Read Angguruk Yali YESAYA 22 Bible Online

YESAYA 22 - Angguruk Yali bible

YESAYA 22

¹Allah amingmingangge nabi inowen o unuk salikap toho ”Tonggoma Fulu roho yet haruk Ambeg” fahet ibahon tu: Hit Yerusalem hinap, nori, nungge peruk lit hit obog toho hinibam unggama lahalug yunggultuk lahep?

²Ap seliyon nunumbahalug larusa ulug henele hi roho uruk lahep ane ariyen o pumbuk aru keleg teg angge famen saplangge henehiyeg toho ngik-ngog turuk lahep. Hit honori ap seliyonen unusuruson arimanowen tog elman enembong se roho turusa peruk lahep ano?

³Hit honori milal heneptukon arimano obog toho enekolen o pumbuk aru embeselug linggik-longgo uruk lit hebeloho tog abuk fugmen sen eneptusa. Yatma laruson oho obog toho hiyag eneptusareg ininggik hele wat eneptusa.

⁴Ari fahet anden hiyag hisaruk lahiyon tu: Anden nori Israel inap arimano mondabi siyag atuk ulug nindi angginen uba yatmin angge re an niraham wereg lit kilap niyalihip fug. Hat hindi siyag am fug ulug onggon naptuk lahep ane imbisiyek!

⁵Nit NINIKNI Allah pohol ha kinang ha senehon inowen An numalikisi ap seliyonen unuyuhen sobir isawag ulug mon enebik waharuk lit enekolap eneptukmu inindi nonghong uruk sambil horog atisi. Hikir atisimu o Hinom tonggoma unuk salikap toho ”Fulu roho Haruk Ambeg” inowen tog abuk oho lit enele ngik-ngog turukmu aben enele hi roho let nenebik ma ulug tom Sion fil uruk latusa.

⁶O Elam inaben unusul ulug enentog sap toho kereta wam kudan lisoho walug laruk angge fam waharukmu o Kir inaben enehap mapmu eneptuk angge ininggikmu seneko waharusa.

⁷O Yerusalem walinggoho kinang fanoma tonggo reg ambeg arimano kereta anggolowen keleg irisimu ap sehen seneg inap arimano wam kuda fam laharusareg o pumbuk pin halog toho unusul ulug sokolma in arik waharusa.

⁸Yehuda ninaben ap seliyon kuk fug teg peruk latukuk ambeg ino it seliyon senebuk oho in arik waharusa. Ari regma hiren tog fam fano amuhuk ulug minggin tog o unuk ”Libanon Ohi” suwaleg ibam foroho lahebon yet ha larikip.

⁹Elehet hinibam o Yerusalem walinggoho ohowon kim hil larukmen halog-halog larisi ambeg anggolo weregma henekol nim-nim yet haruk latikip. Ik narukon yenggeleg ambeg ahandima werehon sok lare ferikip.

¹⁰Hinibam o Yerusalemen wirihon obog toho winag isarikipteg minggiroho winon halog tebeserikip ahalep fam elehet o pumbuk walinggoho ohowon ineyap turuk latikip.

¹¹Ineyap tirikipteg ik elehet selma yenggeleg ahik sul toho elehet sebe roho oho ambeg unda fil yenggel amag ulug ik hinangguruk ambeg keron eke habultikip. Ari obog toho teberikip angge famen Allahn indam pibag ane hikit toho alem angginon ari nunubam emberisi ulug wenggel harikip fug. Aren eneg fanowap nenebuhu ulug At kilap haruk latikip fug.

¹²O itano li Allah NINIKNI pohol ha kinang ha senehon inowen hunubam ele uruk lit, ”Nenembiken turukuk ulug honoruk paloho hununggul ahap eneg tebeselug fong watuk lit fesi lahaboho uba yatuk lamek,” ulug hiyag hisarisi.

¹³Ari ulug hiyag hisarisi angge famen hiren henehiyeg toho yunggultil laruk lit wam sapi men domba men waroho osoko nil ik olokon nil laruk lahep. Hiren henele uruk lit, ”Nori, nit sono war amuhukon horog tehen suburu men ik men naruk lit nenehiyeg toho welamulen maniyek,” il laruk lahep.

¹⁴Ari turuk lahebon fahet Allah NINIKNI pohol ha kinang ha senehon inowen an nubam ele fag toho uruk lit, ”Iren An nele sobir isalug ininggarehen ininggareg siyahap taruk ane ari Anden nambolma umbusuk fug angge weregman eneg war amuhup,” ulug sali emberisi.

¹⁵Allah NINIKNI pohol ha kinang ha senehon inowen an nubam ele uruk lit, ”Ap suwon ibam foroho ahun Sebna ambeg lamihinteg hun ino fam hele imihinon tu:

¹⁶Hat ap sa hag toho wereg lit an war aruhukmu punu tu fam sal nabuhup peruk lahen? Haren nungge ane peruk lit an wareg angge kilap nabuhup ibam ulug helep aru fo roho wit taruk lahen?

¹⁷Hat hahako roho turuk lahen hahun, NINIKNI Allahn hat fuk-fak toho kinangma yinggi hubahalug inggik ineyonen

¹⁸hat het hubahakureg yitmi-yatma tonggo eneg wereg ambeg hik hiyahu. Hik hiyahu ambeg weregman eneg war aruhun. Kereta lisoho laruk angge fanowon haren tohon oho yoholiyangge walug hat hik hiyahu ambeg imbisik lahupmu hikni ap suwon ibam werehon menen hat fahet ininggali haruk lamuhup.

¹⁹Allahn hat palimu roho welahi peruk lahenon ino pilap haptuk lit ap suwon ibam foroho laruhun fug ulug apmayap habuhu.

²⁰NINIKNI Allahn Sebna ubam ele uruk lit, ”Anden hat apmayap habuhuk sambil ino An namingmingangge Elyakim hun Hilkia amloho ino wol tuhuk.

²¹Wol tuhukteg hat hubalma ap suwon ibam foroho laruhu ulug hat hasum men haliliyangge hamigmu lahaptuk lahenon ino oko at ubam wan t ubuhuk. At ino hat hubalmangge Yerusalem inap men Yehuda inap men inikni roho welaruhu.

²²Elyakim inowen mun angge man angge ap suwonen tohon haloho emberuk laruhu ulug ap suwon Dauren ondohowonen ondohowon ibam kurukon sok husuruk angge og uruhuk. Og uruhukmu aren sok husuruk laruhu halug ap ekeyen labuk fug teg laruhu, aren latuk laruhu halug ap ekeyen husuk fug teg laruhu.

²³Elyakim inowen yabuk ine roho senegman eneg welaruhu ulug e uwag ine roho pilaptukon hag toho unduhuk fuhukmu aben at wel turuk lamuhup hag toho at ori oho wel eneptuk lamuhup.

²⁴At wel turuk lit oriyet amusiyet umumsiyet umbarikisiyet unumalikisi toronet suwonet ibig-obog tohowen let nenebin ulug at fam likiya hupmu heng turuk lit indi angginap turuk lamuhup.

²⁵Sum angginon suknuruk ambeg posiyemanggen telehon ino heneko wamburuk lit sum fam fani reg angge arimano hililoho lin-lan uruk hag toho aret oriyet siyag amuhup ulug An HINIKNI Allah pohol ha kinang ha seneg lahiyonen uruk lahi,” irisi.