Read Angguruk Yali YESAYA 27 Bible Online

YESAYA 27 - Angguruk Yali bible

YESAYA 27

¹ NINIKNI Allahn alem obog toho haloho umbuhu sambil ino manu humon folo mase-mase larukon Lewiatan ik saho ahik ahummu werehon ino apmayap timin ulug karog humon ineyon ayeg olokon fam ware fusuhu.

²O ino sambil Allahn ele uhuwon tu, ”Hom yabuk asan suwon eke ngi reg lahi.[14] Yabuk ino fano reg ulug sini uruk lamek!

³An HINIKNI Allahn yabuk ari foroho lahi. Hundig-hundig ik hilil isaruk lit kinang ahaluweyap turuk lahi. Aben siyahap tuhup tohon ulug likiya hupmu yet teg lahi.

⁴An niyabuk fahet nolok haruk latikik ane eleg atisi angge famen olok-olok angge hinde-hinde weregma yet hahuk halug Anden mondabi eleg amag ulug henetil lahukteg abirangge indokma yale fusuhuk.

⁵Ari hag toho An niyabuk siyahap turukon obog toho unubam tuhuk angge famen iren An men seli roho wereg ane embeselug nenehap mapmu nenesug lamin ulug nambeg wamuhup halug Anden siyahap enebuhuk peruk lahi ane umbusuhukteg it men nininggik ahandip toho welamuhuk.”

⁶Fobik Israel inap Yakuben ondohowonen ondohowon arimano nin hebeloho unumanggen kinang apma wamburuk lit owil yihik felug anggen anggolo wilip aruhumu anggenen kinang obog toho hondo aruhu.

⁷Atam NINIKNI Allahn Israel inap alem angginon unubam emberisiyon we tot tegma it men seli roho welatuson arimano alem mondabi angginon unubam emberisi. Ap seliyon arimano enebe anggolo unusirisiyon men Israel inap unusirisiyon men ambi reg eleg.

⁸Alem angginon unubam embemin ulug yali filen siyelu ineyon monde fik waharisireg yanggaloho pilili-palala isarisi.

⁹Ari roho unubam turuk lit Allahn Israel inaben siyag ane turuk latuson hondo reberisi. Alem unubam werehon elehap tirisi ane ari ambiyangma Israel inaben usangge wel eneptuk lit hubu lahaptuk ambeg arimano lilibug toho ul hag tebeseruk lit usa ahen men amben fano angge yaltuk ambeg men siyahap tuhupteg fobik nin wibuhup fug.

¹⁰O itano li o pumbuk suwon ap seliyon wereg ambeg ino halog toho lin uhumu ap eleg ambeg lekma hag aruhu. O siyag aruhu ambeg inowen wam sapi yinggig lit inggilangge mag-mag naruk lamuhup.

¹¹Mag-mag narukmen eneg e ilim aruhuwon arimano hiyaben sengge roho wahupteg indokma yale fusuhup. Ap o pumbuk ari werehon arimano inindi sohu roho werehen wal enepfag ahun inowen indi isaruk laruhu fug. Lal enepfag ahun inowen ambol yig isaruk laruhu.

¹²O itano li NINIKNI Allahn hit Israel inap ik Efrat famen tulug Mesir kinang hili fam ap winon seheli ke welahebon andog henebuhu. An numalikisi misig oho longgo uhu fug ulug NINIKNI Allahn roti anggen tel harukmu loloho wamburukon misig-misig ondoltuk hag toho hit o wal taneg welahebon palu henebil lahu.

¹³O ino sambil waruk ele hum toho tung-tang tuhumu o Asyur kinang fam linggik-longgo uruson arimano men o Mesir kinang fam hik-hak isaruson men o Yerusalem wamuhupteg NINIKNI Allah antom famen enelenggen fam hur atlug At wel turuk lamuhup.