Read Angguruk Yali YESAYA 38 Bible Online

YESAYA 38 - Angguruk Yali bible

YESAYA 38

¹Itano li ap suwon Hizkia ino ouk ubam atfagma war am hag ane turuk latfag. Turukmu Allah amingmingangge nabi hun Amos amloho Yesaya ino Hizkia ambeg watfareg hiyag utuk lit, ”NINIKNI Allahn ele urukon tu holeg lamin: Haren nin fano aruhuk fug ulug mun ane man ane haren tohon haloho umbuhun. We tot welaruhunteg war aruhun,” ibag.

²Ibagma holfareg Hizkia inowen indi siyahen orohole ubahat fil hebeloho NINIKNI Allah fam sembahyang uruk lit,

³”NIKNI Allah, anden nindi wirik toho Hat hubam eneg wenggel haruk latikik. Nindi piren teg eleg angge Hat hele holtuk lit Haren fano peruk lahen ane turuk latikikon wenggel himin,” ibareg uba anggolo yatuk latfag.

⁴Uba yatukmu NINIKNI Allahn Yesaya fam ele uruk lit,

⁵”Hizkia hiyag utuk lit, ’NINIKNI Allah humba Daud inowen wel turuk latfahonen ele urukon tu holeg lamin: Haren An nubam sembahyang ehenon holtuk lit uba yarehenon oho yet hiyihireg Anden hat hihit habuhukmu mo ilig am wirig am turukmen nuwal fimahen 15 aruhumu eneg war aruhun.

⁶Anden let haptuk lit hat men Yerusalem aru men Asyur inap onowe suwon inggikmuwen windat henebuhuk. O Yerusalem hinap aruma hinibil atuk lit let heneptuk laruhuk.

⁷An HIKNI Allahn ihiyon hikir aruhu ulug holuk atmisiyen enehangge timinon tu:

⁸Mo laruk ane unug haruk angge ap suwon Ahas inowen witfahon inggik unduhukon ahuhe ino misihim eneg il numen waha ke hebeloho lamisi,’ ulug hiyag itmihin,” ibag. Ibag ane ari Yesaya inowen Hizkia hiyag itfagma mo laruk ane unug haruk angge ahuhe ino il numen watfag ke hebeloho libag.

⁹Libagma ap suwon Hizkia ino nin hebeloho fano atfareg suwesingga fam haharoho imbibahon tu,

¹⁰”An siyag toho wereg lit nele irikikon tu: An kabini reg lit amusun toho welaruhuk perikik angge famen war aruhukon horog aha.

¹¹Ap onolukon wereg ambeg embeselug lahukteg NINIKNI Allah nilen yet hahuk fug. Ap warehon sehelimu wereg lit ap oluk werehon misig oho yet hahuk fug.

¹²Wam foroho ahun ekeyen winama lamin ulug ibam o sabo halog tulug laruk hag toho an o sabo kinangma wirihon welahi ambeg oho halog tuhu. Hiyap ekeyen sum obog toho yihik fihi ulug hekel atog kong turuk hag toho an war amag ulug kong nabuhu. Haren an let naptuk lahen fugmu hubanggo unukoho mondabi siyag toho welahi.

¹³An let nabin il larukmen o sakan turuk angge famen hat NIKNI Allahn olomene singa ekeyen turuk hag toho an nuwag obog toho fala roho lilibug turuk lahen. Haren an let naptuk lahen fugmu hubanggo unukoho mondabi siyag toho welahi.

¹⁴Nine elehen hilalim inowen ele uruk hag toho nele tot toho uruk lahi. Nindi siyahen yalma inowen une uruk hag toho nele nginuk paltuk lahi. An let naplep ulug nil lahaboho lahi. Nikni, an asengseng toho welahireg ili og nabik ma!

¹⁵NINIKNI Allahn ele irisiyon hikit toho an nubam turuk angge re anden nungge ane imin? An nindi anggin haruk lit o hubanggo nohuk fug teg lahi.

¹⁶Nikni, an noluk welaruhuken Hat hambeg wahi. An fano aruhuken hihit nabik ma! irikik.

¹⁷Alem angginon an nubam welatisiyon ino hebeloho fano ane nubam atisi. Haren an mako wamburuk lit mondabi siyag am nowen ulug fet nasug lit anden siyag ane tirikikon hambolmayap tirikin.

¹⁸Ap warehon arimanowen Hat wel haptuk eleg. Ap hambuk urukonen Hat fahet sini yunggultuk eleg. Kinangma salehon arimanowen Haren let nenebin ulug nangno hasug eleg.

¹⁹Ap onoluk werehonen eneg Hat wel haptuk. Ari hag toho o yoho anden Hat fog haptuk lahi. Haren ap let eneptuk lahen ane fahet iniknisiyen unumalikisi hiyag isaruk.

²⁰NINIKNI Allahn windat nabik waharisi. Ari fahet nit nonoluk wereg lit At ibamen pinggong watuk lit At wel turuk lamuhuk!” ulug haharoho imbibag.

²¹Hizkia ino uwan fano am fugmu Yesaya inowen Hizkia amingmingangge unubam, ”E ara anggen walug watlihipteg tag toho Hizkia pot yihikon ino fam tahangge rilihipmu fano aruhu,” ibag.

²²Ari ibagma Hizkia inowen Yesaya fam, ”NINIKNI Allahn an hihit nabuhumu anden wel tuhuk ulug At ibam lahuk ane noluk atmisiyen enehangge teko lamisi ano?” ulug kapal hibag.