Read Angguruk Yali YESAYA 3 Bible Online

YESAYA 3 - Angguruk Yali bible

YESAYA 3

¹Yerusalem inap men Yehuda inap menen wanggun tomuk hag toho senehon ino Allah NINIKNI pohol ha kinang ha seneg ahun inowen ininggikmuwen taluk toho hik isahu. Eneseher angge ik men suburu men elehap tuhu.

²Tog aptukon men, enekol eleg toho turukon men, alem haloho emberukon men, Allah ele hiyag isarukon men, fulu roho hiyag isarukon men, onowesi roho werehon men,

³sehen senehon milal eneptukon men, ap suwon-suwon men, ap suwon komo rurukon men, pamongge unusurukon men, hal inap fu eneptukon men arimano obog toho Allahn elehap enebuhu.

⁴Malik toron ket-ker ane turukonen fet enesug lamag ulug in enebuhu.

⁵Malik enepelehonen fet enesug lamuhupmu it-it miyal-miyal atuk lit ap kabiniyonen ap sabalon enele ying eneptuk lamuhup, aben ininggaliyap eneptukonen tung inap apmayap eneptuk lamuhup.

⁶Itano li ap ekeyen ikni ibamen are eke seneko at ubam ele uruk lit, ”Haren eneg sum wan turukon aben yoholiyangge hilarusa fuhon foroho lahen angge re hat nit nonowe lahalug o halog toho lin uruson aruma seneg laruhun,” uhu.

⁷Ari uhumu areyen hebeloho hiyag utuk lit, ”Anden hit hihit henebuk fug teg lahi. An nibamen suburu men sum wan turukon men foroho lahi fureg hit honowe aruhuken lahap nabuhup fug,” uhu.

⁸Yerusalem inap men Yehuda inap menen enembiliket ininggik famet NINIKNI Allah umbagpag turukon ele ying turuk ane ariyen salog-malog angge roho fuk turuk.

⁹Iren ap tu palimuwon, tu apmon ulug onorohole kim isaruk ane ari famen unubabut siyahon inam atuk. Sodom inaben siyag ane turuk latfahon awiya wibag fug hag toho iren oho siyag ane turukuk ulug ap iniline enewelwel taruk. Ari turuk inap arimano siyag amuhup! It ininggarehen alem angginon unubamap taruk.

¹⁰Allah ele holtukon arimano unubam fano amuhup iyok! Iniyabuk witukon famen anggen fanowon yihik feruk laruhuwon ininggarehen naruk lamuhup.

¹¹Allah fahet nirim perukon siyag amuhup! Iren siyag ane turukon ariyen kal oko alem angginon unubam aruhu.

¹²Allahn ele urukon tu, ”An numalikisi welahebon, malik toronen hit sen henesug, hiyaben hit fet henesug. Hit milal heneptukon arimanowen hinindi nina feseruk lit un ke lahup ulug unug hisaruk.”

¹³NINIKNI Allahn alem numalikisi unubam werehon kong timin ulug in atuk.

¹⁴NINIKNI Allahn alem unubam embemin ulug umalikisi onowesi roho werehon men iniknisi roho werehon men hiyag isaruk lit, ”Hiren yabuk kinang fanoma[4] siyahap tirikip, ap inine elehon enenggengge hilarikibonen hit hinibam keleg teg.

¹⁵Nungge fahet hiren An numalikisi hunuyuhen sobir isaruk lit ap inine elehon ununggul uwag arap heheg unusuruk lahep?” ulug Allah NINIKNI pohol ha kinang ha seneg ahun inowen ele uruk.

¹⁶NINIKNI Allahn ele urukon tu, ”Yerusalem hiyap tom Sion fam werehon arimanowen hemet til laruk. Neneliliyangge lahabeheyon aben yet hawag ulug enenggolop pin hinal til inil humbur il sohomangge unuyugmu wan tehonen ele ukag ulug yunggultil telim-telim laruk.

¹⁷Ari fahet Anden Sion hiyap onoruk paloho ununggul ahap eneg tebesuhuk.”

¹⁸O ino sambil Ninikni Allah eneliliyangge lahaptukon obog toho taluk toho hik isahuwon tu: Sohomangge unuyugmu lahaptukon men, pusa inilahuwagma lahaptukon men, pikalem hag angge pundul fam watukon men,

¹⁹inisanggomangge men, sehene men, sum onorohole hililip toho wan turukon men,

²⁰ununggulmu langguk taruk asum men, tebiye habik tehon men, pahaluk hag angge men, kubag amben fano angge elma kilabehon men, usa ahalep anggen wan turukon men,

²¹sohomangge ininggikmu kilabehon men, enembiyangmangge men,

²²sum enebemon men, yunggultuk lit wan turukon men, sum enelunggu ke wan turukon men, sum sinami roho warukon men,

²³ininggareg onorohole kim haruk angge men, sum undama wan turukon men, ununggulmu oho enenggolopma oho wan turukon men obog toho Allahn taluk toho hik isahu.

²⁴Ketiya amben fano angge lahaptuk angge famen fobik amben siyag turuk laruhu. Pahaluk hag angge fanowon wan turukon ubalma hele siyahon wan turuk lamuhup. Onoruk suwalehon ubalma tilag teg lamuhup. Yunggultuk lit wan turuk asum ubalma sum simbulal wan teg lamuhup. Ketiya enebe tihim-tuhum wereg angge famen fobik enehap indoken honomuk turukon hag toho welamuhup.

²⁵Henehunsi karohen unusuhup, hunumalikisi tog elman war amuhup.

²⁶Sok o Yerusalem kurukon elma piya sini uruk lamuhup, o Sion ino hiyap yuwohon amu lin isarukon fong watuk lit kinangma heriyehon hag toho welaruhu.