Read Angguruk Yali YESAYA 2 Bible Online

YESAYA 2 - Angguruk Yali bible

YESAYA 2

¹Allahn hun Amos amloho Yesaya fam Yehuda inap men Yerusalem inap men fahet hiyag itfag ane tu:

²Obog aruhu li tom NINIKNI Allah ibam wirihon ino tom winon apma regma at ino ine roho unduhuk lit mondabi palimu aruhu. Ap o pumbuk kinang atogman atogma werehon obog toho mondoko tom ino alma lalug

³enele uruk lit, ”NINIKNI Allah hun Yakuben wel tibahon ibam tom fam wirihon ino lahulen maniyek! Nit laruk lamuhuk abunggalem fahet Aren hiyag nisahu ane hikit toho laruk lamuhuk. O Yerusalemen NINIKNI Allahn ele uruk lit tom Sion famen milal neneptuk laruhu,” ulug enele uruk lamuhup.

⁴O pumbuk kinang atogman atogma werehon it-it seli roho weregma At inowen alem unubam werehon fuki roho yet isaruk lit haloho emberuk laruhu. Fit ap watuk angge iren tohon yabuk witukon fahet wanggunap turuk lamuhup. Eneminggin ap unusuruk angge wam senggeltukon fahet filiyap turuk lamuhup.[3] Ari tuhupteg o pumbuk kinang atogman atogma werehonen tog aptuk lit wat-war atuk lamuhup fug. It arimanowen tog aptuk ane fahet milal taruk lamuhup fug.

⁵Nori, Yakub umalikisi welahebon, NINIKNI Allahn seleg fanowon og nisarukon fam laruk lamuhuken maniyek!

⁶Allah, Hat humalikisi Yakuben ondohowonen ondohowon arimanowen ap o winamonen turuk ane hikit toho turuken hambol yig isarikin. Iren yali inaben turuk ane hikit toho fulu ane turuk, Filistin inaben turuk hag toho pamongge unusuruk, ap o winamon men mangno roho siyahon nunubam aruhu rohon ulug ininggik tag turuk.

⁷Ili ruruk angge emas perak anggolowen enengginang keleg teg, fano-fano angge mondoko aben wirim ha fug tohon foroho lit wereg. Enembohom kuda anggolowen kinang atogman atogma keleg teg, kereta wam arimanowen lisoho walug laruk angge aben winag isa fug teg.

⁸Usangge anggolowen enengginang keleg teg, it ininggiken wit taruson onolohotman enelenggen fam hur atug sembahyang uruk.

⁹Fobik it obog toho aben apmayap enebuhupmu enepma kunuk toho welamuhup halug iren hubam siyag ane turuson Haren hambolma umbusuhun fug.

¹⁰ NINIKNI Allah mondabi palimu wereg lit umbagpag turukon ino ap enekolap enebil waruhu halug helep alma, kiling elma hirag arik lahup!

¹¹Allah waruhu sambil ino ap hemet til larukon apmayap enebuhu, enewelwel turukon arimano ininggaliyap enebuhu. We NINIKNI Allah eneg palimu welaruhu.

¹²NINIKNI Allah pohol ha kinang ha senehon inowen mun ane man ane alem suwon men hemet til laruk ane men inggareg palimuwap taruk ane men apmayap enebuhu sambil horog teg.

¹³E sahi yaron palimu laharukon tom Libanon fam werehon men e wali o Basan werehon men o ino sambil siyahap enebuhu.

¹⁴Tom yaron men punu ke men obog toho tuwale fuhu.

¹⁵O yaron men elehet ineyon men obog toho halog tubuhu.

¹⁶Kou ik ahum pali ke yatma larukon men kou fanik-fanowon arimano men obog toho siyahap tuhu.

¹⁷O ino sambil ap hemet til larukon obog toho apmayap enebuhu, enewelwel turukon arimano ininggaliyap enebuhu. We NINIKNI Allah eneg palimu welaruhu.

¹⁸Usangge alem elehon arimano mondabi eleg amuhup.

¹⁹NINIKNI Allah mondabi palimu wereg lit umbagpag turukon ino ap enekolap enebil waruhu halug kinang atogman atogma At olohotman yuk turukmu ap obog toho enekolen helep alma, kiling elma hirag arik lahup.

²⁰O ino sambil usangge onolohotman kunuk toho hur atug wel enebul ulug ili ruruk angge perak emas fam wit taruson arimano pak men kindik menen nawag ulug hik isahup.

²¹NINIKNI Allah mondabi palimu wereg lit umbagpag turukon ino ap enekolap enebil waruhu halug kinang atogman atogma At olohotman lagmag uhumu ap obog toho owikmu men koruwelma men hirag arik lahup.

²²Ap kinangmon ine elehon sa hahon wereg lit nungge tuk teg? Ap ekeyen an fanowap nabuhu puk fug.