Read Angguruk Yali YESAYA 30 Bible Online

YESAYA 30 - Angguruk Yali bible

YESAYA 30

¹NINIKNI Allah ele urukon tu, ”Yehuda inap onowesi An nele ying naptuken siyag amag! Anden peruk elehon ininggareg inindimuwen wenggel haruk ane eneg turuk. Anden hiyag isa fugmen it enemuwen o pumbuk winon men mangno amuhuk ulug sali paltuk. Ari til eneg laruk lit An nolohotma siyag ane anggolo roho turuk.

²An nubam lul ano ulug kapal niya fug angge o Mesir inaben ili og nenebuhup ulug Mesir inap onowe suwon fam heng tik laruk angge famen

³ili og nenebuhup peruk ane ari hikit toho teko lahu fug. Mesir inap onowe inowen let enebuhu fugmu ininggali hahup.

⁴Yehuda inaben mon eneptuson arimano o Zoan men Hanes men Mesir kinang fam larusa angge famen

⁵Mesir inaben let enebuhup fugmu Yehuda inap ininggali hahup. It arimanowen ap misig oho inibil am fug angge let eneptuk eleg. We inda yako ininggaliyap eneptuk lamuhup.”

⁶Allahn wam pak mene ik ambut fil leimu werehon fahet ele urukon tu, ”Yehuda inaben mon eneptukon arimanowen fano-fano angge iren tohon wam keledai men unta men enemberimu laha felug ap kurukmu siyag atuk keyen laruk. Laruk abunggalem ino fam mene singa onolokonen hilak eneptukon men pisanggo alimbuk men pisanggo humon fililoho larukon men wereg keyen laruk. Iren waruk angge arimano Mesir inap og isahuk peruk angge famen iren hebeloho let enebuhup fug.

⁷Mesir inaben ili og nenebuhup peruk angge famen let enebuk fug teg lamuhup. Ari fahet Anden it ununuk salikap toho ’Pisanggo humon famen nungge-nungge tuk fug tohon’ suwaluhuk.”

⁸Allahn an nubam hiyag nutuk lit, ”An numalikisiyen siyag ane turukon fahet ap fobik welamuhubonen inindi onoluk toho weregman eneg welamuhuben suwesingga eke fam haharoho embemihin,” ulug hiyag nitisi.

⁹Iren INIKNIYEN komo eneptuk ane holuk fug angge enele si ane uruk lit At ele ying turuk.

¹⁰Iren Allah wene hiyag isaruk inap nabi unubam enele uruk lit, ”Hiren fulu roho yet haruk lahep ane nit hiyag nisa fug! Tem toho uruk lahebon hiyag nisa fug angge we niren fano peruk laheyon eneg hikit toho hiyag nisaruk lamuhup. Niren hare ane wenggeltuk laheyon eneg apma welamuhuk.

¹¹Kalem pikiron embeselug kalem hareyon laruk lamuhup! Israel inap Inikni Allah ebe usa fulu rehon ino unuk fam henele uruk lit nit nenele ying neneptuk lamuhup fug!” ulug nabi arimano hiyag isaruk.

¹²Ari fahet Israel inap Inikni ebe usa fulu rehon inowen ele uruk lit, ”An nele hiyag hisaruk lahiyon holuk fug angge ap unubam onolok ane turuk lit enele si ane urukon ino fahet fano peruk lit hinineyap taruk lahep.

¹³Ari roho turuk lahebon ariyen alem siyahon hunubam atuk. Masag unggul paltuk lit misihim ap enepelegma wamburuk hag toho hir oho henepeleg toho weregma o misihim sambil siyag amuhup.

¹⁴Kubag kinang fam wirihon aben inindi ha fug angge hik isarukmu lilibug toho lin urukon arimano sehelimuwon asenggep misig oho indok anggen ulmu yami rurukon hahon men ik hinanggoho na hahon men mondabi eleg hag toho hir oho mondabi eleg amuhup.

¹⁵Ari fahet An HINIKNI Allah suwon Israel hinap Hinikni nebe usa fulu reg lahiyonen nele urukon tu: Hit An nambeg suhuloho wamuhupteg hinindi wirik toho An nubam wenggel haruk lamuhup halug fano amuhup. Hit hinindi yuwag toho wereg lit An fahet we tem peruk lamuhup halug hinine roho welamuhup,” ulug Allahn ele uruk angge famen hiren holtuk lahep fug.

¹⁶Hiren henele uruk lit, ”Ap seliyonen nunusul ulug waharukmu nit wam kuda fam lahalug folo-folo laruk lit linggik-longgo uhuk,” uruk lahep. Ari fahet hit folo-folo linggik-longgo ul ulug lahup. Hiren nenembohom kuda arimano inine anggolo rehen folo-folo lahe ha reg peruk lahep angge famen hit orog-orog larukmen mug heneplug larukon arimano folo-folo mug hisa wamuhup.

