Read Angguruk Yali YESAYA 13 Bible Online

YESAYA 13 - Angguruk Yali bible

YESAYA 13

¹Hun Amos amloho Yesaya inowen fulu roho yet harukmu Allahn o Babel fahet hiyag itfag ane tu:

²Allahn ele uruk lit, ”Tog abik wamuhup ulug punu lei reg ambeg enehangge eke yaho fiyek! Inindiyen tog abik lahuk perukon arimano wamuhuben henele hi roho iyok! Palu atuk ambeg sok kurukon iraham luhal arik wamuhuben hininggik manggap tiyek!

³An noloken siyahap enebuhuk peruk lahi inap unusukag ulug Anden ap enehako roho turukon mumal tarikik. Mumal tarikik inap arimanowen Allah eneg palimu wereg ulug enehiyehen An wel naptuk. Ap arimano palu arik maniyek ulug ketiya eneg wol eneptikik,” uruk.

⁴Hol hemek! Ap mondoko punumu luhaleg lit enele ngik-ngog uruk. Ap o pumbuk enele wal-wal urukon men onowesi man-man werehon men palu arik wahasa. NINIKNI Allah pohol ha kinang ha senehon inowen tog abik oho lit otsi sehen senehon arimano winag isaruk lit wereg.

⁵Otsi inibam pohol men kinang men ahandip teg ambeg yatman wahasa. NINIKNI Allahn it feneyen irim peruk angginang ino atogman atogma siyahap tuhu.

⁶Henele ya nga uruk lamek! NINIKNI Allahn alem obog toho kong tuhu sambil horog teg. Allah mondabi ineyon inowen kinang siyahap tuhuk ulug warik oho reg.

⁷At waruhumu ap obog toho inindi anggin atuken inine roho tuk ane mondabi eleg aruhu.

⁸Enekolen enemelmel toho wereg lit hiyap ekeyen malik indag tamin ulug ouken nenek turuk ane ubam atuk hag toho unubam aruhu. Tanggusi naruken inel-hanel uruk hag toho turuk lit ap obog toho enekolen lisag anggolo wilip atikim siyag amulen nanggintul ulug it-it kim-kim atuk lamuhup.

⁹We tem toho NINIKNI Allahn mun ane man ane alem obog toho kong tik waruhu sambil horog teg. O ino sambil Allah undama ahe laharukmu olok anggolo haruk lit kinang obog toho siyahap tuhumu lekma ap enele teng uruk ambeg hag aruhu. Ari roho turuk lit Allah eleg ulug siyag ane turukon indi isa fug angge obog toho elehap enebuhu.

¹⁰Allah waruhu sambil suhal wap men tuwong men umbagpag turuk ane eleg atukmu mo lahik waharukmu il kun atuk lit pikalem oho il hik aruhu.

¹¹Allahn ele urukon tu, ”Kinang ari siyahonen hondo reg lit werehen Anden kinang obog toho siyahap turuk lit Allah eleg ulug siyag ane turukon alem angginon unubam umbuhuk. An numbahalug hemet toho turuk ane men ap onolokonen winik-wonog toho turuk ane men Anden elehap tuhuk.

¹²Ari obog toho tubuhukmu ap we tor angge eneg onoluk welamuhup. Ili ruruk angge emas kinangma we tor angge eneg wereg angge famen ap kinangmon eleg amuhubon men wirim teg laruhu fug.”

¹³NINIKNI Allah pohol ha kinang ha senehon ino indimu inahan turuk lit olok ane tuhu sambil ino o mek turuken kinang hikip-hikip amumu lahumu pohol ahongge oho yuk tuhu.

¹⁴Ari tuhumu wam domba ikni elehon pilili-palala uruk hag toho ap pohon obog toho enekolen linggik-longgo uruk lit inibam onori wereg ambeg wal taneg lahup.

¹⁵Larukmen sen enebuhubon arimano karog fam unusuhup.

¹⁶Malik fuwon iniknisi inisingasi iniline ununggul arap toho unusil enenggengge inibam foroho angge huhulangge hilil unuhesi yarog enebil laruk lamuhup.

¹⁷Allahn ele urukon tu, ”Nirim peruk lahi inap unusukag ulug Anden o Madai inap arimano mumal tarikik. It arimanowen onggo fahet wenggel haruk elehen ap ekeyen ili ruruk angge perak ano emas ano og eselep halug oho Madai inaben Allah fahet tog abik lul peruk ane embeselep fug.

¹⁸Tog abik lul peruk ane umbusuk fug angge lahupteg ap kabiniyon tog fam unusuruk lit malik suwonet ag narukonet inindi isa fug angge obog toho pinggi unusuhup.”

¹⁹Ari roho turuk lit Allahn o Babilonia kinang mondabi fano reg angge famen mondabi siyahap tuhu. Ketiya o Kasdim inaben kinang ari seneg lit, ”Kinang obog toho walinggoho werehon we tot siyag tegma we nit nenengginang eneg mondabi fano reg,” ulug witnik-wetnog angge ruruk angge famen indam Allahn o pumbuk Sodom men Gomora men halog toho olunap tibag hag toho kinang ari oho siyahap tuhu.

²⁰Siyahap tuhumu ap olma werehon mondabi eleg amuhupteg ap enele teng uhup. Ap norukon arimanowen oho o sabo wiroho welamuhup fug. Wam foroho inaben enembohom kinang wawag ulug hondoko wamuhup fug angge famen

²¹wam eliyen eneg kinang ari waruk lamuhup. It inibam lin isahubon suwe kohoni anggolowen keleg aruhumu ap eleg amuhubon unubalma huhubi welamuhup. Mungguwat hik tombo lahaptuk lamuhup.

²²Inibam fanowon famen olomeneyen kuwa rurukmu it inibam ying umahayeg toho wereg ambeg lin isahubon famen mene olokonen hilak turuk lamuhup. O Babilonia kinang siyag aruhu sambil horog teg. Allahn amusun tuk fug angge kinang ari siyahap tuhu.