Read Angguruk Yali YESAYA 24 Bible Online

YESAYA 24 - Angguruk Yali bible

YESAYA 24

¹Yet homok: NINIKNI Allahn kinang obog toho puhunap timin ulug kinang aluke pilabeg hebeloho mun angge man angge siyahap turuk lit ap obog toho pilili-palala isik oho reg.

²Ap olmon siyag amuhup hag toho Allah amingmingangge imam oho siyag amuhup. Ap enemingmingangge abet hiyabet siyag amuhup hag toho iniknisi inisingasi oho siyag amuhup. Onggo paltukon siyag amuhup hag toho onggo hilarukon oho siyag amuhup. Paleg angge unubam werehon siyag amuhup hag toho paleg angge og isarukon oho siyag amuhup. Enenggengge ilamna roho ap og isarukon siyag amuhup hag toho ap enenggengge ilamna roho hilarukon oho siyag amuhup.

³NINIKNI Allahn ele irisi ane hikit toho mun angge man angge kinangma werehon siyag aruhumu kinang obog toho pirim-pirim angge reg laruhu.

⁴Kinang atogman atogma lilog atil larikim yi angge ti angge ilim aruhu. Palimu roho welahe perukon oho e inggila halo urukon hag toho inine elehen simbuk pising uruk lamuhup.

⁵Allahn nininggik ahandip toho weregman eneg welamuhuk ulug sali imbibag ane ari ap kinangmonen pisan isalug ari-ari turuk lamuhup ulug imbibahon wenggel ha fug angge aben tuk fug ane til-wil laruk lit kinang obog toho siyahap turuk.

⁶Siyag ane turukon ariyen kanti oko alem angginon unubamap tarukmu nong atukmen eneg we tor angge eneg onoluk welamuhup. Allahn An numbahalug larukon arimano siyag amuhup ulug sali imbibag ane ari hikir atuk lit kinang obog toho indoken naruk hag toho mondabi siyag aruhu.

⁷Hele anggur halo uhumu ik anggur ahaluwe eleg aruhu. Ying umahayeg urukon obog toho inindi angginen ngesekum turuk lamuhup.

⁸Enehiyehen waruk tung til pinggong ele watil enele ngik-ngog il larukon obog toho teng uhup.

⁹Sini il-il ik anggur nil larukon eleg aruhu. Ik olokon narikim enelman sig turuk laruhu.

¹⁰O pumbuk suwon ino lilibug-lalabag toho ilkal isahupmu halog toho lin-lan isahup angge arimanowen ap inibam olma kurukon sok abilit larehen ap kuk fug teg lamuhup.

¹¹Ik anggur ahaluwe elehen o silimuwen enele ya nga uruk lamuhup. Kinang atogman atogma enehiyeg toho enele yunggultukon teng uhup.

¹²O pumbuk abirangge olun eneg aruhumu o pumbuk sok kurukon ino fele roho lin uhu angge eneg welaruhu.

¹³Ari hag toho o pumbuk munon-manon kinang atogman atogma werehon unubam teko lahu. E anggen obog toho tahantug we tor angge werehon e fam fubuk waroho tahantuk ane hikit toho it fubuk lele waroho unusuhup.

¹⁴Ari tuhumu hubula fil ap onoluk welamuhubon arimanowen enehiyehen enele hi roho uruk lit, ”NINIKNI Allah eneg palimu reg,” ulug wel turuk lamuhup.

¹⁵Mo lahik waharuk filen oho nit Israel ninap NINIKNI Allah fog turukmu ik saho ahik ayegman oho At unuk palimuwap turuk lamuhup.

¹⁶Kinang atogman oho enele uruk lit, ”Alem obog toho haloho emberukon ino wel tiyok!” ulug sini yunggultukmu holtuk lamuhup. Ari obog toho teko lahuwon fahet fulu roho harikikteg anden te, ”An siyag aruhuk, an siyag aruhuk, an mondabi siyag aruhuk,” perikik. Anden yet harukmen enele si ane urukon arimanowen enenggelem ane enelesiyon eneg uruk.

¹⁷Ari fahet hit ap kinangmon nori, henekolen yuk lagmag uruk lit kiling elma mako wambulug yebangge fam luhur amuhup.

¹⁸Ap sa ele hum toho urukmu hol halug akolen lagmag ulug lahu halug akolen larukmen kiling elma wambuhu. Ap sa kiling elma wambulug nin hebeloho lahik waruhu halug yebangge fam kuhu. O itano li pohol fo roho osit humon wambik waruhumu kinang ahongge yuk elek turuk laruhu.

¹⁹O mek turukmu kinang obog toho lum-lum angge ruruk lit halet til laruk laruhu.

²⁰Ap ik olokon nalug nenek turukon hag toho kinang talog til lahu. O sabo tukum turukon mulilik hag toho kinang obog toho mulilik la mulilik wam turuk laruhu. Aben siyag ane turukon ari anggin anggolo reg lit kinang atogman atogma hondo ruruken kinang obog toho sup talalang tuhureg nin hebeloho in aruhu fug.

²¹O ino sambil NINIKNI Allahn poholma inine roho werehon men ap suwon kinangma werehon men alem unubam werehon kong toho umbuhuk ulug andog enebuhu.

²²Andog enebuhureg ap ininggik hele war eneptukon hag toho kiling elma pilap enebuhu. Pilap enebuhumu amusun toho weregman eneg Allahn alem angginon unubam umbuhu.

²³Ari turukmu pikalem inggaliyen il hulu aruhumu mo il hik aruhu. O itano li NINIKNI Allah pohol ha kinang ha senehon ino o Yerusalem tom Sion fam ap suwon in aruhureg ap obog toho fet enesug laruhu. At ino mondabi seleg teg lit umalikisi onowesi roho welamuhubon onolohotman umbagpag turuk laruhu.