Read Angguruk Yali YESAYA 31 Bible Online

YESAYA 31 - Angguruk Yali bible

YESAYA 31

¹Mesir inaben let nenebuhup ulug enembeg larukon arimano siyag amag! Mesir inap sehen senehon wam kuda ineyon fam laharukon men kereta wam kudan lisoho walug larukon anggolo arimanowen windat nenebuhup ulug wenggel haruk lit Israel ninap NINIKNI Allah ebe usa fulu rehon ubam wenggel ha fug angge let nenebin ulug At yami ruruk eleg.

²At indi anggat toho wereg lit ele uruk ane un ane irikik ulug uwag oko wa fug angge alem angginon monde feruk. At ino in aruhureg onolok ane turuk inap men it inibil atuk inap men apmayap enebuhu.

³Mesir inap ap kinangmon werehen it fahet Allah hag toho wereg puk fug. Enembohom kuda arimano oho kinangma wereg angge ine elehon werehen Allah ine werehon hag toho wereg eleg. NINIKNI Allahn unusimin ulug inggik leg hahumu let nenebuhup ulug heng eneptuk inabet let henebuhuk uruk inabet mako wamburuk lit mangno roho mondabi siyag amuhup.

⁴Ari fahet NINIKNI Allahn ele urukon tu, ”Mene singa olokonen pak wat talug taluk nabuhup tohon ulug ele ngu ruruk lit weregma mene ino wabul ulug wam foroho inap wol eneptukmu ngik-ngog til waharukon mene inowen holtuk angge famen akol ha fug angge wereg hag toho An HINIKNI Allah pohol ha kinang ha seneg lahiyon ino wambik waruhukteg tom Sion An ninggikmuwen taluk nabuhup tohon ulug tog abuhuk.

⁵Suwe umalik foroho lit aherabul lambuk turuk hag toho An HINIKNI Allah pohol ha kinang ha seneg lahiyonen o Yerusalem wanggi waroho foroho lit ili waruk laruhuk. Yerusalem inap inibil atuk lit windat enebuhuk.

⁶Hit Israel hinap An numbahalug yat ke linggik-longgo uruk latikibon nambeg nin suhuloho wamuhup!

⁷Suhuloho wamuhup sambil ino hinindimuwen siyag ane wenggel haruk lit usangge hininggiken umbagpag turuk angge emas men perak men fam wituk latikibon arimano henebe wal tanehen hik isahup.

⁸Asyur inap tog elman unusuhup angge famen tog aben tohon famen war amuhup fug. It arimano tog elman unusurukmu linggik-longgo uhupteg ap kabiniyon arimano ap enemingmingangge amuhup.

⁹Ap suwon it fet enesuhon ino akolen longgo urukmu otsi sehen senehon onowesi oho tog aptuk ambeg embeselug linggik-longgo uhup. An HINIKNI Allah o Sionen An nubahet hubu lahaptuk lit wel naptuk lahebon inowen nele ihi.”