Read Angguruk Yali YESAYA 36 Bible Online

YESAYA 36 - Angguruk Yali bible

YESAYA 36

¹Hun Hizkia inowen Yehuda inap fet enesugmen mo nunggul huriken atfagma Asyur inap onowe suwon Sanherib ino watfareg o pumbuk elehet walinggoho ohowon Yehuda kinang fam werehon obog toho pin kibag.

²Pin kibareg o Lakhis wereg lit Sanherib inowen otsi sehen senehon anggolo roho o Yerusalem inap pin unusilihip ulug mon enepfag. Mon enepfag inap arimano Sanherib ot ik narukon forohowonen milal eneptuk latfag. Milal enepfareg wilip atlug o Yerusalem libareg o Yerusalem pali fil ik sene yenggeleg ambehen sul toho kilabik watfag ambeg itano ap sum urukon wereg ambeg horogma palu arik libag.

³Libagma ap suwon Hizkia otsi hinahan, ap suwon ibam foroho ahun Hilkia amloho Elyakim ino men, suwesingga hahatuk ahun Sebna ino men, ap suwon unuk fam ap hiyag isaruk ahun Asaf amloho Yoah ino men wilip atfareg Asyur inap enembeg libag.

⁴Libagma ik narukon foroho ahun Asyur inap milal eneptukon inowen it hinahan unubam ele uruk lit, ”Asyur ninap nonowe suwonen ele ehekon hit hinikni Hizkia hiyag irik lalihibon te tu, ’Haren nungge fam wenggel haruk lit hindi yuwag toho welahen?

⁵Hat hindimuwen, ’Anden fuki roho wenggel halug tog abuk fug angge we nambiliken uruk ane ariyen nine reg lit Asyur inap onowe apmayap tuhuk,’ peruk lahen? Haren ap sa an nibil aruhu peruk lit an nele ying naptuk lahen?

⁶Haren te Mesir inaben let nabuhup peruk lahen angge famen fili si rohon tomuk toho larukmen ininggik hak eneptuk hag toho aben Mesir inap onowe inowen let nenebuhu peruk inap arimano obog toho siyag amuhup.

⁷Haren te NINIKNI Allahn let nenebuhu uruk lahen lit teg angge famen hat hinggarehen Yehuda inap men Yerusalem inap unubam hiyag isaruk lit, ’Allah wel turuk ambeg o Yerusalem eneg weregma hit henebe watlug tuman eneg wel turuk lamuhup,’ ulug hiyag isarikinteg o wina ke Allah wel turuk ambeg men hubu lahaptuk ambeg men obog toho elehap tirikin.

⁸Ketiya anden Asyur ninap nonowe unuk fam nambong se roho hiyag hitminon tu: Haren hotsi wam kuda fam lahalug laruk ane onolukon teng-teng angge 2.000 hiyag nitmihin halug anden wam kuda ap wereg imihinon wirim toho teng-teng angge 2.000 og huruhuk angge famen ap wereg ulug ehen ha fug teg lahen peruk lahi.

⁹An nikni amingmingangge siyahon misig werehon inowen hit hunusimin ulug henembeg waharuk halug oho hiren yanggalehep ha fug teg lahep anggeyen hiren Mesir inap arimano kereta wam kudan lisoho walug laruk angge fam lahakupteg waharuk lit windat nenebuhup peruk lahep.

¹⁰Hat hindimuwen te NINIKNI Allahn let turuk elegma Asyur inap onowe inowen pin halog toho unusimin ulug nit nenengginang fam waharisi peruk lahen? Hit HINIKNI Allah inowen an nubam hiyag nutuk lit, ’Lamihinteg Israel kinang fam werehon arimano pin unusik lamihin,’ ulug mon naptisi,” ulug hiyag isibag.

¹¹Hiyag isibagma Hizkia otsi hun Elyakim men Sebna men Yoah menen Asyur inap onowe ot ino fam hiyag utuk lit, ”Ap elehet emberim ke werehon arimanowen holuhup tohon nit Yehuda ninap nenele fam hiyag nisamihin fug. We Aram enele roho hiyag nisamihinmu niren holtul,” ulug hiyag itfag.

¹²Hiyag itfagma o Asyur ahun inowen te, ”An nikniyen hit henebe hinahan ariya men hinikni men fahet eneg hiyag isahun ulug mon naptisi fug. Ap elehet pali ke heriyehon aruma eneyog enemiye hit men ambiyeg naruk lamuhubon iren oho holukag ulug it unubam oho hiyag isaruk lahi,” ulug hiyag isibag.

¹³Hiyag isibareg Asyur ahun ino in atfareg ap obog tohowen holukag ulug Yehuda inap enele fam ele ine roho hiyag isaruk lit, ”Asyur ninap nonowe suwonen ele irisiyon holeg lamok!

¹⁴Hun Hizkia inowen hiyag hisaruk ane fahet tem toho hiyag nisaruk puk fug! Aren hit windat henebuk fug teg.

¹⁵Hizkia inowen hit hinindi yuwahap heneptuk lit, ’NINIKNI Allah fam wenggel haruk lamuhup halug Aren nit windat neneptukmu o pumbuk suwon aru Asyur inap onowe inggikmu aruhu fug,’ ulug hiyag hisarukmu

¹⁶holuhup fug! An Asyur inap onowe welahiyonen hit hunubam hiyag hisaminon holeg lamek: O Yerusalemen wilip atlug an nambeg watlihipteg hat hapma welamuhuk ulug sali embelihip. Ari roho sali embelihipteg hit henebe wal tanehen hiniyabuk wit tahupteg suburu men hali men mun angge man angge yag tahubon men[16] ik hininggarehen habul tahup ambeg naruk lamuhup.

¹⁷Ari hag toho weregman eneg anden hit henengginang ari hag ambeg hondoko hunumbahakuk. Hondoko hunumbahakuk ambeg ino el hom suburu hali sawe mun angge man angge fano wilip atuk ambeg hunumbahakuk.[17]

¹⁸Ari fahet Hizkia inowen hinindi waruk lit, ’NINIKNI Allahn windat nenebuhu,’ ulug hiyag hisarukmu hol hahup fug! Ap o pumbuk winonen tu Allah hag toho wereg perukon arimanowen it wel eneptuk inap enengginang an Asyur inap onowe ninggikmuwen taluk naptusa ano? Eleg-o, nori.

¹⁹O Hamat inap men Arpad inap menen ninikni ulug wel eneptukon kema wereg? O Sefarwaim inaben tohon kema wereg? Allah hag toho wereg perukon enesehelimuwon misihen o Samaria inap an ninggikmuwen taluk enebik waharisi ano?

²⁰Nunumba ulug wel eneptukon obog toho enesehelimuwon misihen umalikisi an ninggikmuwen windat eneptisi ano? Nangginoho hit HINIKNI Allah inowen hit Yerusalem hinap an ninggikmuwen windat henebuhu?” ulug hiyag isibag.

²¹Hiyag isibag ane ino Yerusalem inap arimanowen holfareg Hizkia inowen hebeloho uk fug ulug komo enepfag ane roho enele eleg angge wereg lit hebeloho hiyag itfag fug.

²²Asyur ahun inowen hiyag isibag ane fahet inindi siyag atfareg Elyakim men Sebna men Yoah menen enesum wan teg latfahon tararag tibisibareg inikni Hizkia ambeg iren holfag ane hikit toho hiyag irik libag.