Read Angguruk Yali YESAYA 16 Bible Online

YESAYA 16 - Angguruk Yali bible

YESAYA 16

¹Moab inap arimanowen lekma helep alma hirag arik larusa ambehen enele sahaltuk lit, ”Kinang seneg ahun tom Sion fam werehon inowen nit let nenebukag ulug wam domba yuhambukon eke og irik lahuben ap mon enebuk ohon!” uruk.

²Suwe eke ei famen yanggaltuk mu fururuk toho wilip atuk hag toho Moab hiyap arimano yanggaloho linggik-longgo uruk lit inindi nonghong uruken ik Arnon paloho nindig atuk keyen tung-tung angge ruruk lit la wam turuk.

³Ari fahet Moab inaben tom Sion fam enele uruk lit, ”Niren nangginuhukon fahet komo nenepmihin! Nit let nenebuhunen kong toho imbin! Yanggaloho pilili-palala nisarusa ninap ap seliyonen hiyag nenebuhup tohon haren hirag nenepmihin. Sako reg ambeg hat hapma hur arik wahereg hat o unukoho famen nit nunubahet hup hag toho aruhun.

⁴Ap mug neneplug larukonen siyahap nenebuhup tohon nenehap mapmu nenesug laruhun. Mapmu nenesugmu nit aben yanggal neneptusa ninap hat hapma ap pohon hag toho welamuhuk,” uruk. Ap apmayap eneptuk lit unuyuhen sobir isil laruk lit mun angge man angge kinangma werehon siyahap til laruk ane eleg aruhu.

⁵Eleg aruhumu ap suwon Daud welatfag ambeg ap suwon lehoma hur atuk angge eke unduhuk laruhu. Ap inindi enesug ane hur atuk angge ari ahongge hag toho welaruhumu ap suwon alem haloho emberukon eke hur arik lahaku. Aren umalikisi ininggik kobog isa fug angge fet enesugmen eneg mun ane man ane oluk teg lit alem obog toho fano haloho lawag ulug indi pulmu roho wenggel haruk lit let eneptuk laruhu.

⁶Niren hol harukmen Moab inap arimano inindimu winik-wonog toho ininggareg wel taruk urukmu holtukuk. Hemet til laruk lit enele mahayeg toho uruk.

⁷Ari fahet alem angginon arimano unubam atukmu Moab inap obog tohowen enele hum toho uba eneg yatuk. Kue kismis kin altap hahon[12] o Kir-Hareset inowen naruk latukuk ane eleg atisi ulug inindi ouk toho ngesekum turuk.

⁸O Hesbon inap iniyabuk hele anggur yaho ambeg halo irisi. Hele anggur o Sibma inaben tohon oho lilog atisi. Indam anggur iren yatukon ahaluwe olokon ino ap o pumbuk wal-wal inine roho werehon arimanowen narusareg nenek turuk lit inine eleg latisi. Itano li hele anggur arimano unggum yaluk-faluk isil o Yaezer horogma larukmu asimit sililim-salalam turukon lek fil oho ik saho ahik fil oho laruk latisi.

⁹Hele ari siyag atisimu anden Yaezer inap men uba yatuk lahi. Uba eneg yatuk lit nil ahaluwe hit Hesbon inap men Eleale hinap men henebene pilap hisaruk lahi. Hiren e anggen men anggur anggen men tahantukmen ap seliyon enele ngik-ngog il hunusik waharusa.

¹⁰Hiniyabukmuwen henehiyehen sini yunggultuk latikip ane eleg atisi. Ap anggur anggen umatuk ambehen longgo urusa. O kema-kema enehiyehen ngik-ngog uruk ane teng irisi.

¹¹Ari regma anden Moab inap unubahet nindi anggin toho wenggel haruk lit inibam pumbuk suwon Kir-Heres fahet nindi wat taruk lahi.

¹²Moab inap arimano punumu lahalug Allah hag toho wereg ulug wel eneptukon unubam sembahyang il hubu lahabil laruk lit sat toho turuk lamuhup halug oho fano amuhup fug.

¹³Ari hag toho Moab inap unubam teko lahu ulug NINIKNI Allahn indam ele ibag.

¹⁴Ari ibareg ketiya it unubahet ele urukon tu, ”Ketiya Moab inap arimano we tot fano wereg angge famen mo ilig am wirig am turukmu hinahan aruhumu we pikit toho hup ino fam eneg enehiyehen ngik-ngog turuk ane eleg aruhumu aben wasubag sup toho inda yag eneptuk lamuhup. Ari tuhumu Moab inap enebe we tot-tot eneg onoluk welamuhupmu inine mondabi eleg aruhu.”