Read Angguruk Yali YESAYA 23 Bible Online

YESAYA 23 - Angguruk Yali bible

YESAYA 23

¹Allah amingmingangge nabi inowen o pumbuk Tirus fahet ibahon tu: Hit kou humon fam ik ahum pali keyen o Tarsis laheg waheg turuk lahebon, hinindi siyahen uba yatuk lamek! Hit o Siprus famen suhuloho hinibam o Tirus waharuk lahebonen hol hemek: Hinibam o Tirus ino mondabi siyahap turusama kou kik waharuk ambeg oho eleg atisi.

²Hit hinibam ik ayegma welahebon, hit o Sidon hinap aben tohon ayeg waroho hilil noruk lahebon, henekolen henele eleg angge welamok! Indam hit honotsi ik suwon ahum pali keyen o kema-kema laruk lamuhup ulug mon eneptuk latikipmu

³o Mesir kinangma lalug ik Nil ilanma yaho angge ayeg waroho hilalug waharuk latusa. Ari roho o pumbuk ekeyon-ekeyon enenggengge onggo paloho hilil norukmen eneg welatikip.

⁴Ari obog toho eleg atisimu hit Sidon hinaben hininggali hahup! Ik suwon ari hit hinisinga hag toho wereg angge famen ik ariyen hit hunubahet awiya waruk lit, ”Anden malik nahummu atuk elehen indag tarikik fureg ap umalik oho hilani malik oho fano su amag ulug fet enesug lahi fug,” uruk.

⁵O Tirus siyahap turusa urukmu Mesir inaben hol hahupteg enekolen yuk lagmag uruk lamuhup.

⁶Hit ik ayegma welahebon, hinindi angginen uba yatuk lamek! O Tarsis fil yitmi-yatma linggik-longgo uhuben wal homok!

⁷Indam hit hinibam o Tirus inowen henehiyehen yunggultuk latikip ambeg ino ketiya ke roho wereg? Wal tilmu wirig latfag ambeg ariyen aben angge ayeg waroho hilil norukon anggolo wilip atug yatma lalug o pumbuk eke wirik la eke wirik la turuk latusa.

⁸Indam hit Tirus hinaben o kema-kema ap suwonap enebil laruk latikip. Hit sehelimuwon ayeg waroho hilil norukon arimano ununuk su regma o pumbuk munon-manon indit-indit werehonen wel eneptuk latusa angge famen ketiya ap san perisi ane hikit toho hit hinibam mondabi siyag atisi?

⁹NINIKNI Allah pohol ha kinang ha senehon inowen ap unubabut winik-wonog toho wereg lit hemet til laruk ane mondabi eleg aruhuwen ap ununuk suwon o kema-kema werehon arimano apmayap enebuhuk ulug kong toho emberisi ane hikit toho hinibam o Tirus ino siyahap tirisi.

¹⁰Siyahap tirisimu Tirus hinaben fobik kou ik ahum pali keyen larukon wituk lamuhup fug. Ari fahet hit Tarsis hinap nori, ketiya famen hiren oho ik Nil ayegman yabuk wituk ane hikit toho suburu yatuk lamuhup.

¹¹O Sidon men Tirus men siyahap turuson uwanma NINIKNI Allahn ele uruk lit, ”O Fenisia inap inibam pumbuk suwon elehet walinggoho ohowon halog toho siyahap tuhup,” irisi. Aren inggik ik ahum fil leg harisimu o pumbuk munon-manon ik ahum walinggoho werehon enekolen yuk lagmag urusa.

¹²Allahn nin ele uruk lit, ”Hit Sidon hinap hiyap tuhumon aben siyahap turukon hag toho welahep angge re ketiya henehiyehen yunggultuk lamuhup fug. Nonoluk welamuhuk ulug o Siprus linggik-longgo uhup halug oho hinindi yuwag toho welamuhup fug,” uruk.

¹³O Siprus kinang ari ap enele teng irisi.[13] Asyur inaben o Siprus pumbuk arimano pin kul ulug waling enesug lit pila pog tebelug elehet pisan toho kurusareg o suwon fanowon halog toho siyahap tulug wam eli ibam amag ulug o pumbuk obog toho oluna feserusa.

¹⁴Hit kou humon fam ik ahum pali keyen o Tarsis laheg waheg turuk lahebon, hinindi siyahen uba yatuk lamek! Hinibam o Tirus ino mondabi siyahap turusama kou kuruk ambeg oho eleg atisi.

¹⁵Fobik welamuhup li o pumbuk Tirus ino fahet aben wenggel ha fug angge weregman eneg ap suwon raja eke oluk werehon hikit toho mo ilig am wirig am turukmu teng hinahan 70 lahu. Teng hinahan lahumu kelem sini hiyap yaying turukon fahet yunggultuk ane hikit toho o Tirus inap unubam teko lahu. Hiyap yaying turukon fahet kelem sini ulon tu,

¹⁶”Nehe, hat yaying turuk hiyap welahenon famen aben hat fahet enepeleg atisi! Waruk teltil o pumbuk walinggoho la wam timihin! Fano roho tung til sini anggolo il lamihin halug aben hat fahet wenggel hiyalusa,” uruk.

¹⁷Sini ari fam uruk ane hikit toho mo teng hinahan lahumu NINIKNI Allahn o Tirus fahet wenggel hahumu hiyap yaying turukon inowen tam turuk latfag hag toho onggo og numag ulug o pumbuk munon-manon kinang atogman atogma werehon men yaying-yaying angge ril noruk laruhu.

¹⁸Onggo og utuk lamuhubon ino andog toho umbat ta fug angge NINIKNI Allahn tohon ulug emberuk laruhu. Ari roho emberuk laruhuwon NINIKNI Allah olohotman iniyabuk waruk inap arimanowen oko walug ayeg waroho eneseher angge suburu men sum wan turukon fanowon men hilaruk lamuhup.