Read Angguruk Yali YESAYA 21 Bible Online

YESAYA 21 - Angguruk Yali bible

YESAYA 21

¹Allah amingmingangge nabi inowen o Babilonia kinang unuk salikap toho ”Lekma ik yenggelehon ayegma werehon” suwaleg ambeg fahet ibag ane tu: Ik ambut filen siyelu fu roho waharuk hag toho ap enekolap eneptuk angge lekma werehon ap siyahap enebik oho waharuk.

²Waharuk ane ari fahet an nakol nim-nim fulu roho yet harikikon tu: Yoholiyangge hilaruk inaben aben angge hilil laruk. Ap siyahap eneptuk inaben siyahap enebil laruk. Ari turukmu yet isalug Allahn ele uruk lit, ”O Babilonia inaben ap siyahap eneptukmu inindi angginen ngesekum turukon ari Anden elehap tuhuk. Ari fahet hit Elam hinap tog abik lalihip! Hit Madai hinap waling enebik aliyok!” urukmu fulu roho harikik.

³Fulu roho harikik ane fahet yuk lagmag irikik. Holtikikon fahet nakolen elek-elek angge ririkik. Hiyap ekeyen malik indag tamin ulug tanggusi naruken inel-hanel uruk hag toho turuk lit

⁴nindi nakol anggolowen pong-pong angge ruruk latikik. Mo ubuk ik ohoma nakol harikik ane ariyen o hupmu nindi se roho kel taruk ane ari hebeloho nindi nakol atuk ane atisi.

⁵Anden fulu roho yet harukmen Babilonia inaben seni osoho felug sum fanowon heniye tuwalegma osoho angge fibir isalug enehiyehen ik men suburu men naruk lit weregman ap ekeyen ele hi roho, ”Hit ap onowesi welahebon, ap seliyon wahasama tog abik lalihiben sing fene wam sei are ribiyok!” irisi.

⁶Ari irisimu Nikni Allahn an nubam ele uruk lit, ”Kahaleg ahun eke kahaleg ambeg lalug yet hamisi ane hiyag hirik watmisiyen hiyag itmihin.

⁷At inowen kahaleg lit weregman kereta wam kudan lisoho walug laruk angge ano, wam keledai ano, unta ano luhaloho waharukmu yet isamisi halug sa waharuk ulug fuki roho kilap isamisiyen hiyag itmihin,” irisi.

⁸Irisi ane ari hikit toho kahaleg ahun eke larisi. We tot welatikikmu at inowen ele hi roho nubam uruk lit, ”Nikni, unukoho hunduhuk hup hunduhuk an kahaleg ambeg unduhuk lit kahalegman eneg welatikik.

⁹Kahalegman keman waha eleg tegman ap sehen senehon men kereta men wahasa,” ulug hiyag nitisi. Ari ulug hiyag nitisimu ap ekeyen ele hi roho uruk lit, ”O pumbuk Babel ino pin arap toho unusurusa, Allah hag toho wereg ulug wirimangge wirihon obog toho halog toho lin-lan isarusa,” irisi.

¹⁰Nori, hit sobit-sabat heheg windal-wandal toho hunusuruson, ari ihiyon obog toho nit Israel ninap NINIKNI Allah pohol ha kinang ha senehon inowen hiyag nitisi ane hiyag hisihi.

¹¹Allah amingmingangge nabi inowen o Duma fahet ibag ane tu: Anden hol harukmen tom Seir famen ap ekeyen ele hi roho uruk lit, ”Kahaleg hahun nare, noenam welamulmu o sakan timisi? Amusun toho hik tegma welamul ano?” ulug kapal harisi.

¹²Kapal harisimu kahaleg ahun inowen hebeloho hiyag utuk lit, ”O sakan timisi angge famen ketiya hupmu welahe. Nin kapal niyalihiben fobik watlihip!” irisi.

¹³Allah amingmingangge nabi inowen o Arabia fahet ibahon tu: Nori, hit aben tohon ayeg waroho hilil noruk lahebon hinibam o Dedan welahebon, anggen ke hirag arik lalihipteg wereg lit hubanggo oho ap laruk eleg ambeg nohoruk lamuhup!

¹⁴Hit o Tema kinangma welahebon, o Dedan inap ap seliyon onolohotman windat tul ulug larukon arimano ik oboken war amuhup tohon ik men suburu men walug onolohotma lalihip!

¹⁵Ap seliyon arimanowen enentog sap teg lit karog ininggikmu seneko mulangge unusul ulug mug eneplug larukmen o Dedan inap arimano linggik-longgo uruk.

¹⁶Ninikni Allahn an nubam ele irisiyon tu, ”Ketiya Kedar inap o Arabia lekma norukon arimanowen hit henele ying heneptuk angge famen mo ilig atug wirig aruhumu we pikit toho o ino sambil eneg it palimu roho wereg ane eleg aruhu.

¹⁷Kedar inap sehen senehon enembong se roho turukon arimano we tor angge eneg onoluk welamuhup ulug An Israel hinap HINIKNI Allahn nele uruk lahi.”