Read Angguruk Yali YESAYA 14 Bible Online

YESAYA 14 - Angguruk Yali bible

YESAYA 14

¹NINIKNI Allahn inilaheg ulug Israel inap hun Yakuben ondohowonen ondohowon arimano indi enesug lit numalikisi amuhup ulug nin mumal tahureg suhuloho henengginang fam lahupteg welamuhup ulug hiyag isahu. Ari ulug hiyag isahumu ap o winamon Israel inap sehelimu werehon men ininggik ahandip toho welamuhup.

²Ap o pumbuk winonen Israel inap arimano hik-hak isibag ambehen og eneplug wilip amuhupteg nin suhuloho enengginang fam welamuhuben imbisik lahup. Lahupmu NINIKNI Allahn og hisahuk ibag angginang fam wereg lit Israel inaben ap o pumbuk winon hondog eneplug watfahon arimano mingming enebuhupmu ap men hiyap men enemingmingangge roho wereg lit iniyabuk wit isaruk lamuhup. Ari roho turuk lit Israel inaben it ininggik lisoho imbisik libag inap arimano ininggareg ininggik lisoho mingming enebuhupmu ketiya it siyahap eneptukon arimano it enepma amuhup.

³Ketiya ap arimanowen hit henele ying heneptuk lit mingming heneptukmu sat toho iniyabuk wit isaruk lit asengseng toho welahep angge famen NINIKNI Allahn hit windat henebuhumu hinindi yuwag aruhu. Ari roho tuhu sambil

⁴o Babilonia inap onowe suwon oluk welaruhu angge famen aben at war atisi pukag ulug hiren wasubag sup toho henelesiyon piya sini yunggultuk lamuhubon tu, ”Yihi, ap siyahap eneptukon ino nong atisi. Ap mingming eneptukon ino eleg atisi.

⁵NINIKNI Allahn ap suwon-suwon unubabut onolokonen inine roho turuk ane elehap tirisi. Unuwanggun ininggiken seneg latuson fala roho hik isarisi.

⁶Wanggun ari seneg lit hun ariyen indi olok toho o pumbuk ekeyon-ekeyon unusuruk latisi. Liliyim-laliyim unusuruk lit nuyuhen sobir isahuk ulug indi inahan turukmu indi isa fug angge mug eneplug lalug apmayap eneptuk latisi.

⁷Ketiya enele ying eneptukon ino eleg atisimu kinang atogman atogma ap inindi yuwag atisimu enehiyehen enele hi roho uruk.

⁸E mur men sahi men tom Libanon fam werehonen oho enehiyeg haruk lit, ’Hat mako wambulug ying atikin sambilen tulug ketiya oho ap misihen oho nit mug nenepmin ulug lahik waharuk eleg,’ uruk.

⁹Ketiya hat wareg angge wambik waharukmu ap warehon wereg ambeg ino hat holohotman yuk timisi. Hat hi habukag ulug ap suwon-suwon warehon enehime obog toho nohoruk ambehen elel enebusa. Ap warehon iniknisi roho welatuson arimano hat halukeman in amag ulug hiyag isarukmu lehoma heriyeg ambehen in amusa.

¹⁰Halukeman in atug enele mangno roho hubam uruk lit, ’Har oho hine eleg atisimu nit hag toho atikin.

¹¹Hat palimu roho weregma hat holohotman enehiyehen pinggong ele watuk lit wel haptuk latusa angge famen ketiya ap warehon wereg ambeg wambik wahenteg sobonanggen hat hapma tuwalegma nohorukmu imbalowen sum hililip toho nohoruk angge hag toho hebe hondo hasug lamuhup,’ ulug hi habulusa.

¹²Wap o sakan tirikim seleg toho umbagpag turukon hag toho welatikinon, haren o pumbuk ekeyon-ekeyon apmayap enebil larikin angge famen nungge fahet ketiya kinang ke fuk-fak hiyarusa?

¹³Hat hindimu wenggel haruk lit, ’An poholma lahalug suhal Allahn tohon emberimu an fahet lehoma hur atuk angge unduhuk fuhuk. Allah wereg ulug wel eneptukon arimanowen tom yaron kinang atogma werehon fam enele sahaltuk ambeg hur arik lahakuk.

¹⁴Laharukmen eneg palimu wereg ahun men ambi aruhuk ulug hina palimu laharukon emberimu lahakuk,’ perikin.

¹⁵Ari perukmen ap warehon wereg ambeg apma fil hik hiya wamburusa.

¹⁶Hat wareg angge kinangma yinggig lahenma aben yet hiyarukmen ap ari sa ulug inindi su atuken fuki roho kilap hiyalusareg enele sahaltuk lit, ’We tem toho hun ariyen olok toho tirisi ane fahet kinang yuk elek turukmu ap suwonet unumalikisiyet enekolen hirimuruk turuk latusa ano?

