Read Angguruk Yali YESAYA 17 Bible Online

YESAYA 17 - Angguruk Yali bible

YESAYA 17

¹Allahn o Damsyik fahet ibahon tu: We tot welamuhupmu o pumbuk suwon Damsyik ino eleg aruhu. O ino siyahap tuhupmu olun eneg welaruhu.

²O Aroer Damsyik inaben tohon ino men pumbuk toron walinggoho werehon men ap enele teng uhumu wam mondoko kurukmu ap misihen oho yanggaluk fug angge weregma kinang waruk lamuhup.

³Ari reg laruhumu fobik oho ap suwon o Damsyik inap fet enesuhon eke in atuk laruhu fug. Israel kinang fam oho o pumbuk suwon elehet ineyon walinggoho ohowon ino siyahap tuhup. Ketiya Israel inap arimano iral umbagpag fanowon hag toho wereg angge famen it unubam hik aruhu hag toho o Siria inap Damsyik walinggoho werehon we tor angge onoluk welamuhubon unubam oho teko lahu. Ari teko lahu ane fahet NINIKNI Allah pohol ha kinang ha senehon inowen ele ehek.

⁴O itano li Israel inap ketiya fano werehon arimano inilaheg toho welamuhup. Yakuben ondohowonen ondowohon enebe fit taruk lit enehum hum toho werehon arimano unuwag eneg amuhup.

⁵Aben roti anggen paltuk ane hikit toho unubam turuk lamuhup. Roti anggen paltuk lit ininggiken ut ware felug alem fil karohen kong toho hilaruk. Hilalug inibam larukmu ap enenggengge elehonen o Refaim tonggoman turuk hag toho roti anggen yabukmu embeselug larukon arimano ondoltukmen eneg we tor angge eneg welaruhu.

⁶Ari hag toho Israel inap enebe we tor angge eneg onoluk welamuhup. We tor angge welamuhubon arimano e anggen e fam fubuk waroho tahantukon hag toho welamuhup. E anggen tahanoho wambukag ulug e fam fubuk watukmen eneg e anggen obog toho wamburukmu e ondomimu anggen piren hinahan, apma uhan fuwaben eneg weregma embeselug laruk. Ari hag toho Israel inap unubam teko lahu ulug Israel inap INIKNI Allahn ele ehek.

⁷O itano li ap kinangmonen nit wal neneptisi ahun inowen fanowap nenebuhu ulug At eneg inilen kilap haruk lamuhup. Israel inap Inikni Allah ebe usa fulu rehon ino eneg yami ruruk lamuhup.

⁸At eneg yami ruruk lit tu Allah hag toho wereg ulug ininggik fam laltusa angge inilen kilap isaruk lamuhup fug. Unumbasi fahet wam waroho hubu lahaptuk ambeg men, amben fano angge yaltuk ambeg men, usa ahen men fahet nininggik fam wiri ferukuk anggeyen fanowap nenebuk fug teg ulug wenggel hahupteg yet ha la fug angge welamuhup.

⁹O itano li ari tuhup angge famen indam o pumbuk Hewi inap men Amori inap men Israel inap onolohotman linggik-longgo ibag hag toho hit Israel hinap hinibam pumbuk elehet walinggoho ohowon arimano oho lekma hag aruhu.

¹⁰Nori, Allah hit fanowap heneptukon ino henepeleg atisi. At ino helep owik hag toho wereg ulug ebet ha fug angge ap o winamonen tu Allah hag toho wereg ulug wel eneptukon hiren oho wel eneptuk lahep. Fanowap nenebukag ulug it ununuk fam usama anggen o winaman walug waharukon fok turuk lahep.

¹¹Fok turuk sambil ino eneg e ubahare fitug owil yihik feruk angge famen anggen misig oho uruk elehen tahan ta fug angge welahep. Tahan ta fug angge welahepma ouk alem angginon hunubam werehon ino fano aruhu fug.

¹²Yihi, o pumbuk anggolo enele wal-wal urukonen nunusul ulug mondoko waharuk. Ik hul salalang tik wamburuk lit aplohok hum toho turuk hag toho ngik-ngog til waharuk.

¹³Ik haglabut warik waharukon hag toho enele hum toho il waharuk angge famen Allahn ele pararag turukmu itano yitmi-yatma linggik-longgo uruk. E inggila lilohon siyeluwen walug larukon hag toho pilili-palala ruruk.

¹⁴Hupmu ap enekolen yuk lagmag uruk, mo uwan lahik wam fugmu ap enekolap eneptukon arimano eleg atuk. Ari hag toho nit nenenggengge hulul ulug waharuk inap obog toho unubam teko lahu.