Read Angguruk Yali YESAYA 28 Bible Online

YESAYA 28 - Angguruk Yali bible

YESAYA 28

¹Israel inap ik olokon nalug nenek turukon arimano inibam pumbuk siyag amag! O pumbuk ino fahet enehiyehen hemet turuk angge famen e owil ap ununggulmu lahaptukmu halo uruk hag toho ik olokon nalug war am hag ane turuk inap inibam ino siyag aruhu.

²NINIKNI Allahn ap misig akol eleg toho ine roho turuk ahun monde fuhumu at ino siyelu humon waharukmu osit soho anggen hahon pilaptuk hag toho waruhu. Osit humon narukmu ik fu laruk hag toho ap Allahn monde fuhuwon ino waruhureg ap arimano kinang ke fuk-fak isahu.

³Ik olokon nalug nenek turuk inaben inibam pumbuk ino fahet enehiyehen hemet turukmen ap unuyuhen pumbuk ino sobit-sabar isahup.

⁴O pumbuk punumu wirihon ino apma tonggo kinang seiyon weregma pumbuk ino fano anggolo famen e owil halo uruk hag toho weregma mondabi siyahap tuhup. E soluk anggen li uwanma urukon ahil turukmu aben yet halug pikit tahanoho naruk hag toho o pumbuk ino siyag aruhu.

⁵Ari teko lahu li ap we tot welamuhubon itano fahet NINIKNI Allah pohol ha kinang ha senehon ino e owil fanowon ap ununggulmu lahaptukon hag atuk lit umalikisi palimuwap enebuhu.

⁶NINIKNI Allahn alem kong turuk inap milal eneptuk laruhumu alem obog toho fano roho haltuk lamuhup. Aren o pumbuk fahet kahaleg inap inineyap eneptuk laruhumu enekol eleg toho ap seliyon yanggal eneptuk lamuhup.

⁷Allah wene hiyag isaruk inap nabi men Allah fahet hubu lahaptuk inap imam menen oho ik olokon nalug nenek turuk. Nenek turuk lit mulilik la mulilik wam til laruk. Ari til laruk lit fano ane wenggeltukon eleg atukmu nabi arimanowen fulu roho yet haruk ane fahet enepeleg atuk, imam arimanowen unggum fano roho haltuk eleg.

⁸Iren suburu naruk ambeg meyen eneg keleg tegma kolo reg ambeg wereg eleg.

⁹It arimanowen an Yesaya nabug uruk lit, ”Aren nit fahet ap sa men hag toho wereg peruk lit milal neneptuk? Nungge fahet Allahn uruk ane fahet inindi anggarap enepmin peruk? Nit fahet malik toron ket ag pale ferukon hag toho wereg peruk?

¹⁰Nungge fahet malik toron milal enebuk hag tohon, ’a, a, b, b, c, c,’ ulug hiyag nisaruk?” ulug an nabug uruk.

¹¹Hiren anden urukon holtuk lamuhup fugmu NINIKNI Allahn ap o winamon henembeg mon enebik waruhumu it enele hiren holuk fug tohon fam hiyag hisaruk lamuhup.

¹²Allahn hit hunubam hiyag hisaruk lit, ”Sat haruk lahebon kel taruk lamuhup ambeg tu wereg,” ulug hiyag hisaruk latisi angge famen hiren holtuk latikip fug.

¹³Ari fahet NINIKNI Allahn, ”a, a, b, b, c, c,” ulug sohuwap eneptuk ane hiyag hisaruk laruhumu hit larukmen sen heneptukmu henembol han fuk toho yingguruk lit henembol uwag upuk toho mondabi siyag amuhup.

¹⁴Hit Yerusalem inap onowesi wereg lit winik-wonog turuk hinap welahebonen NINIKNI Allahn ele urukon holeg lamek!

¹⁵Hiren, ”War amuhuk fug ulug ap warehon wereg ambeg laruk ke sok latukuk,” uruk lahep. Un ane eneg il laruk lahebon ariyen hinindi yuwahap taruk lit alem angginon waruhuwon fahet nit nunubam aruhu fug peruk lahep.

¹⁶Ari fahet NINIKNI Allah suwon inowen ele uruk lit, ”Anden tom Sion fam o indit fil ine roho unduhuk lamag ulug helep eneg toho wahukon misig ubule yaho fuhuk. Helep yaho fuhukon ino alem tu fahet: Ap san indi wirik toho Allah fam wenggel haruk halug ambol fil hebeloho lahu fug.

¹⁷O wituk inaben o wirim turuk ahele fam wirim turuk hag toho aben fano ane turuk ano ulug Anden ap unubabut aluwar isaruk laruhuk. It arimanowen alem fano roho hale feruk ano ulug Anden kim isaruk laruhuk,” ulug Allahn ele uruk. Osit soho anggen hahon naruk lit un ane uruk lahebon ariyen hinindi yuwahap taruk lahebon ino elehap tuhu. Ik fu waharuk lit hirag atuk lahep ambeg halog toho lin isahu.

¹⁸”War amuhuk fug ulug ap warehon wereg ambeg laruk ke sok latukuk,” irikibon wirim aruhu fug. Ik fu waharuk lit hit hondo henesug laruhu.

¹⁹O sakan turukmu oho hup atukmu oho ik fulungnu ruruk lit hit hapu roho og heneptuk laruhu. Ari teko lahumu aben hol haruk lit enekolen hirimuruk turuk lamuhup.

²⁰Aben enele uruk lit, ”Nohoruk ambeg horog tehen unuyug pog toho nohuk fug teg, sum nohoruk angge tot tehen hililip ta fug teg,” uruk ane hit hunubam hikir aruhu.

²¹NINIKNI Allahn tom Perasim alman oho o Gibeon tonggoman oho tog elman olok toho turuk latfag hag toho hit hunubam oho amu ane turuk lit hinindi sohuwap heneptuk laruhu.

²²Ari roho turuk lit nit NINIKNI Allah pohol ha kinang ha senehon inowen kinang obog toho siyahap tuhuk ulug kong toho emberisi ane an hiyag nitisi. Hiyag nitisi ane hikit toho anden hiyag hisaruk lahiyon ari hiren holtul fug ulug inda yag nabuk fug. Hit hininggik hele wat heneptuk hag toho welahebon kumbi mondabi ineyon fam pug henebuhup tohon!

²³Anden iminon fano holtul ulug hinisanggo leho lamok!

²⁴Ap ekeyen yabuk witmin ulug kinang habultukmen eneg wereg ano? Wen ele haltukmen eneg wereg ano? Eleg-o, nori!

²⁵Kinang habuloho wen ele oho felug suburu hom hali pim el men wal taneg yaho felug ayegma suwan yatuk.

²⁶Yatuk ane ari at Ikni Allahn milaltuk ane hikit toho anggen wal taneg yag taruk.

²⁷Ap ekeyen wiramna anggen halog timin ulug helep simbuk suwon fam halog tuk fug angge helep toron fam halog turuk.

²⁸Ebe kutukmu anggen al sahaloho lahu rohon ulug inggik anggoloenam kubuk fug angge we pirenam hinahanam kutuk.

²⁹Alem arimano fahet NINIKNI Allah pohol ha kinang ha senehon inowen ap inindi anggarap eneptuk. NINIKNI Allahn indimuwen tuhuk perukon hikirap turuk lit alem suwon aben fog turukon teberuk.