Read Angguruk Yali YESAYA 15 Bible Online

YESAYA 15 - Angguruk Yali bible

YESAYA 15

¹Allahn o Moab fahet ibag ane tu: Hup misig fam o pumbuk Ar-Moab siyahap turusama olun atisi. Hup misig fam o pumbuk Kir-Moab oho halog toho olunap turusa.

²O pumbuk Dibon inap arimano punumu hubu lahaptuk ambeg lahalug uba yatuk. O Nebo inowen oho Medeba inowen oho Moab inap arimano punumu lahalug piya sini uruk. Ap obog toho inindi siyahen onoruk paloho ununggul ahap eneg teberuk lit panisung kong turuk.

³O kema-kema ap obog tohowen fesi lahaboho fong watuk. O unggama lahalug hunu sini uruk lit o silimuwen oho uba eneg yatuk.

⁴O Hesbon inap, Eleale inap menen let nenebik maniyek ulug enele hi roho urukmu o Yahas inaben oho hol isaruk. Ari roho turukmu Moab inap sehen senehon arimanowen oho enekolen elek-elek angge ruruk lit enele ngik-ngog uruk.

⁵An nindi angginen nele hi roho Moab inap fano amag uruk lahi. Moab inap arimano linggik-longgo uruk lit winon o Zoar men Eglat-Selisia men larukmu winon uba liloho pilabil o Luhit fil laharuk. O Horonaim laruk ke aben siyag atukuk ulug ya nga il laruk.

⁶O Nimrim ik wilip atuk ambeg ino firig atisimu hoholangge men inggila angge men lilog atuk lit kinangman wilip atuk angge obog toho eleg atisi.

⁷Ari regma Moab inap arimanowen enenggengge we tor angge inibamen foroho angge ap seliyonen hilahup tohon ulug ha roho walug ik Haarabim paloho nindig atug laruk.

⁸Ari fahet o Moab inap kinang atogman atogma werehonen uba hum toho kuwa ruruk lit enele ya nga urukmu o Eglaim inaben oho o Beer-Elim inaben oho hol isaruk.

⁹Yet homok: O Dibon ik wirig atukon ino ap enemeben keleg atisi. Ari roho turuk lit Dibon inap alem anggin anggolowon unubam atisi angge famen Allahn alem angginon winon eke unubam umbuhuk ulug Moab inap we tor angge werehon enesehelimu olomene olokon eke monde fik waruhu.