Read Angguruk Yali YESAYA 12 Bible Online

YESAYA 12 - Angguruk Yali bible

YESAYA 12

¹Allahn windat henebuhu sambil ino hiren Allah wel turuk lit sini yunggultuk lamuhubon tu, ”NINIKNI Allah, Haren an fahet holok harikin angge famen ketiya holok ane eleg atisimu an onggon naptuk lahenma anden Hat wel haptuk lahi.

²We tem toho an windat naptukon we Allah eneg wereg ulug At fam nindi wirik toho wenggel haruk lit mun ane man ane fahet nakol eleg toho welahi. NINIKNI Allahn ine roho ili og naptisimu nit Ninikni At wereg ulug hi ruruk lahi,” uruk lamuhup.

³Ari uruk lit henehiyehen ik eleruk mondabi werehon famen ap fanowap eneptuk ahik hinang taruk lamuhup.

⁴O ino sambil hiren henele uhubon tu, ”NINIKNI Allahn let neneptisi ulug wel turuk lit At unuk suwap turuk lamek! Aren turuk ane fahet ap o pumbuk obog toho hiyag isaruk lamuhup. We At unuk eneg palimu wereg ulug inindi anggarap eneptuk lamuhup.

⁵NINIKNI Allahn su ane turuk latisiyon fahet sini yunggultuk lamek! Allah inowen ine roho turuk latisiyon fahet ap obog toho kinang atogman atogma werehonen inindi onoluk aruhu!

⁶Hit tom Sion fam welahebon, Israel ninap Ninikni Allah ebe usa fulu rehon ino hit henesehelimu werehen hinindimu henehiyeg toho Allah fog turuk lamek!”