Read Angguruk Yali YESAYA 29 Bible Online

YESAYA 29 - Angguruk Yali bible

YESAYA 29

¹Allahn ele urukon tu, ”O Yerusalem hinap nori, hit henesehelimu An nubahet hubu lahaptuk ambeg wereg angge famen fano welamuhup fug. Hit hinibam o Yerusalem Daud umalikisi sehen senehon men luhaloho welatfag ambeg ino siyag aruhu! Mo ilig am wirig am turukmu henehiyehen yunggultuk lahep angge famen mondabi siyag amuhup!

²Anden hit henele ying heneptukmen eneg hinindi siyahen uba yatuk lamuhupmu hit hinibam obog toho An nubahet hubu lahaptuk ambeg hag aruhu.

³Anden hit hinibam pin kuhuk ulug walinggoho kilap henebik waruhukteg elehet yaron pisan toho kuhuken o pumbuk walinggoho kinang andog toho lahabil lahalug elehet fene pila ruhuk.

⁴Ari roho tuhukmu hit sabelepma ying arik wambuhupteg ap warehon enehimeyen kinang apman enele enenggolop elman uruk hag toho henele ahuri ha roho uruk lamuhup.

⁵Ari roho turuk lamuhup angge famen ap seliyon mondoko werehon arimano kinang alinlan hag amuhup. Onolok toho turukon arimano e inggila lilohon siyeluwen walug larukon hag toho amuhup. Enepeleg toho weregman keman wahileg keman wahileg

⁶lebeglu lebeg tulug ululu sipuk toho o mek turukmu siyelu fu ruruk lit indok ambulpul ulog tirikim An HINIKNI Allah pohol ha kinang ha seneg lahiyon inowen ili og henebik oho waruhuk.

⁷An waruhukmu ap o pumbuk obog toho o An nubahet hubu lahaptuk ambeg siyahap tuhuk ulug waling henesug lit henele ying henebik wamuhubon arimano hubanggo nei og haruk ane hag toho eleg amuhup.

⁸Ap suburu obok toho werehon ekeyen suburu naruk ane fahet nei ohog in atuk halug suburu ninggi fureg obok toho welahi ulug indi anggar atukon hag toho welamuhup. Ap ik obok toho werehon ekeyen ik naruk ane fahet nei ohog il ili atuk halug anggolop lilohen ine eleg atuk. Ari hag toho ap o pumbuk obog toho tom Sion fam wereg inap siyahap enebuhuk ulug luhaloho wamuhubon arimano inine mondabi eleg amuhup.

⁹Nori, hit hunubam teko laruk ane yet teg lit henekolen henebe war atuk hag toho welamek! Mun ane man ane teko larukon fahet hinindi sohu roho wereg lit inil hupnihon hag toho welamuhup! Ik anggur ahaluwe na fug angge welamuhup angge famen ik olokon nalug nenek turukon hag toho wereg lit mulilik la mulilik wam turuk lamuhup!

¹⁰ NINIKNI Allahn noho henepeleg amuhup perisi ane hikit toho nohoruk lahep. Hit honori Allah amingmingangge nabi arimano hinil hag toho welalep angge famen Allahn it inil hupni feserisi. Fulu roho yet haruk inap arimano hit honorohole hag toho welalep angge famen Allahn onorohole sal eneptisi.

¹¹Iren fulu roho yet haruk latusa ane suwesingga fam hahareg ane arimano obog toho hit fahet suwesingga aben kim hahup fug ulug enehangge fam seleben tehon hag toho wereg. Suwesingga ari hahareg ane oluk teg ahun ekeyen kim hawag ulug og utuk halug ap inowen, ”Suwesingga aru enehangge fam seleben tehen anden husoho kim ha fug teg lahi,” uhu.

¹²Suwesingga ari ap hahareg ane apelehon ekeyen kim hawag ulug og utuk halug ap inowen, ”Anden hahareg ane napeleg toho welahireg suwesingga aru kim ha fug teg lahi,” uhu.

¹³ NINIKNI Allahn ele urukon tu, ”Ap aruman enembilik fam eneg wel naptuk lit inindiyen An nele embeseruk lit un ane peruk. An nawene hiyag isawon enekol toho seneg lalep angge famen aben uruson seneg.

¹⁴Ari fahet Anden nin eke su ane alem amuwon ap inindi sohuwap eneptukon ap aruma unubam emberuk laruhuk. Ari turukmu ap inindi anggat toho werehon arimanowen mun ane man ane onoluk teg ane eleg aruhu.”

¹⁵Niren tuhuk peruk laheyon NINIKNI Allahn oluk aruhu rohon ulug hirahoman enele sahaltuk lit mun ane man ane o hik tegman turukon arimano siyag amuhup! Ap arimanowen enele uruk lit, ”Ap san yet nisahureg niren turuk laheyon ari fahet oluk aruhu?” uruk.

¹⁶Iren mun ane man ane hebel-pebel isaruk. Kinang men kinang fam kubag wituk ahun men ambi reg ano? Kinang ino kubag wir atlug kubag wituk ahun fahet, ”Kubag wituk ane apelehen wit naptisi fug,” uk teg ano?

¹⁷We tot welamuhukmu yabuk kinang fanoma fare humon lahaku angge famen tom Libanon lei reg ambeg ino yabuk kinang fanoma aruhu.

¹⁸O ino sambil ap inisanggo larehon arimanowen suwesingga fam hahareg ane urukmu hol hahup, o hik tegma wereg lit inil hupnihon arimano inil fenggen aruhu.

¹⁹Inine elehon arimanowen NINIKNI Allah fam wenggel haruk lit nin sebe roho inindi enehiyeg toho welamuhup, inilaheg toho werehon arimanowen Israel ninap Ninikni ebe usa fulu rehon fam ebet haruk lit inindi se rehen yunggultuk lamuhup.

²⁰Allah abug uruk lit ap siyahap eneptukon arimano eleg amuhup, nonolok ane eneg tuhuk ulug wenggel haruk inap arimano obog toho siyag amuhup.

²¹Unggum kong tuhup fug ulug alem haltuk inap sen eneptuk lit ap unubam un ane lombohap eneptukon arimano eleg amuhup. Enele si ane uruk lit ap fano ane turukon miyal eneptukon arimano siyag amuhup.

²²Ari fahet NINIKNI Allah hun Abraham windatfahon inowen Yakuben ondohowonen ondohowon unubam ele urukon tu, ”Hit Israel hinap hininggaliyap heneptuk ane eleg aruhumu ketiya honorohole hininggaliyen kunuk toho welamuhup fug.

²³An ninggiken hit sehelimuwen tuhuk ane yet hahupteg An nubahet henekol toho wereg lit Allah ebe usa fulu rehon nunumba Yakuben wel turuk latfahon ino nit Israel ninap Ninikni wereg ulug nunuk wel naptuk lamuhup.

²⁴Ari roho teko lahu li ap inindi nonghong urukon arimano inindi anggar aruhu, inirim toho werehon arimano komo eneptukmu wenggel halug holtuk lamuhup.”