¹⁷Ap tu kinang atogman atogma siyahap turuk lit lekma hag teberisiyon ino ano? O pumbuk ekeyon-ekeyon halog toho olunap til laruk lit ap sen enesug latisireg hinibam lalihip ulug hiyag isa fug angge sen enesugmen eneg welatisiyon ino wareg angge tu ano?’ ulusa.

¹⁸O pumbuk winon onowesi war atuson obog toho ununuk suwap eneptuk lit inibam man-man sal eneptuk latusa angge famen

¹⁹hat kinangma sal habuk fugmu malik isinga ahummuwen war atukon hik isaruk hag toho anggenma hik hiyarusa. Hik hiyarusama hat pak warehon ap unuyuhen sobir isarukon hag toho yinggig lahenma ap karohen unusuruson hat hebe hililip toho nohoruk angge hag toho hondo hasug lamuhup.

²⁰Haren hangginang siyahap turuk lit humalikisi unusuruk latikin ane ari fahet ap suwon-suwon helep fam wirig ambeg sal eneptuson iniraham sal habuhup fug. Hat humalikisi humbusagsi men olok ahunen ondohowonen ondohowon wereg ulug aben ununuk uk fug angge weregman eneg welamuhup.

²¹At umalikisi inikni unumbasi menen siyag ane turuk latfahon fahet unusuhup ambeg wiri fiyok! It arimanowen kinang atogman atogma ilmig taruk lit o pumbuk eke wiri fil eke wiri fil laruk lamuhup tohon!”

²²NINIKNI Allah pohol ha kinang ha senehon inowen ele urukon tu, ”An in aruhukteg o Babilonia inap ununuk men, unumalikisi men unumbusagsi men we tor angge welamuhubon obog toho elehap enebuhuk.

²³Aben ololo olma werehon ho roho hik isaruk hag toho Anden mun angge man angge o Babilonia kinangma werehon eleha fusuhuk. Kinang ari siyahap tuhukmu sabelep eneg weregma imbalo ngi roho welamuhup ulug An HINIKNI Allah pohol ha kinang ha seneg lahiyonen nele ihi.”

²⁴NINIKNI Allah pohol ha kinang ha senehon inowen ele tik-tem toho uruk lit sali emberisiyon tu, ”Anden tuhuk ulug wenggel harikik ane teko lahu, Anden tubuhuk ulug kong toho emberikik ane hikir aruhu.

²⁵Asyur inap arimano An nangginang famen siyahap enebuhuk, An nantom famen nuyuhen sobir isaruk laruhuk. E paleg angginon iren An numalikisi unumaloma imbik laharuson kong toho hik isahukmu unubam se aruhu.”

²⁶Allahn tubuhuk irisiyon ino kinang obog toho fam tubuhu ane fahet kong toho emberisi. Ap o pumbuk obog toho alem angginon unubam umbuhuk ulug inggik leho lit wereg.

²⁷NINIKNI Allahn tubuhuk ulug kong toho emberisi ane ap san elehap tuk teg? Ap unusuhuk ulug inggik leho lit weregma san lisoho imbik wambuk teg?

²⁸Ap suwon Ahas war atfahon mo ino fam Allah amingmingangge nabi inowen ap hiyag isibag ane tu,

²⁹”Wanggun hunusuruk latisiyon ino fala roho lin irisiyon fahet hit Filistin hinaben henehiyeg hahup fug! Pisanggo warehon famen hukalo eke wilip aruhu. Hukalo ino famen manu aherabul werehon eke wilip aruhu.

³⁰Allah umalikisi asengseng toho werehon arimano enele ying eneptuk ane eleg aruhumu inindi yuwag toho wereg lit enengge elehonen oho enehum ouk toho naruk lamuhup angge famen hit Filistin hinap war amag ulug Allahn suburu obok humon monde fik waruhumu we tor angge welamuhubon manu inowen hunusuhu.

³¹Hit sok o pumbukmu kurukon foroho lahebonen henele ya nga uruk lamok! Hit o pumbuk aru fam welahebonen oho henele ngik-ngog iyok! Ik eleruk filen ap seliyon misig oho enekolen pok am fug angge mondoko waharikim indok hubu hag muhul mondotukmu yet halug henekolen hirimuruk tiyok!

³²Filistin inaben Israel inap nit ninibil amuhup ulug ap mon enebik waharuson unubam nungge ane uruk lamuhuk? Niren hebeloho uruk lamuhukon tu, ”NINIKNI Allahn tom Sion ahongge pilapfag. Umalikisi asengseng toho wereg lit Allahn ili og nenepmisi ulug tom ino fam larukon arimano inindi yuwag toho welamuhup.”