Read Angguruk Yali YESAYA 26 Bible Online

YESAYA 26 - Angguruk Yali bible

YESAYA 26

¹O ino sambil Yehuda kinangman sini yunggultuk lamuhubon tu, ”NINIKNI Allahn nit ninibam pumbuk walinggoho elehet ineyon oko kilabeg latisi ambeg ninindi yuwag toho welahe.

²Ap inindi wirik toho Allahn fano peruk ane turukon arimano kukag ulug o pumbukmu kurukon sok ele husi fiyek!

³Ap inindi nin am fug angge Allah fam wenggel harukon arimano Allahn wanggi wat enesug laruhu. Aren eneg let nenebuhu ulug nangno rurukon arimano fanowap enebuhu.

⁴NINIKNI Allah helep ubule eleg am fuhon hag toho werehen At ubam eneg wenggel harukmen eneg welamuhup!

⁵At inowen ap palimu wereg latuson apmayap eneptisi. O pumbuk elehet yaron walinggoho ohowon halog toho kinang ke yinggi ferisimu lilibug toho lin irisi.

⁶Lin irisi ambeg ino ap inine elehon enenggengge elehon unuyuhen sobir isaruk lamuhup.”

⁷”Hat Allah hele holtuk inap laruk ke Haren yag eneptuk lahenma inindi nonghong uk fug angge pikit laruk.

⁸Siyag ane turuk laheyon fahet alem angginon nunubam emberuk lahen halug oho Hat NINIKNI Allahn eneg windat nenebuhun ulug yet hasug lahe. Hat hunuk ninindi pulmu roho foroho lit Hat hubam eneg wenggel haruk lahe.

⁹O hup atukmu oho an nindimuwen Hat yami haptuk lahi, o sakan turukmu oho an nundaman Hat hubahet eneg ebet haruk lahi. Haren ap siyag ane turukon fahet alem angginon unubam emberuk lahen halug ap kinangmonen yet haruk lit tu fano, tu siyag ulug inindi anggar atuk.

¹⁰Hat hele sobir isalug siyag ane turuk inap alem angginon unubam umbuk fug angge hindi enesug laruhun halug tu fano, tu siyag ulug milal taruk lamuhup fug. Ari roho turuk lamuhubon arimanowen ap tu fano, tu siyag ulug onoluk teg inap sehelimuwen oho siyag ane eneg til-wil laruk lamuhup. Iren Hat NINIKNI Allah palimu werehon ino inilen kim hiyaruk eleg.

¹¹Hat NINIKNI Allahn unusimin ulug hinggik leho lit wereg angge famen iren yet hiyaruk eleg. Iren Hat humalikisi hindi isaruk lit ili og eneptuk lahen ane yet halug ininggali amag! Hat men seli roho werehon arimano Haren unusuhunmu indoken narukmu eleg atuk hag toho amuhup!

¹²NINIKNI Allah, niren tul peruk latukukon obog toho Haren nit fahet wep teberuk latikin. Ari hag toho ketiya oho Haren nit windat neneptukmu ninindi yuwag toho welamuhuk.

¹³Allah, Hat NINIKNI welahenman ap amuwon arimanowen nit hit hiniknisi welamuhuk ulug in atusareg sen nenesug latusa angge famen niren Hat eneg Ninikni welahen ulug hunuk suwap turuk lahe.

¹⁴It sen nenesug latuson arimano mondabi war atusa, enehime nin suhuloho in amuhup fug. Haren it siyag ane turuson fahet ayeg waroho unusuruk lit elehap eneptikinmu fobik oho aben it unubahet wenggel haruk lamuhup fug angge famen

¹⁵nit Hat humalikisi welaheyon nenebe anggolowap neneptuk lit nenengginang hili hiyale ferikin. Ari roho turuk lit Hat palimu welahen ane inam atisi.

¹⁶NINIKNI Allah, nit nenesengseng toho wereg lit Haren let nenepmihin ulug yami haptuk latukuk. Haren nit nunusurukmu oho nenele hi roho hubam uruk latukuk.

¹⁷Hiyaben malik enderik oho lit ouk anggolowen inel-hanel uruk lit ele hi roho urukon hag toho Hat holohotma welatukuk.

¹⁸Hiyap malik ahummu fet taluhonen tanggusi naruk hag toho turuk lit niren oho malik endebul perukmen yog eneg puk turukuk. Nit malik endetuk elehon hag toho wereg lit ninine elehen kinang aru windabuk fug teg latukuk.

¹⁹NINIKNI Allah, Hat humalikisi warehon arimano nin hebeloho onoluk welamuhup. An nori war atuson arimano nin in amuhup. Hit kinangma sal heneptuson nori, in atug henele henehiyeg toho uruk lamuhup! NINIKNI Allah hibilil mun angge man angge olukap turukon hag toho wambik waharukmu kinang ariyen ap warehon arimano sok husoho wilip enebuhu.

²⁰Nori, Allah umalikisi welahebon, Allahn olok haruk lit warik oho regman olma hirag arik kulug sok laroho welamok! We tot hirahoma weregman eneg Allahn amusun tuk fug angge olok toho tuhuk perukon obog toho tubuhu.

²¹Ap kinangmonen siyag ane turukon fahet alem angginon unubam imbik lamin ulug ibamen wilip arik oho reg. At waruhumu ap alem unubam elegman hirahoma enemep hilil isaruk latusa ane obog toho ebenam aruhu.”