Read Angguruk Yali YESAYA 18 Bible Online

YESAYA 18 - Angguruk Yali bible

YESAYA 18

¹Yihi, Etiopia inap inibam ik Nil elerukmu wereg lit kou fam ik ahum pali ke folo-folo larukon arimano siyag amuhup!

²Ap arimanowen Yerusalem inap nit men nininggik ahandip toho welamuhuk ulug ap mon eneptusama kou olonggop fam wirihon palimu laharusareg ik ahum pali keyen waharusa. Hit mon heneptusa hinap, nori, hit folo-folo laruk lahebon hinibam lalihip! Hit honori unuwag yaron, enehap helhel angge rurukon, mun angge man angge unuyuhen sobir isaruk lit ap o kema-kema enekolap eneptukon enembeg aliyek! Hinibam ik suwon ekeyon-ekeyon laruk ambeg samban toho lalihip!

³Hit kinang atogman atogma welahebon holiyok! Allahn su ane timisi ulug punumuwen enehangge eke yaho fuhupteg waruk ele hum toho tung tuhup.

⁴NINIKNI Allahn tuhuk perukon fahet an hiyag nitisiyon tu, ”Anden tuhuk peruk lahiyon uwan tegma An nindi yuwag toho wereg lit kinangma pilap haruk lahi. Unukoho molok folo-folo eleg am fug angge wereg hag toho An nebe pik-pog angge welahi. Hina yanggowon unduhuk hag toho ninggik lebe ruk fug angge Anden tuhuk perukon horog teg ulug sap teg lahi.

⁵Hele anggur anggen tahantukon uwanma owil yihik felug anggen ket wilip atuk li inggik anggen yihik elehon karog fam kong turuk lit inggik yaluk-faluk tohon fala roho hik isil laruk hag toho Etiopia inap arimano Anden siyahap enebuhuk.

⁶Siyahap enebuhukmu enebe lin-lan uhubon arimano suwe punumu werehon men mene farema werehon menen naruk lamuhup. Mo ilig atukmu suweyen narukmu mo wirig atukmu meneyen naruk lamuhup.”

⁷Fobik welamuhukmu o misihim sambil ap unuwag yaron, enehap helhel angge rurukon, mun angge man angge unuyuhen sobir isaruk lit ap o kema-kema enekolap eneptukon arimanowen Israel inap INIKNI Allah pohol ha kinang ha senehon ino hi rul ulug fano-fano angge walug wamuhup. Inibam ik suwon ekeyon-ekeyon laruk ambehen NINIKNI Allah unuk wel turuk ambeg tom Sion fam wamuhup.