¹⁷Hit ap teng-teng angge welamuhup angge famen ap seliyon ebe misihen hunusimin ulug ele irikim henekolen linggik-longgo uhup. Ap seliyon enebe fuwabenen hunusul ulug turukmu hit obog toho henekolen longgo uhup. Obog toho linggik-longgo uhupmu piren hinahan welamuhubon itano punumu e inggila mondabi eleg ambeg e misig unduhuk hag toho welamuhup angge famen

¹⁸NINIKNI Allahn nosambil nindi isahuk ulug nangno ruruk lit let henebuhuk ulug wep tirisireg wereg. NINIKNI Allahn pikir ane eneg turuk. Aren fanowap nenebuhu perukon arimano enehiyeg toho wereg.

¹⁹Hit Yerusalem hinap tom Sion fam welahebonen uba yatuk lahebon umbusuhup. Hiren Allah fam henele hi roho let nenebik ma uruk lamuhup halug Aren indi henesug laruhu. Hiren At ubam urukmu itano Aren hol hisalug let henebik waruhu.

²⁰Hit asengseng toho welamuhup halug oho Ninikni Allahn suburu men ik men tor angge og hisaruk laruhu. Ari roho turuk lit Hinikni Allah hit honolohotman hirag ta fug angge welaruhumu hit hinilen At milal heneptukon ino yet haruk lamuhup.

²¹Hit kalem fanowon embeselug pikit fil ano hare fil ano lul peruk lamuhup halug At milal heneptukon ino henembolma wereg lit, ”Kalem tu!” ulug hiyag hisarukmu hol haruk lamuhup.

²²Usangge Allah hag toho wereg ulug wel eneptuk angge ili ruruk angge emas perak hililip toho lombog turukon arimano siyahap tuhupteg yog hag teg ulug hik isahup.

²³Ari roho tuhupmu Allahn anggen hiniyabukmu fok turuk lahubon fahet osit pilabik waruhu. Waruhumu roti anggen si roho wilip aruhu. O itano li henembohom kinang yatma wak laruk lamuhup.

²⁴Henembohom sapi men keledai men kinang hebeltuk angge lisoho walug larukonen suburu fanowon eneko emberukon naruk lamuhup.

²⁵Tom men hebe men obog toho fene ik laruk laruhu. Allahn ap seliyon obog toho unusurukmu inibam o yaron halog toho wambuhup sambil ino

²⁶pikalem mo hag toho yatukmu mo asinandi sabiren wirim toho yatuk lit o misihim sambil sabirenam yatuk hag toho seleg mondabi umbagpag turuk laruhu. O ino sambil NINIKNI Allahn yowil umalikisi unusirisi ambeg ino tag angge eneptuk lit hihir enebuhu.

²⁷NINIKNI Allah yatman inam arik waharukmu yet homok! Indimu indok ambulpul hag toho olok haruk lit ap inindi angginap enebik oho waharuk. Ambilikmuwen het-pet ane wilip atukmu ambilikanggen indok narukon hag toho wereg.

²⁸Ambilik ahe ik fu waharuk lit kinang ahakoma laharuk hag toho fu rurukmu ap o pumbuk obog toho liloho hik-hak isik oho waharuk. Un ke lawag ulug enembiyang elma kumbi ilili fusuhu.

²⁹Ari roho tuhumu hiren Allah wel turuk sambil hubanggo sini yunggultuk hag toho yunggultuk lamuhup. Israel ninap NINIKNI Allah helep owik hag toho werehon ino wel tul ulug pinggong ele watil Allah antom fam laharukon hag toho henehiyeg toho welamuhup.

³⁰O ino sambil NINIKNI Allahn ele ahako roho lahaptuk lit inggik ineyonen ap unusik oho pilabik waruhu. Indi inahan haruk lit indok ambulpul men osit humon men sehelimu waruhu. Siyelu fu ririkim poholman osit helep anggen hahon pilabik waruhu.

³¹Waharukmu Asyur inap arimanowen NINIKNI Allah ele hol halug enekol harikim itano Allahn e fam unusuhu.

³²Aren anggoloenam Asyur inap arimano e paleg fam unusurukmu Allah umalikisiyen waruk teltuk lit pinggong ele watuk lamuhup. Ari roho turukmu NINIKNI Allah inggik ineyonen Asyur inap arimano apmayap enebuhu.

³³Iret inikni ap suwonet wareg angge yal eneptuk ambeg ulug kinang ele yaron hiyaloho habulfahon wereg. E yaltukon anggolo roho wep toho emberuson oho weregma NINIKNI Allahn ambilik ahe indok ambulpul hag toho fu ruruk lit indokma yal enebuhu.