Read Angguruk Yali YESAYA 35 Bible Online

YESAYA 35 - Angguruk Yali bible

YESAYA 35

¹Kinang lilog teg ambeg sei aruhumu owil-owil angge fanowon wilip aruhu.

²E walahen anggolo wilip atuk lit enehiyehen yunggultuk lamuhup. Tom Libanon fano rohon men tom Karmel alma Saron tonggoma kinang sei rehon men hag toho kinang lilog teg ambeg ino fano aruhu. Fano regma ap obog tohowen yet hahupteg NINIKNI Allah umbagpag turukon inowen ine roho teberisiyon ino fano reg ulug onoluk aruhu.

³Ari regma hininggik ine elehon ineyap taruk lit henelenggen ouken elek turukon wirikap tiyok!

⁴Ap inindi enekol toho werehon unubam henele uruk lit, ”Hinindi wirik toho wereg lit henekol ha fug! Hinikni Allah waruhureg ap seliyonen hit hunusurukon fahet Aren hebeloho unusuruk lit hit windat henebuhu,” ulug hiyag esemek!

⁵Ari tuhu li ap inil hupnihon fenggen amuhup, ap inisanggo larehon hur amuhup.

⁶Ap unuyug siyahon pak piringiyen hik toho laruk hag toho laruk lamuhup. Ap enele elehonen enehiyehen sini yunggultuk lamuhup. Kinang siyag teg ambeg mondabi fano aruhu. Kinang lilog teg ambehen ik eleruk wilip aruhu. Lei reg ambeg ik laruk laruhu.

⁷O hibiyen ik mondabi eleg atisi ambeg fobik ik yenggel aruhu. Kinang lilog teg ambeg famen komulo ik ayegma wereg angge wilip aruhu.

⁸Fano aruhu ambeg ino kalem suwon yag aruhu. Kalem ino unuk ”Allah Wereg Ambeg Larukon” suwaluhup. Ap siyag ane turukon funggalem ino laruk lamuhup fug. Ap fano ane wenggeltuk elehonen funggalem ino laruk inap arimano inindi nonghongap eneptuk lamuhup fug.

⁹Kalem ino fam mene singa men wam mene onolokon winon men welamuhup fug. NINIKNI Allahn ap windat eneptukon arimano eneg funggalem ino laruk lamuhup.

¹⁰It arimano inibam o Yerusalem suhuloho kuruk lit enehiyehen sini yunggultuk lamuhup. Enehiyehen onorohole seleg toho weregman eneg welamuhup. Asengseng toho wereg lit sat haruk ane mondabi eleg laruhu.