Read Angguruk Yali YESAYA 33 Bible Online

YESAYA 33 - Angguruk Yali bible

YESAYA 33

¹Hit nit men seli roho welahebon siyag amek! Aben hit siyahap heneptusa fug angge famen hiren ap siyahap eneptuk lahep. Aben hit hunubam onolok ane turusa fug angge famen hiren ap unubam honolok ane turuk lahep. Hiren ap siyahap eneptuk lamuhuk perukon obog toho tubuhupteg hit hininggareg siyag amuhup. Hiren ap unubam nonolok ane turuk lamuhuk perukon obog toho tubuhupmu hit hininggareg onolok ane hunubam aruhu.

²NINIKNI Allah, Haren hindi nisimin! Haren nit fanowap nenebuhu ulug nangno haptuk lahe. Likiya hupmu Hat hinggik ineyonen wanggi wat nenesug laruhun! Niren asengseng haruk laheyon Haren let nenebuhun!

³Nit fahet ili og enepmin ulug Hat in atukmu aplohok humon urukon fahet ap ununggul unuk wal taneg werehon arimano enekolen linggik-longgo uhup.

⁴Wam anggolo luhaloho suburumu kuruk hag toho aben ap arimano men tog aptuk lit enenggengge obog toho huhulangge hilahup.

⁵NINIKNI Allah mondabi palimu weregma mun angge man angge At apma wereg. Aren Yerusalem inap inineyap eneptukmu it-it let-ler atuk lit alem obog toho fano roho hale feruk lamuhup.

⁶Ari turuk lit weregma nungge-nungge siyahon hit sehelimuwen inam aruhu fug. Allahn numalikisi fanowap enebuhuk ulug inindi anggarap eneptukmu mun ane man ane alem obog toho fahet onoluk atuk. NINIKNI Allah fahet enekol toho wereg ane ariyen Allah umalikisi tung inap wereg.

⁷Sehen senehon enekol eleg toho turuk inap arimanowen anggenman let nenebiyek ulug enele hi roho uruk. Ap tog pilabuhuk ulug mon eneptuson arimano uba yatuk lit inindi log-pog atuk.

⁸Ap enekolen kalem suwon fam laruk eleg. Ambiyeg enele kong toho uruk ane ap seliyon arimanowen apmaya feseruk lit tog abuk fug angge mangno amuhuk ulug sali emberukon pisan isaruk. Ap obog toho apmayap eneptuk lit enele urukon holtuk eleg.

⁹Kinang aru atogman atogma lilog atuken ap inindi anggin toho wereg. Tom Libanon alma werehon arimano inine elehen ininggali haruk. O Saron tonggoma lei reg ambeg hag atuk. Kinang Basan men tom Karmel men fam e werehon inggila halo uruk lit ho roho wamburuk.

¹⁰NINIKNI Allahn ap seliyon arimano unubam ele urukon tu, ”Ketiya An in atminteg nine roho turuk laruhuk ane yet niyaruk lamuhup.

¹¹Hit henehummu hoholangge lilohon fet talug lahebon arimano tahe ilimon eneg indag tahup. Hit honolok ane peruk lit indok ilimangge kilap taruk lahebon ariyen mondabi siyag amuhup.[15]

¹²Hit obog toho indoken hinahumu mur ka aben ubahat fene lahaptukon amuhup. Alog angge aben kong tebelug indokma yaltuk hag toho yal henebuhup.

¹³Ap obog toho yatma horogma werehon arimanowen Anden turuk laruhuk ane fahet holtuk lit, ’At eneg suwon wereg,’ ulug fag toho uruk lamuhup,” ulug Allahn ele uruk.

¹⁴Ap siyag ane turukon o Sion werehon arimano enekolen unuwag elek turuk. Iren enele uruk lit, ”Allahn turuk ane indok ambulpul mondabi werehon hag toho werehen indok olokon mun angge man angge elehap turukon ino horogma ap sa welam teg?” uruk.

¹⁵Hiren henele tem ane eneg uruk lit Allahn fano peruk ane turuk lamuhup halug eneg fano welamuhup. Nanggengge anggolo welamag ulug yami ruruk lit ap inine elehon enenggengge hilaruk lamuhup fug! Ninibil amag ulug uang hininggikmu emberukon arimano hilaruk lamuhup fug! Ap wabul ulug enele urukmu hinisanggo fam holtuk lamuhup fug! Onolok toho turukmu hiren nenehiyeg toho ninilen yet usul ulug yet isaruk lamuhup fug!

¹⁶Ari obog toho turuk lamuhup fug halug ap elehet yaron walinggoho ohowon alukema wereg hag toho hinindi yuwag toho welamuhup. Suburu men ik men eleg am fug angge weregma likiya hupmu naruk lamuhup.

¹⁷Fobik hiren ap suwon raja eke ebe umbagpag turuk lit fano roho weregma yet hahup. At inowen kinang suwon atogman atogma seneg laruhu.

¹⁸Ketiya ap o winamon famen sen henesuhon arimano fahet henekol toho welahep. It enemingminganggeyen suburu men uang men emberuk lamuhup ulug heng heneptukon men onotsi winon men fahet henekol toho welahep ane eleg laruhumu ninindi yukap neneptukon arimano eleg atisi ulug hinindi se roho welamuhup.

¹⁹Ap o winamon wonog toho turukon enele elek-elek urukmu holtuk lahep fuhon hit henembeg waharukmu fobik yet isahup fug.

²⁰Tom Sion o Yerusalem werehon Allah fam sembahyang uruk lit seni esetuk ambeg ino yet hemek! Ninibam o Yerusalem yugmu aru ninindi yuwag toho welamuhuk. O ilamna ibam ekema witil ekema witil laruk hag toho la fug angge ninibam manibe roho welamuhuk.

²¹Wereg lit NINIKNI Allah palimu werehon inowen ine roho turuk ane yet haruk lamuhuk. Nit ninibam ik humon anggolo larukon ayeg ke weregma ap seliyonen ik pali keyen kou fam ninibam kuk fug teg lamuhup.

²²Kou ap seliyonen tohon arimano siyag aruhumu la fug angge weregma niren it enenggengge anggolo arimano huhulangge hilarukmu ap unuyug siyahonen oho ininggik tomok hilaruk lamuhup. NINIKNI Allah ap suwon fet nenesuhon inowen alem nit nunubam werehon haloho emberuk lit ap seliyon ininggikmuwen windat nenebuhu.

²⁴Nit nenengginang fam werehon misihen oho, ”An ouk nubam wereg,” uruk laruhu fug. Niren siyag ane turuk laheyon obog toho Allahn elehap tuhu.