Read Angguruk Yali YESAYA 11 Bible Online

YESAYA 11 - Angguruk Yali bible

YESAYA 11

¹E aben mutlug irat embeseruk angge famen irat ino famen asimit wilip atuk hag toho Isai amloho Dauren ondohowonen ondohowon enesehelimuwen ap suwon eke inam aruhu.

²NINIKNI Allah ahime fanowon at ubam aruhumu at indi anggar atuk lit alem obog toho oluk teg laruhu. Hime fanowon inowen ineyap turukmu alem obog toho fahet indimu fano roho wenggeltuk lit ine roho turuk laruhu. Hime fanowon inowen milaltukmu NINIKNI Allahn peruk ane fahet indi anggat teg lit At ele eneg holtuk laruhu.

³NINIKNI Allah ele holtukon fahet indimu ahiyeg toho wereg lit holtuk laruhu. Aren alem haloho emberuk lit folo-folo ilen yet harukon men ap enele urukmu holtukon men hikit toho haltuk laruhu fug.

⁴Ap inine elehon ili og eneptuk lit enengge elehon unggum unubam weregma indi wirik toho wenggel haruk lit unggum fano roho kong turuk laruhu. At ele hiyag isaruk ane roho ap siyag ane turukon pikit toho alem unubam emberuk lamuhup. At ele urukmu onolok ane turuk inap arimano pikit toho war atuk lamuhup.

⁵Aben humi pahaluk mondabi wan teg hag toho at ino indi wirik toho wereg lit ap let eneptuk ane embeseruk laruhu fug.

⁶Olomene olokon men wam domba umalik men ambimu mangno roho welamuhup, wam eli olokon men wam kambing umalik men ambiyeg nohoruk lamuhup. Wam sapi umalik men mene singa umalik men inggilangge ambiyeg naruk lamuhup. It arimano malik toron misihen fet enesug laruhu.

⁷Wam sapi men wam eli olokon men tahe ambiyeg naruk lamuhup. It unumalikisi ambiyeg walinggoho yinggig lamuhup. Mene singa olokon arimanowen wam sapiyen naruk hag toho hoholangge naruk lamuhup.

⁸Malik ag narukonen pisanggo hukalo ei wirihon horogma ahiyehen lo-lo la wam turuk lit hukalo ei wirig ambeg inggik hag tuhu angge famen malik ino inggik fato ruhu fug.

⁹Tom Sion NINIKNI Allahn ngi reg ambeg inowen ap misihen oho siyag ane tuk fug angge welamuhupmu amben siyahon haruk lamuhup fug. NINIKNI Allahn peruk ane ap obog tohowen onoluk aruhumu saho ahiken kinang keleg teg hag toho kinang atogman atogma aben onoluk teg ane ariyen keleg teg laruhu.

¹⁰Ari obog toho teko lahu li hun Isai e irat hag toho weregma asimit wilip aruhuwon ino ap o pumbuk obog toho nambeg wamag ulug enehangge hag toho unduhuk laruhu. Unduhuk laruhumu yet hahupteg ap o pumbuk obog toho arimanowen komo nenebuhuwen kapal hahuk ulug ambeg wamuhup. At yug toho welaruhu ambeg inowen seleg fanowon wilip aruhu.

¹¹O itano li Ninikni Allahn numalikisi o kema-kema hik isarusama we tor angge werehon arimano windat enebuhuk ulug nin eke inggik leho fuhu. Inggik leho feruk lit umalikisi o Asyur, Mesir, Patros, Etiopia, Elam, Sinear, Hamat werehon men ik saho ahik alonggenma werehon men suhuloho hondog eneplug inibam waruhu.

¹²An numalikisi inibam wamuhuben ap o pumbuk obog tohowen let enebukag ulug Allahn enehangge eke yaho fuhureg Israel inap o kema-kema yanggaloho pilili-palala isibahon men Yehuda inap kinang atogman atogma hik-hak isibahon men abet hiyabet nin hebeloho palu enebik waruhu.

¹³Palu enebik waruhumu Israel inap ik eleruk fil werehon arimanowen onori Yehuda inap fahet inindi siyag toho peruk ane umbusuhupmu Yehuda inaben oho Israel inap enele ying eneptuk ane eleg aruhu.

¹⁴Israel inap onori Yehuda inap men nin mangno amuhupteg suwe lam-lam laruk hag toho ik saho ahik fil lul ulug tom famen wambulug o Filistin kinang ilmig ta lahup. Lahupteg yali inap enenggengge huhulangge hilak lalug o Edom kinang men Moab kinang men senerik lahupmu o Amon inap oho enemingmingangge amuhup.

¹⁵ NINIKNI Allahn ik saho ahik Suez o Mesir kinang yali fil yenggelehon ino firihap tuhureg ik Efrat ine roho larukon ino tot amag ulug siyelu monde fik waharuk lit inggik ineyonen ware fusuhumu ik ino ahiyon sabiren aruhu. Sabiren aruhumu ap unuyug hililip angge nonggoluk fug angge ik itano paloho nindig am teg lamuhup.

¹⁶Ari reg laruhumu indam Israel inap o Mesir kinangman wilip atug laruk latfag ane fahet kalem eke yaho latfag hag toho Allah umalikisi o Asyur kinang fam hik isibahon we tor angge werehon arimano suhuloho inibam wamuhup abunggalem eke fano yaho laruhu.