Read Angguruk Yali YESAYA 20 Bible Online

YESAYA 20 - Angguruk Yali bible

YESAYA 20

¹O Asyur inap onowe suwon Sargon inowen ot sehen senehon onowe Tartan o pumbuk Asdod senerik lamihin ulug monde fibagma o Asdod waling enesug latfareg ilmig tibag.

²Ilmig tibahon uwanma NINIKNI Allahn hun Amos amloho Yesaya fam ele uruk lit, ”Hat hasum wan teg lahenon men huyug hililip angge men nonggoloho welaruhun,” ulug hiyag itfag. Hiyag itfag ane ari hikit toho Yesaya inowen sum wan teg latfahon men uyug hililip angge men nonggoloho ayebiye laruk latfag.

³Ari roho turukmen eneg Asyur inaben o pumbuk Asdod ilmig tibagma NINIKNI Allahn ele uruk lit, ”An namingmingangge Yesaya ino mo hinahan fam ayebiye la wam turuk latisi ane ari o Mesir inap men Etiopia inap men unubam teko lahu ane fahet enehane turuk latisi.

⁴Ari hag toho Asyur inap onowe suwon inowen Mesir inap men Etiopia inap men ap sabalonet kabiniyonet enesum wan turukon men unuyug hililip angge men nonggoloho hik isahupteg ininggik hele waroho lit-lar isarukmu onolombik funu-fana og eneplug Asyur kinangma imbisik lahup. Ari roho turuk lit Asyur inap onowe suwon inowen Mesir inap arimano mondabi ininggaliyap enebuhu.

⁵Ari tuhumu Etiopia inaben nit ili og nenebik wamuhup perukon men Mesir inaben ninibil amuhup ulug witnik-wetnog turukon men yuk lagmag uhupteg ininggali hahup,” ibag.

⁶Ari teko lahumu Filistin inap ik saho ahik ayegma werehonen enele uruk lit, ”Niren Asyur inap onowe suwon inggikmuwen windat nenebuhuben heng enebul ulug Mesir inap men Etiopia inap men enembeg larukuk angge famen ketiya alem siyahon ari unubam atisimu nit ke roho windat tahuk?” uruk lamuhup.