Read Angguruk Yali YESAYA 19 Bible Online

YESAYA 19 - Angguruk Yali bible

YESAYA 19

¹Allah amingmingangge nabi inowen o Mesir fahet ibahon tu: Yet homok! NINIKNI Allah inowen Mesir inap alem angginon unubam umbuhuk ulug pohol keyen hina fene folo-folo waharuk. Waharukmu usangge Mesir inaben tohon alem elehon arimano enekolen elek-elek angge rurukmu Mesir inap inindi angginen pong-pong angge ruruk.

²Allahn ele urukon tu, ”Anden Mesir inap arimano it-it wat-war amag ulug inindi kahal enebuhuk. Ap ekeyen are ware fuhu, o pumbuk ekeyen pumbuk eke siyahap tuhu, ap suwon ekeyen ap suwon eke men tog aptuk lamuhup.

³Iren tuhuk peruk ane eleg amag ulug nina fusuhukmu inindi nonghong uruk lamuhup. Nonghong uruken nangginuhuk ulug usangge alem elehon arimano kapal isaruk lit ap warehon enehime wol eneptukon men fulu roho hiyag isarukon menen hiyag nisawag ulug enembeg laruk lamuhup.

⁴Anden Mesir inap arimano ap suwon indi arikon inggikmu hik isahukmu at inowen indi isa fug angge umalikisi sen enesug laruhu ulug An Allah HINIKNI pohol ha kinang ha seneg lahiyonen nele ihi.

⁵Ik Nil firig atil wamburukmen eneg kinang lilog aruhu.

⁶Ik Nil ahiyon oho tug-tug aruhureg amben siyag turuk laruhu. Mesir inap iniyabuk ahaluweyap turuk ahik mondabi eleg aruhu. Fili men olonggop men halo urukmu

⁷hame ik ambutmu werehon oho ilim aruhu. Yabuk ik ayegma witukon kinang halet tirikim yaho angge lilog aruhumu homhomowen fu roho lin-lan isahu.

⁸Ikan obog toho eleg amuhupmu ikan watuk inap inindi anggin toho welamuhup. Sum fam oho suwap ayeg tehon fam oho nangginoho ikan wabul ulug inindi ikahuk uruk lamuhup.

⁹Hekel suwaltuk hiyap wisig elehen ininggali haruk lamuhup. Sum yihik feruk inap hekel elehen inindi su aruhumu onorohole inilaheg toho welamuhup. Ap iniyabuk wit isarukon oho onggo og isa fug angge werehen enehummu siyag toho welamuhup.

¹¹O Zoan inap onowesi arimano inindi sohu roho wereg. Ninindi anggat teg lit Mesir inap onowe suwon fano komo rurukon welahe perukonen sohu-sohu ane komo ruruk. Nori, nungge fahet hiren honowe suwon ubam henele uruk lit, ”Nit ap suwon amukasi welatfahonen ondohowonen ondohowon welahereg mun ane man ane alem obog toho fahet nonoluk,” uruk lahep?

¹²Hat Mesir inap onowe suwon welahenon, hat komo haptukon kema wereg? Iren NINIKNI Allah pohol ha kinang ha senehon inowen hit Mesir hinap hunubam tuhuk ulug kong toho emberisi ane onoluk teg halug hat hiyag humag!

¹³Zoan inap onowesiyet o Memfis inap onowesiyet inindimuwen enele si ane anggolo wenggel haruk lit ininggarehen ininggareg enele ying taruk. It arimano Mesir inap onowesi roho wereg famen unumalikisi inindi nina feseruk.

¹⁴NINIKNI Allahn hime ap inindi sohuwap eneptukon it sehelimu monde fik waharisimu onowesi arimanowen Mesir inap inindi nonghonga feseruk. Ap ekeyen ik olokon nalug me witil laruk lit mulilik la mulilik wam turuk hag toho turuk.

¹⁵Ari roho turuk lit Mesir inaben alem suwon oho toron oho fano roho haluk fug teg.

¹⁶O itano li Mesir inap arimano hiyap enekolen unuwag elek turuk hag toho NINIKNI Allah pohol ha kinang ha senehon inowen unusuhuk ulug inggik leho lit werehon olohotman enekol haruk lamuhup.

¹⁷Ap ekeyen Yehuda inap ununuk urukmu hol halug Mesir inaben ap arimano Inikni Allahn alem angginon nunubam umbuhuk ulug kong toho emberisiyon fahet ebet haruk lit yuk lagmag uruk lamuhup.

¹⁸Ari tuhup li o pumbuk Mesir kinangma werehon fuwaben itanowen Ibrani inap enele uruk lamuhup. Iren NINIKNI Allah pohol ha kinang ha senehon ubam, ”Hat hanggengge welamuhuk,” ulug sali emberuk lamuhup. O pumbuk sali umbuhubon misig unuk Moma suwaluhup.

¹⁹O itano li Mesir kinang pulmu NINIKNI Allah fahet hubu lahaptuk ambeg eke wiri fuhupteg Mesir kinang hili-hilimu At unuk fam helep eke hutuk tubuhup.

²⁰Helep ari ap obog tohowen NINIKNI Allah pohol ha kinang ha senehon fahet onoluk amag ulug hutuk tubuhup. Fobik Mesir inap arimano ap seliyonen siyahap eneptukmu enele hi roho NINIKNI Allah ubam uruk lamuhup halug Aren let eneptuk ahun eke monde fik waruhureg it inibil atuk lit windat enebuhu.

²¹Ari roho turuk lit NINIKNI Allah it onolohotman in arik waharukmu iren Allah we tem toho NINIKNI wereg ulug onoluk aruhu. At wel tul ulug wam men suburu men yaloho hubu lahaptuk lit At ubam sali emberuk lamuhubon hikit toho turuk lamuhup.

²²Itano li NINIKNI Allahn Mesir inaben hare ane wenggeltukon umbusuhup ulug unusurukmen eneg At ambeg waharuk lit ubam sembahyang uruk lamuhup. Uruk lamuhupmu NINIKNI Allahn hol isahureg ouk unubam werehon hihit eneptuk laruhu.

²³Ari teko lahumu kebunggalem suwon o Mesir famen Asyur kinangma larukon eke yaho fuhupmu Asyur inaben Mesir inap pen isa larukmu Mesir inaben oho Asyur inap pen isa waharuk lit ambiyeg sembahyang uruk lamuhup.

²⁴O itano li Israel inap arimano Mesir inap men Asyur inap men wirim teg lit it iniraham welamuhup. Israel inap arimano kinang pulmu weregma it feneyen ap anggolo fano amuhup.

²⁵Ari roho welamuhupmu NINIKNI Allah pohol ha kinang ha senehon inowen ele uruk lit, ”Hit Mesir hinap An numalikisi welahehon, hit Asyur hinap An ninggiken lal heneptikikon, hit Israel hinap An nanggengge welahebon, Anden hit hinineyap heneptukmen eneg welaruhuk,” uhu.