyuhen sobir-sabar isawag ulug Asyur inap arimano mon enebik waharikik.

⁷Ari ulug mon enebik waharikik angge famen Asyur inap onowe inowen Anden peruk lahi ane pisan isalug indimuwen wenggel haruk lit, ’Ap we tor angge siyahap enebuhuk fug, o pumbuk mondoko elehap enebik lahuk,’ peruk.

⁸Aren awelwel taruk lit, ’An notsi sehen senehon onowesi obog toho ap suwon raja wereg lit inine anggolo reg.

⁹O pumbuk ekeyon-ekeyon ilmig taruk lit o Kalno men Karkemis men senerik larikikteg o Hamat men, Arpad men, Samaria oho Damsyik oho ilmig tarikik.

¹⁰O pumbuk usangge anggolo forohowon an ninggik ineyonen apmayap eneptikik. O Yerusalem inap men Samaria inap menen usangge we tor angge forohowon apmayap eneptuk ane fahet tot teg peruk lahi.

¹¹O Samaria pumbuk men usangge forohowon men siyahap eneptikik hag toho o Yerusalem pumbuket usangge forohowonet siyahap nenebuhu fug peruk lahep ano?’ uruk.”

¹²Ari uruk angge famen fobik Allahn tom Sion men o Yerusalem men nolok ane unubam tuhuk peruk ane obog toho tubuhu halug Asyur inap onowe indi winik-wonog toho hemet til larukon ino alem angginon ubam umbuhu.

¹³Ap suwon ariyen ele uruk lit, ”Anden mun ane man ane noluk teg lit ninggik ineyonen eke hag eke hag turuk latikik. Hili o pumbuk wal-wal honggolegma werehon elehap turuk lit naruk angge forohowon obog toho huhulangge hilalug nambong se roho ap obog toho fuk-fak toho hik isarikik.

¹⁴Ap ekeyen suwe anggen ei fam lin isarukon arimano andog toho hilaruk hag toho anden ap o pumbuk wal taneg werehon enenggengge hilalug enengginang ilmig til larikik. Ari roho turukmu suwe aherabul lam turuk lit ap yanggaltuk hag toho ap misihen oho yanggal naptisi fug. Suweyen ambilik husoho ele sin turuk hag toho misihen oho ele tor angge oho irisi fug,” uruk.

¹⁵Ele hemet toho uruk ane ari fahet Allahn ele urukon tu, ”Yaha aben senehonen seneg ahun fam hat apma, an palimu welahi ulug awelwel tuk teg ano? E paltuk anggeyen hemet turuk lit e paltuk ahun ino apmayap tuk teg ano? Wanggunen seneg ahun ino pohol fil lahabuk fug teg angge famen seneg ahun inowen wanggun ino lahaptuk.”

¹⁶Asyur inaben hemet toho turuk ane ari fahet Allah NINIKNI pohol ha kinang ha senehon inowen Asyur inap enebe fit tarukon enehum humon arimano unubam suburu obok monde fuhumu enehiyeg toho wereg ane ari indok ambulpul turukonen naruk hag toho eleg aruhu.

¹⁷O ino sambil Israel ninap Ninikni Allah ebe usa fulu reg lit seleg fanowon og nisarukon ino indok ambulpul hag atuk lit misihim eneg alog-alog angge obog toho elehap tuhu.

¹⁸E ohi humon fam werehon men e anggen narukon men alemet ondomiyet obog toho siyahap tuhumu Asyur kinang ino ap war am hag ane turukon hag toho welaruhu.

¹⁹E siyahap tuhupteg we tor angge umbusuhubon arimano malik toronen oho winag isa reg laruhu.

²⁰Indam Israel inap arimanowen ili og nenebin ulug ap o winamon onowe suwon ambeg larusa angge famen aren siyahap eneptisi. Siyahap eneptisimu o misihim sambil Israel inap we tor angge onoluk welamuhubon arimano ap ino ambeg la fug angge ili og nenebin ulug Israel ninap NINIKNI Allah ambeg laruk lit inindi wirik toho we Allah ebe usa fulu rehon fam wenggel haruk lamuhup.

²¹Israel inap Yakuben ondohowonen ondohowon arimano we tor angge eneg Allah ineyon ambeg hebeloho wamuhup.

²²Hit Israel hinap ik yinggi ik saho ahik ayegma werehon mondeg hag toho welamuhup halug oho we tor angge eneg Allah ambeg wamuhup. NINIKNI Allahn Israel inap siyahap enebuhuk ulug kong toho emberisiyon ino uwag oko wa fug teg. Kong toho emberikik ane hikirap timin ulug ik fu hag toho hunubam waruhureg hiren turuk latikibon hikit toho alem angginon hunubam umbuhu.

²³We tik-tem toho Allah NINIKNI pohol ha kinang ha senehon inowen hit ap o pumbuk obog toho iniline siyahap enebuhuk ulug kong toho emberisiyon hikit toho tuhu.

²⁴Allah NINIKNI pohol ha kinang ha senehon inowen ele urukon tu, ”Numalikisi hinibam tom Sion fam welahebon, indam Mesir inaben turuk latfag hag toho Asyur inaben hunusul ulug wanggun leg haruk anggen famen hiren it unubahet henekol ha fug!

²⁵We tot welamuhupmu Anden hit hunubahet nolok haruk lahi ane eleg aruhumu Asyur inap fahet An nindimu inahan turuken siyahap enebuhuk.

²⁶An pohol ha kinang ha seneg lahiyonen indam o Oreb Ahalep irahamen Midian inap arimano aben sabiyap alem fam watuk hag toho unusiyag ane ari hikit toho Asyur inap oho unusuhuk. Indam Anden o Mesir inap war amag ulug wanggun ik ahum pali fil pog tibiyag hag toho Asyur inap oho pinggi unusuhuk.

²⁷O ino sambil e paleg angginon Asyur inaben hunumaloma imbik laharuson ino aben kong toho hik isahupmu hunubam se aruhu.” Asyur inap sehen senehon arimano o Samaria inowen wilip atusareg

²⁸o Ayat ilmig toho kurusareg o Migron keyen tulug eneseher angge obog toho o Mikhmas wep toho umbat talug laruk lit

²⁹fanggong keyen nindihig o Geba nohulen lahul ulug waharusa. Wahasa urukmu holtusareg o Rama inap arimano enekolen elek turukmu o Gibea-Saul inap linggik-longgo uruk.

³⁰O Galim hinap, nori, henele ya nga iyok! O Laisya hinap, holiyok! Anatot hinaben, hiren oho ngik-ngog turukon lahabiyok!

³¹O Madmena inap arimano hirag arik larukmu Gebim inap oho nunusuhup tohon ulug inibamen wilip atug laruk.

³²O yoho eneg ap seliyon arimano o Nob inowen unduhuk lit siyahap henebik wamul ulug ininggik tum o Yerusalem tom Sion fil pog tulusa.

³³Yet homok, Allah NINIKNI pohol ha kinang ha senehon inowen aben enekol hawag ulug ine anggolo roho turuk lit e inggik kong toho pilabil laruk. E palimu laharukon mutil e yaron horog amag ulug paltil laruk.

³⁴Ohi wilim teg ambeg karog fam muhuk fil larukmu e yaron ineyon tom Libanon fam werehon arimano At palimu werehon olohotma kinangma wambuhup.