Read Angguruk Yali YESAYA 34 Bible Online

YESAYA 34 - Angguruk Yali bible

YESAYA 34

¹Hit o pumbuk wal taneg welahebonen Allahn ele imisiyon holtihiben maniyek! Kinang atogman atogma welahebon men mun angge man angge onoluk wereg anggeyen oho hol hemek!

²NINIKNI Allahn ap o pumbuk obog toho fahet olok haruk lit it sehen senehon luhaloho werehon fahet indi inahan turuk. Ap arimano obog toho elehap enebuhuk ulug kong toho emberisireg aben unusukag ulug ininggikmu emberuk.

³Unusuhupteg wareg angge arimano hik isahupmu amben siyag turuk lamuhup. Tom walinggoho werehon arimano it unusuhubon enemeben keleg aruhu.

⁴Mo, pikalem, suhal men lilibug toho siyag amuhupmu suwesingga yinggiltuk hag toho pohol yinggiloho eleg aruhu. E inggila halo ulug loloho wamburuk hag toho suhal obog toho loloho wambuhup.

⁵ NINIKNI Allah poholma wereg lit karog Aren tohon wep toho umbat tarisireg ap unusik oho reg. Ari reg lit Edom inap arimano alem unubam werehen elehap enebuhuk ulug karog ino Edom inap enebene pilabik warik oho reg.

⁶Aben Allah fahet wam waroho emberuk hag toho NINIKNI Allahn Edom kinang fam o pumbuk Bozra inowen ap anggolo roho unusuhu. Wam domba men kambing men karog fam watukmu enemep men si men amiyon menen karog ino helhel angge ruruk hag toho karog NINIKNI Allahn tohon ino ap enemep men si menen helhel angge ruruk laruhu.

⁷Wam sapi kabiniyonet ineyonet olokonet it men ambiyeg unusuhumu enemep men si menen kinang obog toho filik tuhu.

⁸O ino sambil NINIKNI Allahn o Sion inap ili og eneptuk lit ap seliyon ayeg waroho apmayap enebuhu.

⁹O Edom ahik arimano somug hag atukmu angginang famen ahe olokon eneg laharuk laruhu. Edom kinang obog toho e humu hag atuk lit indok ambulpul turuk laruhu.

¹⁰Likiya hupmu indok ino eleg am fug angge ambulpul turuk lit hubu muhul mondotukmen eneg welaruhu. Ari roho turukmen eneg o Edom kinang ino mondabi siyag aruhumu fobik ap misig oho ke inowen lahu fug.

¹¹Ap lahu fug ambeg ino kohoni men pak menen ngi amuhupmu siyo-mayo men kut men nohoruk ambeg ei wirig laruhu. Allahn kinang ari sungguk-sanggak teg lit pirim-pirim angge ruruk laruhu ulug hele fam wirim tuhu.

¹²Ap suwon-suwon sehelimuwon eke inikni raja nin lahabuhup fug. Onowesi roho werehon oho mondabi eleg amuhup.

¹³O fanowon arimano alog-alog anggeyen hondo reg laruhu. O pumbuk elehet walinggoho ohowon famen olok-olok angge hinde-hinde wilip aruhumu olomene men huhubi menen inibam wiroho kuruk lamuhup.

¹⁴O ariyen wam eli men olomene men salkal urukmu mungguwat eke are men ambi atuk lamuhup. Yibukhe nohoruk ambeg oho kinang ari fam wereg laruhu.

¹⁵E fam pisanggowen ei wit talug anggen ondoho felug walinggigmu umalik sup turuk lamuhup. Siyag-siyag asuwe luhal arik waharuk lamuhup.

¹⁶Misig oho eleg lam fug angge it obog toho Edom kinang fam luhaloho welamuhup ulug suwesingga NINIKNI Allah wene haharehon aru fam winag homok! It arimano obog toho palu arik wamuhuben NINIKNI Allah inggarehen wol enebuhu, At ahime fanowonen hondog eneplug waruhu.

¹⁷Mangno arik wamuhupmu Allahn Edom kinang hele fam wirim tuhureg it wal-wal san ngi aruhu ulug enehangge hik tuhu. Hik tuhumu it wal tanehen kinang ino ngi amuhupteg iren ondohowonen ondohowon oho mondabi yug toho welamuhup.