Read Angguruk Yali YESAYA 32 Bible Online

YESAYA 32 - Angguruk Yali bible

YESAYA 32

¹We tot welamuhupmu ap suwon misihen ap fano let eneptuk lit weregma otsi at let turukon arimanowen oho alem obog toho fano roho haltuk lamuhup.

²It enebe wal taneg siyelu men osit humon men waharukmu tombonma kuruk ambeg hag toho welamuhup. Kinang lilog teg ambehen ik eleruk wilip atukon hag toho welamuhup. Mo olokma helep owik humon apma sakoma kuruk ambeg hag toho it arimano welamuhup.

³Ap inil fam yet harukon inil hubun aruhu fug. Ap inisanggo fam hol harukonen fuki roho holtuk lamuhup.

⁴Ap inindi folo-folo ahe laharukon arimano inindi yuwag toho fano roho wenggel haruk lamuhup. Ap enekolen enele elek-elek urukon arimano enele seleg toho uruk lamuhup.

⁵Ap inindi anggat teg elehon palimuwap eneptuk ane eleg laruhu. Ap enele si ane urukon wel eneptuk ane oho eleg laruhu.

⁶Ap inindi anggat teg elehonen inindimuwen siyag ane wenggeltuk lit anggat toho uruk eleg. It arimanowen NINIKNI Allah apmayap turuk lit At fahet ap nenek turukonen uruk hag toho uruk. Iren ap suburu men ik men enehummu obok toho werehon arimano og isaruk eleg.

⁷Ap enele si ane urukon arimano unubabut siyag teg lit onolok ane eneg wenggel haruk. Ap inine elehon arimanowen enenggengge fahet anden tohon ulug fag toho uruk angge famen ap enele si ane uruk inaben un ane unubam uruk lit siyahap eneptuk.

⁸Ap unubabut fanowon arimano inindimuwen fano ane eneg wenggel haruk lit fano ane turuk lit eneg wereg.

⁹Hit hiyap welahebon nungge-nungge fahet wenggel ha fug angge hinindi se roho welahebonen an nele iminon tu holeg lamek!

¹⁰Ketiya hinindi yuwag toho welahep angge famen mo misig lahumu hele anggur anggen yihik elehen tahanuk fug angge wereg lit naruk angge winon oho obog toho elehen hinindi siyag toho welamuhup.

¹¹Nungge-nungge fahet wenggel ha fug angge hinindi se roho welatikip angge famen ketiya henekolen yuk lagmag uruk lamek! Henesum nonggoloho embelug fesi lahaboho welamuhup!

¹²Henengginang seiyon men hiniyabuk anggur anggen anggolo uruk ambeg men siyag atisiyon fahet henehummu siyahen hinindi wat taruk lamek!

¹³An nori Israel inap enengginang fam alog-alog angge anggolo wilip atuk lit keleg teg. Hinibam o pumbuk suwon ap enehiyeg toho wereg ambeg siyag aruhuwon fahet uba yatuk lamek!

¹⁴Ap suwon ibam embeselug wilip amuhupmu o ino walinggoho werehon arimanowen nungge-nungge turuk lit enehiyeg toho wereg ambeg ino ap enele teng uhup. O yaron ap seliyon kahal eneptukon fahet punumu wirihon ino halog toho wambuhureg mondabi tonggo aruhu. Tonggo aruhu ambeg ino wam eli men olma ambohom menen enehiyeg toho kinang waruk lamuhup.

¹⁵Ari tuhu angge famen o misihim sambil Allah hime fanowon pohol filen nit nunubam pilabik waruhu. Pilabik waruhu li itano lei reg ambeg arimano mun angge man angge yatuk ambeg aruhu, hiniyabuk arimano fam naruk angge hum toho wilip aruhu.

¹⁶Kinang aru atogman atogma werehon obog tohowen onori men let-ler atuk lit alem obog toho fano roho haltuk lamuhup.

¹⁷Onori men let-ler atuk ane ariyen inindi yuwag toho wereg lit fano roho weregman eneg welamuhup.

¹⁸Allah umalikisi arimano alem siyahon unubam am fug angge inindi se roho wereg lit mondabi fano welamuhup.

¹⁹Hiniyabuk ik elerukmu wituk lit henembohom o kema-kema lalug sohu roho kinang hilawag ulug ho rebeseruk lamuhuben hinindi henehiyeg toho welamek! Ari turukmen osit humon wamburuk lit masahen ohi siyahap turuk hag toho hit men seli roho wereg inap arimano siyag atukmu it inibam pumbuk oho halog toho siyag aruhu.