Read Angguruk Yali YESAYA 25 Bible Online

YESAYA 25 - Angguruk Yali bible

YESAYA 25

¹NINIKNI Allah, Hat an Nikni welahen. Anden Hat hunuk palimuwap turuk lit wel haptuk lahi. Indam hindimuwen tuhuk ulug kong toho imbinag ane hikit toho alem suwon aben tuk fug teg ane turuk lahen. Hindi wirik toho wereg lit hele we tem toho uruk lahen.

²Haren o pumbuk suwon elehet walinggoho ohowon ino halog toho siyahap tirikinmu lilibug-lalabag toho lin irisi. It enemuwon inibam fanowon arimano halog teberikinmu olun atisireg weregman eneg fobik oho o ari nin wiri fuhup fug.

³Ari yet hahupteg o ino ngi inap indam inine roho turuk latuson arimanowen Hat wel haptuk lamuhup. Ap o pumbuk winon onolok toho turukon arimanowen oho hol hahupteg Hat fahet enekol toho wereg lamuhup.

⁴Ap inine elehon enesengseng toho weregman Haren ili og eneptuk latikin. Hat osit humon pilabik waharukmu oho o saboma mapmu reg ambeg hag toho welahen. Mo olokma oho sakoma heriyeg ambeg hag toho welahen. Ap siyahap eneptukon enembiyang ahe inine roho fu haruk ane ino sun li siyeluwen osit humon fu rik waharukon men wirim teg.

⁵Ari hag toho mo oloken kinang halet turukon men ambi reg. Ari reg angge famen iren enele ngik-ngog turukon Haren elehap turuk lahen. Hinan mo olokon saltuk hag toho Haren ap siyahap eneptukon enehiyehen sini yunggultuk ane hondo reberuk lahen.

⁶Obog-obogma NINIKNI Allah pohol ha kinang ha senehon inowen ap o pumbuk obog toho fahet seni isag isahu. Tom Sion fam inindi enehiyeg toho suburu fanowon, wam sei anggolo werehon, amben fano angge eke hag eke hag men mangno roho osohowon men hele anggur ahaluwe unduk fanowon men naruk lamuhup.

⁷Tom ino famen NINIKNI Allahn ap o pumbuk obog tohowen inindi siyahen fong watuk asum onorohole hililip toho wan turukon arimano tararag toho hik isahu.

⁸War atuk ane mondabi elehap tuhu. Ap obog tohowen uba yatukon onggon eneptuk lit uba sumag eneptuk laruhu. At umalikisi o keman-keman ininggaliyap eneptuk ane longgo rebesuhu. Ari obog toho tuhuk ulug NINIKNI Allahn ele irisi.

⁹O ino sambil aben enele uruk lit, ”Allah ino eneg Ninikni wereg. At inowen ninibil aruhu ulug nangno ruruk latukuk. NINIKNI Allahn eneg let nenebuhu ulug wenggel haruk latukuk. At inowen windat neneptisi ulug nenehiyehen wel turuk lamul,” uruk lamuhup.

¹⁰ NINIKNI Allah inggik ineyonen tom Sion fam werehon arimano wanggi wat enesug lit wereg laruhu. Ari reg laruhu angge famen wam sapiyen yog wituk ambeg ap unuyuhen hoholangge sobir isaruk hag toho Moab inap arimano enengginangman sobit heheg windal-wandal toho unusuhup.

¹¹Unusuk ohoman Moab inap arimano ik il apmane laruk lit enekolen ik il watil laruk hag toho turuk lamuhup angge famen it unubabut winik-wonog toho turuk ane ari fahet Allahn apmayap enebuhu.

¹²Elehet yaron inibam pumbuk walinggoho ohowon arimano halog toho yinggi fusuhumu lilibug toho lin uhup.